Kwamamaza

Minaloc yashimagije Guverineri Munyantwari, itanga impanuro kuri Mureshyankwano

Yanditswe kuya 26-10-2016 saa 10:16' na Kwizera Prudence


Minisiteri y’Ubutegetsi bw’Igihugu (Minaloc) yashimiye Guverineri w’Intara y’Iburengerazuba, Alphonse Munyantwari, ko igihe yamaze ayobora Amajyepfo yitwaye neza mu kwesa imihigo, iboneraho n’umwanya wo guha impanuro Guverineri mushya w’iyi ntara, Marie Rose Mureshyankwano zo kudatakaza iryo shema.

Byagarutsweho kuri uyu wa 25 Ukwakira 2016 mu muhango wo guherekanya ububasha hagati ya Guverineri Alphonse Munyantwari na mugenzi we Marie Rose Mureshyankwano.

Guverineri Alphonse Munyantwari wari umaze imyaka hafi itandatu ayobora Intara y’Amajyepfo, ubu yahawe kuyobora iy’Iburengerazuba naho Marie Rose Mureshyankwano wari umaze imyaka 10 ari Umudepite agirwa Guverineri w’Intara y’Amajyepfo.

Umunyamabanga wa Leta muri Minaloc ushinzwe iterambere ry’abaturage, Vincent Munyeshyaka, wayoboye uyu muhango, yagarutse ku ruhare rwa Guverineri Munyantwari mu kwesa imihigo mu Ntara y’Amajyepfo.

Yagize ati “Ibyiza byakozwe muri iyi Ntara y’Amajyepfo birigaragaza, ndagira ngo nshimire Guverineri Munyantwari, […] biragaragarira kuba muri iyi myaka ishize uturere two muri iyi Ntara hafi ya twose twazaga mu myanya ya mbere mu kwesa imihigo neza. Wabonaga rwose mu myanya 10 ya mbere harimo ubwiganze bw’iyi Ntara y’amajyepfo”.

Guverineri Munyantwari yasabwe kuzamura Intara y’Iburengerazuba

Vincent Munyeshyaka yavuze ko bizeye ko Guverineri Munyantwari aho agiye azahateza imbere nkuko yabikoze mu Majyepfo.

Ati “Turizera ko uwo muco niyo mikorere abijyanye aho agiye, kandi aho ari ni umusaruro waturutse mu mikorere yagezeho ubwo yari muri iyi Ntara y’Amajyepfo”.

Yakomeje agira ati “Icyo namubwira ni uko agifite inkunga yacu, tuzamuba hafi nka Minisiteri y’Ubutegetsi bw’Igihugu, kandi naho agiye hari abafatanyabikorwa, hari abaturage kandi ubushobozi bwo kuba umuhuzabikorwa, guhuza abantu, guhuza inzego tubumuziho, ku buryo twizeye ko n’iriya Ntara nayo igiye kuzamuka”.

Guverineri Mureshyankwano yahawe impanuro

Munyeshyaka Vincent yabwiye Guverineri mushya w’Intara y’Amajyepfo, Marie Rose Mureshyankwano, ko agomba gukomeza kuyiteza imbere kuko umusingi aheraho uhari.

Yagize ati “Aho uhera umusingi bawukweretse, mu nzego zose, ubukungu, iterambere ry’umuturage, imibereho myiza, byose umusingi urahari. Turifuza ko wahera aho byari bigeze, intambwe yari imaze guterwa ugakora ku buryo mutera izikubye kabiri. Hari byinshi byiza byakozwe, turagira ngo muzongere mushyiremo imbaraga, ubufatanye, mukorere hamwe, iterambere ryo muri iyi Ntara rikomeze ryiyongere”.

Guverineri Munyantwari ati “Icyizere nagiriwe sinzagitetereza”

Guverineri Alphonse Munyantwari mu ijambo rye yashimiye abakozi bakoranye, avuga ko yishimira byinshi bagezeho mu guteza imbere Intara y’Amajyepfo n’abayituye, anashimangira ko icyizere yagiriwe atazagitetereza.

Yagize ati “Ndagira ngo nshimire cyane Nyakubahwa Perezida wa Repubulika y’u Rwanda, Paul Kagame, wangiriye icyizere kugira ngo nyobore iyi Ntara y’Amajyepfo mu gihe cy’imyaka itanu n’amezi icyenda. Mboneraho n’umwanya wo kongera kumushimira ko yangiriye icyizere akanshinga kuyobora Intara y’Iburengerazuba, nkaboneraho n’umwanya wo kongera guhamya ko izo nshingano n’icyizere ntazabitetereza”.

Ku rundi ruhande, Guverineri mushya w’Intara y’Amajyepfo, Marie Rose Mureshyankwano, yashimiye Umukuru w’Igihugu wamugiriye icyizere, yizeza ko azakorana umurava imirimo ashinzwe aharanira iterambere ry’abaturage.

Yashimiye mugenzi we Munyantwari we n’ikipe bakoranye, uburyo bateje imbere Intara y’Amajyepfo, avuga ko nawe azabyubakiraho.

Yagize ati “Ndabizeza ubwitange, murabona ko mfite imbaraga n’ubushake, ndabizeza imikoranire myiza igamije gushyira mu bikorwa icyerekezo cya Nyakubahwa Perezida wa Repubulika, gishyira abaturage ku isonga mu bikorwa byose bibateza imbere”.

Yakomeje ati “Niteguye kuzakira inama n’ibitekerezo byiza byanyu, kuko ni ibintu bizamfasha bikangirira akamaro, kugira ngo dufatanyije namwe turusheho kuguma ku isonga mu kwesa imihigo. Ndi Umuntu umenyereye kwakira inama, ndumva tuzafatanya abaturage b’Intara y’Amajyepfo tukabayobora neza”.

Marie Rose Mureshyankwano abaye Guverineri wa kane uyoboye Intara y’Amajyepfo, akaba yari amaze imyaka igera ku 10 ari Intumwa ya Rubanda mu Nteko Ishinga Amategeko y’u Rwanda.

Guverineri Alphonse Munyantwari ashyikiriza urufunguzo rw'ibiro by'Intara y'Amajyepfo, Guverineri Mureshyankwano Marie rose
Guverineri Munyantwari yashyikirije Guverineri Mureshyankwano inkoni y'ubuyobzi
Guverineri Munyantwari yashyikirije mugenzi we Mureshyankwano ibitabo by'intara y'Amajyepfo
Guverineri mushya w'Intara y'Amajyepfo, Mureshyankwano Marie Rose yasabye ubufatanye n'inzego zose mu gutanga umusaruro urambye
Umunyamabanga Nshingwabikorwa w'Intara y'Amajyepfo, Jeanne Izabiriza, ashyikiriza Guverineri Munyantwari impano yagenewe n'abakozi b'intara
Guverineri Munyantwari yakira impano yahawe
Umunyamabanga wa Leta muri Minisiteri y’Ubutegetsi bw’Igihugu ushinzwe iterambere ry’abaturage, Munyeshyaka Vincent yasabye abayobozi bashya gushyira mu bikorwa inshingano bahawe
Guverineri w'Intara y'Iburengerazuba, Alphonse Munyantwari ageza ijambo ku bitabiriye umuhango w'ihererekanyabubasha

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved