Minaloc yihanangirije abaturage bagarura ibibazo biba biri mu nzira zo gukemuka

Yanditswe na Uwishyaka Jean Louis
Kuya 21 Nzeri 2016 saa 10:20
Yasuwe : XX
101 58

Minisiteri y’Ubutegetsi bw’Igihugu (MINALOC), irihanangiriza abaturage bazamura ibibazo byabo nyamara byari byarahawe umurongo bigomba gukemurirwamo ariko babona izindi nzego zibasuye bakabigarura kandi biri mu nzira yo gukemuka.

Ubwo Umunyamabangawa Leta ushinzwe Amajyambere rusange n’Imibereho myiza y’abaturage muri iyi Minisiteri, Dr. Alvera Mukabaramba yakiraga ibibazo by’abaturage b’Umurenge wa Nyarugenge, mu Karere ka Bugesera ku wa Mbere tariki ya 19 Nzeri 2016, yihanangirije abaturage babona abayobozi mu nzego zo hejuru babasuye bakabagezaho ibibazo kandi inzego z’ibanze ziri kubikurikirana.

Dr Mukabaramba yihanangirije abaturage ahereye ku rugero rw’uwitwa Kayigamba Eliphase wo mu Karere ka Bugesera wabajije impamvu yangiwe kwandikwa ku butaka yateyeho ishyamba.

Kayigamba yagize ati “Nari mfite ishyamba naguze, igihe cy’ibarura amakuru avuga ko ubwo butaka ari ubwa leta. Abandi duturanye barabaruriwe […] Akarere karabizi, yewe na Minisiteri y’Ibikorwa Remezo. Mfite ishyamba mbaruweho ariko hari irindi banze kumbaruraho.’’

Ukurikije uko umuturage abyivugira, icyo kibazo cyari cyaragejejwe ku nzego zitandukanye, kuko n’Umuyobozi w’Akarere ka Bugesera Nsanzumuhire Emmanuel yabigaritseho avuga ko hari aho icyo kibazo cyari kigeze.

Meya Nsanzumuhire yasubije ko iki kibazo cyahawe umwanzuro kuva kera ko abateye amashyamba mu gihe leta yari muri gahunda yo guca ubutayu mu Bugesera, bafite uburenganzira bwo gusarura amashyamba bateye ariko badashobora kwandikwa ku butaka bari baratijwe na leta muri icyo gihe.

Dr Mukabaramba ahereye kuri icyo kibazo, yakangaye abo baturage avuga ko bafite umuco mubi udakwiye.

Ati “Ntaho twaba tujya mu gihe ibibazo byisubiramo buri uko mwasuwe n’abayobozi. Niba Abadepite baje mukabivuga n’abandi baza mukabibabwira kandi biba byahawe umurongo mbere, hari ibibazo biba bigomba gukemurirwa ku kagari cyangwa ku murenge, yewe n’umukuru w’umudugudu ariko ugasanga mwabizamuye ngo kubera ko umudepite cyangwa Minisitiri yaje. Ibyo si byiza.”

Mu cyumweru gishize Minisiteri y’Ubutegetsi bw’Igihugu yatangije igikorwa ngarukamwaka cy’ukwezi kw’imiyoborere. Icy’uyu mwaka kiri kwibanda ku gushishikariza abaturage kwigira, guhagarika gukoresha agatadowa bakitabira kugura amashanyarazi no gutura mu midugudu.

Mu Karere ka Bugesera, mu gihe cyahariwe kwakira ibibazo, abaturage barenga 40 batonze umurongo babaza ibibazo, ariko ibyo abenshi batanze byashyikirijwe inzego z’ibanze kuko zifite ubushobozi bwo kubikemura nubwo hari ibyo Dr Mukabaramba yasangaga izo nzego zarabirangaranye akazisaba kwikubita agashyi.

Abaturage batari bake bari batonze umurongo babaza ibibazo byabo
Kayigamba wabazaga impamvu atandikwa ku butaka bwe burimo ishyamba
Dr Mukabaramba agira inama abaturage ku bibazo byabo
Dr Mukabaramba yabwiye abaturage ko badakwiye kujya bagarura ibibazo biba byarakemuwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE