Kwamamaza

Minagri yasabye urubyiruko rudakozwa ibyo guhinga guhindura imyumvire

Yanditswe kuya 5-09-2016 saa 12:24' na Ezechiel Mbananabo


Umunyamabanga wa Leta muri Minisiteri y’Ubuhinzi n’Ubworozi, Tony Nsanganira yatangaje ko urubyiruko rukora umwuga w’ubuhinzi mu Rwanda rukiri rucye cyane kuko muri rusange ngo abantu bakuze cyane ari bo usanga bari mu bikorwa by’ubuhinzi n’ubworozi.

Yabigarutseho kuri iki Cyumweru ubwo Ikompanyi Nyarwanda y’ikoranabuhanga Medmasoft yamurikaga porogaramu ya mudasobwa yitwa B2B (Business-to-Business) igamije gufasha urubyiruko rukora ibikorwa by’ubuhinzi gusangira amakuru, kumenya umutungo wakoreshejwe buri munsi, gukurikirana ibikorwa byabo bya buri munsi no kumenya aho amahirwe y’ishoramari ari mu bijyanye n’ubuhinzi.

Nubwo muri buri Karere hatabura kugaragara ibikorwa by’urubyiruko bijyanye n’ubuhinzi n’ubworozi, Nsanganira yavuze ko bitaragera ku kigero gishimishije ari nayo mpamvu bakomeza kurushishikariza gukora byinshi kurushaho, by’umwihariko binyuze mu Ihuriro ry’Urubyiruko rukora ubuhinzi bugamije ubucuruzi (RYAF).

Abajijwe impamvu babona nka Minisiteri y’Ubuhinzi n’Ubworozi yaba ituma urubyiruko rutitabira cyane ibikorwa by’ubuhinzi n’ubworozi kandi ari rwo rwinshi mu gihugu, yagaragaje ko biterwa ahanini n’imyumvire ikiri ihasi.

Yagize ati “Ni imyumvire yo kumva ko ubuhinzi ari umwuga w’abantu badashobotse nk’uko kera byafatwaga nk’aho ubukora ari uwabuze ikindi akora, ariko ibikorwa byose biriho byo guhura n’urubyiriko ni ukubashishikariza gukora ubuhinzi bagaragarizwa uburyo ubw’uyu munsi butandukanye n’ubw’imyaka yashize ku buryo buri wese ashobora kubukora, cyane ko hajemo n’ikoranabuhanga. Igisabwa ni uguhindura imyumvire”

Minagri igaragaza ko kugeza ubu itazi imibare ya nyayo y’urubyiruko rukora ubuhinzi, ariko ko ihuriro ry’Urubyiruko rukora ubuhinzi bugamije ubucuruzi(RYAF) ryashinzwe muri Gicurasi uyu mwaka ritegerejweho kubahuriza hamwe bakamenyekana.

Umuyobozi wa RYAF,Hategekimana Jean Baptitse yavuze ko guhindura imitekerereze y’urubyiruko kugira ngo rwitabire ibikorwa by’ubuhinzi bisaba igihe, ariko ko bizeye ko mu myaka itanu ruzaba rwaramaze kubyitabira.

Yagize ati “Niba turi mu bikorwa byo gukangurira urubyiruko gukora ubuhinzi, ndetse n’ihuriro ryacu rikaba ririho ndakwizeza ko mu myaka itanu nta kibazo cy’urubyiruko rudakora ubuhinzi kizaba gihari ahubwo dushobora guhura n’ ikibazo kijyanye no gutunganya umusaruro wabonetse.”

Umuyobozi wa Medmasoft, Rutagengwa Hervé wasobanuye ibijyanye na porogaramu B2B (Business-to-Business, yagaragaje ko kugira ngo umuntu ayinjiremo asabawa kuba ari Umunyamuryango wa RYAF kuko ayigeraho anyuze ku rubuga rw’iri huriro.

RYAF igaragaza ko imaze kugira abanyamuryango 15 bakora ubuhinzi bugamije gucuruza, ariko ko hari n’abandi bakomeje kubisaba.

Umunyamabanga wa Leta muri Minisiteri y'Ubuhinzi n'Ubworozi, Tony Nsanganira
Umuyobozi wa Medmasoft, Rutagengwa Herve
Umuyobozi wa RYAF, Hategekimana Jean Baptiste
Abitabiriye igikorwa cyo kumurika porogaramu ya B2 B

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 26 Ugushyingo 2016
Copyright © 2009 -2014 - IGIHE Ltd - All Rights Reserved