Minagri yasabwe gukemura ibibazo bigaragara mu ikoreshwa ry’inyongeramusaruro n’ubutubuzi bw’imbuto

Yanditswe na Evariste Nsengimana
Kuya 12 Gicurasi 2018 saa 12:35
Yasuwe :
0 0

Abadepite bagize Komisiyo y’Ingengo y’Imari n’Umutungo by’Igihugu babajije Minisiteri y’Ubuhinzi n’Ubworozi (Minagri), ingamba zihamye yafatiye ibibazo byagiye bigaragara muri urwo rwego, cyane cyane mu ikoreshwa ry’inyongeramusaruro mu bice bitandukanye by’igihugu, nko kuba zitinda kugera ku bahinzi, kuba mu gihugu hose hakoreshwa ubwoko bumwe kandi ubutaka butandukanye n’ibindi.

Ubwo impande zombi zasesenguraga imbanzirizamushinga y’ingengo y’imari ya Leta ya 2018/19, ku wa Mbere Taliki ya 7 Gicurasi 2018, hagaragajwe ko urwego rw’ubuhinzi rugifite byinshi birubangamiye kandi rufatiye runini ubukungu bw’igihugu.

Imibare y’Ikigo cy’Igihugu cy’Ibarurishamibare (NISR) ya 2017 igaragaza ko abanyarwanda basaga 70% babaho batunzwe n’ubuhinzi bubumbatiye 31% by’ubukungu bw’igihugu, barimo ababukora cyangwa abakora imirimo ibushingiyeho.

Depite Uwamariya Devota yavuze ko mu buhinzi harimo ibibazo bitandukanye birimo ikijyanye n’uburyo bwo kwihutisha gahunda yo gutuburira imbuto mu gihugu ku buryo nta muhinzi wongera kuzibura.

Ati “Mwagombaga kutugaragariza uko gahunda yo gutuburira imbuto mu gihugu iteganyijwe muri iyi myaka itatu n’ingamba zihari zo gukemura ikibazo cy’abahinzi bagerwaho n’imbuto zikererewe [...] Mukagaragaza gahunda ihamye yo gufatanya na Minisiteri y’Ubucuruzi n’Inganda mu rwego rwo gufasha abahinzi kubona umusaruro ku bwinshi, kuwutunganya, kuwugeza ku isoko no kuwuha agaciro gakwiye.”

Depite Uwamariya yavuze ko ubwo we na bagenzi be basuraga Uturere, bakirijwe ibibazo byinshi mu ikoreshwa ry’inyongeramusaruro kandi ko bibangamiye abahinzi.

Ati “Hari ikibazo cy’ifumbire ikoreshwa ku kigereranyo cyo hasi, hakaba ifumbire mvaruganda y’ubwoko bumwe ikoreshwa ku butaka bufite imiterere itandukanye ariko ugasanga niyo ikoreshwa mu gihugu hose, hanyuma hakaba ubushobozi buke n’umubare muke w’abacuruza inyongeramusaruro ku mirenge, bigora abahinzi kubona imbuto n’ifumbire hafi yabo ndetse no ku gihe. Hakaba ubukererwe mu kwishyura abatumiza inyongeramusaruro mu mahanga.”

Hanagaragajwe ibindi bibangamira urwego rw’ubuhinzi birimo kuba nta buryo buhamye bwo gufasha abahinzi muri gahunda ya Twigire Muhinzi kwirinda igihombo, bidindiza itangwa rya Nkunganire.

Agerageza gusubiza bimwe muri ibyo bibazo, Minisitiri wa Minagri, Mukeshimana Gérardine, yavuze ko kuri gahunda yo gutubura imbuto, bihaye imyaka itatu kandi ko mu ngengo y’imari nabyo byashyizwemo.

Yakomeje agira ati “Mu gukemura ubutinde, ingengo y’imari twayijyanye mu Turere binajyanye n’ikibazo cy’ikoranabuhanga mu buhinzi hari gahunda twakoranye na Banki ya Kigali, tuyita Smart Nkunganire, ubu abaturage bari kwiyandikisha, tuzayitangira muri Nyakanga.”

Yunzemo ati “Hanyuma ikoreshwa ry’ifumbire ku kigero cyo hasi n’ubushobozi buke bw’abazibagezaho, icyo dukora, abazibagezaho n’amakoperative buriya barabisaba, icyo twe dukora ni ubukangurambaga, twanashyizeho itegeko ribereka ibyo bagomba kuba bujuje [...] kuba ifumbire ikoreshwa ku kigero kiri hasi byo biterwa n’imyumvire y’abaturage. Hari abumva ko ibyo basaruye byose ari urwunguko, ntibabara ibyo bashoyemo.”

Minisitiri Mukeshimana yanavuze ko abahinzi bagifite imyumvire yo kudafumbira imyaka imwe nk’ibishyimbo, amasaka n’urutoki n’ibindi biba bikeneye ubukangurambaga kugira ngo bamenye ko nabyo bifumbirwa kugira ngo birusheho gutanga umusaruro, naho ikijyanye n’ifumbire ikoreshwa mu butaka bitajyanye, avuga ko atari byo biba byapimwe, ahubwo ari ibyo abantu bakunze kwishyiramo.

Ikibazo cyo gutuburira imbuto mu gihugu, cyanagarutsweho mu mwiherero w’abayobozi bakuru b’igihugu wa 15, aho umwanzuro wa munani wawo ugaruka ku ‘kwihutisha gahunda yo gutuburira imbuto mu gihugu ku buryo mu gihe cy’imyaka itatu, uhereye muri uyu mwaka wa 2018, igihugu cyaba cyihagije mu mbuto zikenewe, kandi hagashyirwa ingufu mu gukorera ifumbire imbere mu gihugu.’

Si ubwa mbere hagaragajwe ibibazo mu rwego rw’ubuhinzi, by’umwihariko ku ikoreshwa ry’inyongeramusaruro nko mu bushakashatsi bwa NISR bwa 2015, bwerekanye ko hakiri icyuho gikomeye mu buhinzi gishingiye ku ikoreshwa ry’inyongeramusaruro.

Bwagaragaje ko abahinzi bo mu Rwanda bagikoresha cyane imbuto gakondo kuruta izatubuwe. Mu bihembwe bitatu by’ihinga by’umwaka ushize, byagaragaye ko abahinzi bakoresheje imbuto gakondo ku kigero cya 84% na 88%; ibintu Minagri yemera ikavuga ko bishingiye ku guhenda kw’izitubuye kuko inyinshi zivanwa mu mahanga.

Abadepite bagize Komisiyo y’Ingengo y’Imari n’Umutungo by’Igihugu bumva ibisobanuro bya Minisitiri w'Ubuhinzi
Minisitiri Mukeshimana yavuze ko abahinzi bagifite imyumvire yo kudafumbira imyaka imwe nk’ibishyimbo, amasaka n’urutoki
Depite Uwamariya Devota yavuze ko mu buhinzi harimo ibibazo bitandukanye birimo ikijyanye n’uburyo bwo kwihutisha gahunda yo gutuburira imbuto mu gihugu ku buryo nta muhinzi wongera kuzibura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza