Kwamamaza

Minagri yahagurukiye guca inyongeramusaruro zijya ku isoko zitujuje ubuziranenge

Yanditswe kuya 20-09-2016 saa 11:13' na Kwizera Prudence


COMMENTS: 9

Hashize iminsi abahinzi mu bice bitandukanye by’igihugu binubira kugura inyongeramusaruro zirimo ifumbire n’imiti ikoreshwa mu buhinzi, bavuga ko zica imyaka yabo ndetse ntizitange umusaruro uhagije kubera ikibazo cyo kutuzuza ubuziranenge.

Minisiteri y’Ubuhinzi n’Ubworozi (Minagri) yagarutse kuri iki kibazo muri gahunda yayo yo kuzenguruka uturere tw’igihugu isobanura ibikubiye mu Iteka rya Minisitiri rigena amabwiriza agenga imiti n’ifumbire mvaruganda bicuruzwa ku isoko bitujuje ubuziranenge.

Kuri uyu wa Mbere, mu kiganiro abakozi ba Minagri bagiranye n’abahagarariye amakoperative y’ubuhinzi bo mu turere twa Huye na Gisagara, bagaragaje ko ikibazo cyo gukoresha inyongeramusaruro zitujuje ubuziranenge kibatera igihombo gikomeye mu buhinzi bwabo.

Jean Damascène Semwiza, umwe mu bahinzi bo mu Karere ka Huye ati “Hari ubwo tugura ifumbire cyangwa imiti yica ubusurira cyangwa indi dukenera ikoreshwa mu buhinzi, ugasanga ntikora. Turifuza ko mwadusobanurira ikibitera cyangwa mukazakora ubushakashatsi hakamenyekana impamvu, kuko bidutera igihombo”.

Jacqueline Mukagatari we yasabye Minisiteri y’ubuhinzi gukora ubushakashatsi bwimbitse kuri iki kibazo.

Ati "Byaba byiza hakozwe igenzura kuri icyo kibazo, kuko iyo umuhinzi umuhaye ibintu nk’ibyo bidakora, agutakariza icyizere kandi nta ruhare wabigizemo. Twifuza ko Minagri yaduha igisubizo."

Iki kibazo kandi cyongeye kugarukwaho n’abafatanyabikorwa mu buhinzi bo mu Karere ka Gisagara, ubwo bagiranaga ibiganiro na Minagri kuri uyu wa 19 Nzeri 2016.

Mu gusobanura iby’iki kibazo, Minagri yagaragaje ko biterwa n’akavuyo kaba mu micururize y’inyongeramusaruro, ariko bigiye gukemuka kuko byitaweho mu Iteka rya Minisitiri No 002 ryo kuwa 14 Nyakanga 2016 rigena amabwiriza agenga imiti n’ifumbire mvaruganda ryatangajwe mu igazeti ya Leta ya Repubulika y’u Rwanda kuwa 25 Nyakanga 2016.

Umukozi muri Minagri, Dr Emmanuel Ngomiraronka yasobanuye ko iteka rya Minisitiri rigaragaza urutonde rw’inyongeramusaruro zemewe kwinjira mu gihugu zigacuruzwa n’izitemewe.

Yagize ati “Iri teka rya Minisitiri rije gukemura iicyo kibazo cy’ibintu bibujijwe kwinjira mu gihugu ariko bikaba byajyaga byinjira mu buryo bwa magendu, urumva noneho ko turishingiyeho byoroshye ko iyo miti cyangwa amafumbire bitemewe bigomba guhita bivanwa ku isoko bigashyingurwa by’agateganyo cyangwa burundu”.

Iyi nama yahuje abayobozi b’inzego z’ibanze, abahagarariye amakoperative y’ubuhinzi, abacuruza inyongeramusaruro yasojwe biyemeje gutanga umusanzu wabo mu guteza imbere ubuhinzi hakoreshwa ifumbire n’imiti byemewe n’amategeko kandi byujuje ubuziranenge.

Dr Ngomiraronka avuga ko intego nyamukuru yo kuganira n’abafatanyabikorwa mu buhinzi ari ukugira ngo abacuruza inyongeramusaruro babikore kinyamwuga nta kavuyo kabirimo. Yasabye abayobozi ku nzego z’ibanze abahinzi n’abacuruza inyongeramusaruro, gufatanya bagaca ku isoko ifumbire n’imiti bikenerwa mu buhinzi bitemewe n’amategeko.

Abagura ifumbire n’imiti ikenerwa mu buhinzi basabwe kugira amakenga bakabanza gushishoza kugira ngo batagura ibitujuje ubuziranenge cyangwa ibitemewe n’amategeko ndetse no gutanga amakuru ku nzego z’ubuyobozi igihe babonye hari ubicuruzwa bitujuje ubuziranenge cyangwa byararengeje igihe.

Gucuruza inyongeramusaruro bisaba iki?

Minagri ivuga ko umuntu wese utumiza cyangwa wohereza inyongeramusaruro z’ubuhinzi mu mahanga agomba kuba afite impamyabumenyi y’icyiciro cya kabiri cya Kaminuza mu bijyanye n’ibinyabuzima n’ubutabire (Biochemistry) cyangwa ubumenyi mu by’ubuhinzi (Agriculture Sciences), bitaba ibyo akaba afite umukozi ubyujuje.

Ikindi umucuruzi w’inyongeramusaruro agomba kugaragaza inzu yaho ibicuruzwa bye bibikwa ikandikwa kugira ngo harebwe ko yujuje ibisabwa.

Naho abacuruza inyongeramusaruro mu buryo busanzwe mu gihugu bo icyo basabwa ni ukuba bafite impamyabumenyi y’amashuri yisumbuye mu bijyanye n’ibinyabuzima n’ubutabire cyangwa ubumenyi mu by’ubuhinzi, cyangwa bafite umukozi ubyujuje, kandi bakagaragaza n’inzu bazabikamo ibicuruzwa.

Dr Ngomiraronka yasobanuye ko ikigamijwe ari ukubaka ubunyamwuga mu bucuruzi bw’inyongeramusaruro.

Ati “Ntabwo umuntu yacuruza umuti ukoreshwa mu buhinzi ngo usange nawe mu by’ukuri atabijijukiwe. Ni ngombwa ko aba abizi ku buryo asobanurira umuhinzi uburyo umuti awukoresha”.

Kubona uruhushya rwo gucuruza inyongeramusaruro bisaba amafaranga y’u Rwanda ibihumbi 50, rukamara imyaka itanu, hakiyongeraho n’andi ibihumbi 15 yo kwandikisha ububiko (inzu) ahazabikwa ibyo bicuruzwa.

Umukozi muri Minagri, Dr Emmanuel Ngomiraronka aganira n'itangazamakuru
Abafatanyabikorwa mu buhinzi bo mu Karere ka Huye batanga ibitekerezo
Abafatanyabikorwa mu buhinzi bo muri Gisagara mu nama na Minagri

prudence@igihe.rw


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: info@igihe.com, marketing@igihe.com

Website Developped by

Uru Rubuga Ruheruka Gushyirwaho Amakuru Saturday 7 Mutarama 2017
Copyright © 2009 -2014 - IGIHE Ltd - All Rights Reserved