Uwizeyimana yasabye impinduka mu mikorere y’amadini n’umuco bibangamiye Abanyarwanda

Yanditswe na Evariste Nsengimana
Kuya 6 Ukuboza 2018 saa 10:19
Yasuwe :
0 0

Umunyamabanga wa Leta muri Minisiteri y’Ubutabera ushinzwe Itegeko Nshinga n’andi Mategeko, Uwizeyimana Evode, yagaragaje ko Abanyarwanda batatuza mu gihe abanyamadini n’abashinzwe umuco batajyana n’umuvuduko w’Isi.

Ni ubutumwa yahaye abayobozi b’inzego za Leta n’abafatanyabikorwa bayo mu nama nyunguranabitekerezo yabereye mu Nteko Ishinga Amategeko, Umutwe w’Abadepite ku wa 6 Ukuboza 2018.

Yari igamije ‘Guhuza imbaraga mu gushaka ingamba zo guhangana n’ibibazo bibangamiye umuryango Nyarwanda no kureba uruhare rwa buri rwego mu kwihutisha iterambere rirambye rishingiye ku muryango utekanye.’

Mu bibangamiye umudendezo w’umuryango Nyarwanda hagaragajwe ibibazo birimo amakimbirane, gutandukana kw’abashakanye, inda ziterwa abangavu, ikoreshwa ry’ibiyobyabwenge, gukubita no gukomeretsa n’ibindi.

Minisitiri wa Siporo n’Umuco, Nyirasafari Espérance, yavuze ko ibibangamiye umutuzo, bishingiye ku kuba Abanyarwanda bari guta indangagaciro zo gukunda igihugu n’umuco gakondo ubaranga.

Ikindi cyagarutsweho ni icy’imyumvire hagati y’urubyiruko n’abakuze itajyanye n’umuvuduko Isi ifite.

Uwizeyimana yagize ati “Hari ibyo nitegereza nkasanga bifitanye isano n’amakimbirane ashingiye ku myaka. Ibyo muzehe Tito yita indangagaciro n’icyo nita indangagaciro nkabona ntibisa. Niba bidasa turimo kubaka igihugu kimwe, dutahiriza ku mugozi umwe, turabigenza gute?”

“Umuryango Minisitiri w’Uburinganire n’Iterambere ry’Umuryango n’uwa Siporo n’Umuco bavuga (ugendeye ku ndangagaciro n’umuco) sinzi niba uhuye n’uwo turimo.”

Ni ibibazo biterwa no gushaka ubuzima kuko usanga umugore wari mutima w’urugo kera, yarihebeye akazi. Bituma batita ku bana ku buryo birirwa mu bikoresho by’ikoranabuhanga bibaganisha mu bibangamira umutuzo nka film z’urukozasoni, ibiyobyabwenge, inda ziterwa abangavu n’ibindi.

Abanyamadini, gatanya, kuboneza urubyaro bigoye guhuzwa

Uwizeyimana yavuze ko hakiri abantu bihambiranaho bishobora kubangamira umutuzo w’Abanyarwanda kandi amategeko ateganya uburyo bwo gutandukana ku bashakanye batabanye neza nk’uburyo bwo kurinda amakimbirane.

Ati “Usanga hari ukunyuranya hagati y’ingamba Leta ifata n’imyemerere y’abantu bamwe barimo na ba twebwe. Umuntu yaba minisitiri aho kugira ngo ashyire mu bikorwa gahunda ya Leta ku kibazo runaka, agashyira mu bikorwa imyemerere ya Bibiliya.”

Yatanze urugero kuri gahunda yo kuboneza urubyaro ko, usanga nka leta ivuga ko abantu bakwiye kubyara abo bashoboye kurera, hakaza undi usoma Bibiliya akakubwira ngo mubyare mwororoke nk’umusenyi wo ku Nyanja.

Yabwiye abanyamadini ati “Ibi bintu mu gihe cyabyo, hari Adamu na Eva gusa Isi ikeneye abantu, ubu uragarura uwo murongo wa Bibiliya muri iki gihe ugasanga bihura? Ni ibintu bikeneye gutekerezwa mu buryo bwagutse.”

Uwizeyimana yanavuze ku banga kwigisha abana gukoresha agakingirizo. Ati “Uravuga agakingirizo, umuntu akikoza mu bicu, ibyo ntabwo Kiliziya cyangwa pasiteri runaka babyemera.”

Yasobanuye ko ‘Iyo umwana atangiye kwereka ababyeyi uwo bakundana aba yatangiye kwishora mu mibonano mpuzabitsina. Mu bihugu byateye imbere baba baramuhaye amakuru ahagije ku buzima bw’imyororokere, iyo bitabaye ibyo bishakira amakuru ku ikoranabuhanga.’

Umugenzuzi mukuru w’Iyubahirizwa ry’Ihame ry’Uburinganire n’Ubwuzuzanye mu Rwanda, Rwabuhihi Rose, yavuze ko ‘Ibitekerezo, imyumvire byacu Abanyarwanda, ntibihinduka bijyanye n’aho isi igana.’

Ubushakashatsi bw’Urwego rw’Imiyoborere, RGB, bwa 2018, bwerekanye ko uretse Akarere ka Nyamasheke kari kuri 49,20%, amakimbirane yo mu muryango mu tundi turere ari hejuru ya 50%.

Bunerekana ko ‘Abaturage 85% bavuze ko aho baba hari ikibazo cy’inda zitateguwe naho gutandukana kw’abashakanye byagaragajwe n’abagera kuri 54,8% mu gihe 39,1% bagaragaje ikibazo cy’inzererezi.’

Iyi nama nyunguranabitekerezo yari igamije guhuza imbaraga mu gushaka ingamba zo guhangana n’ibibazo bibangamiye umuryango Nyarwanda
Uwizeyimana Evode yagaragaje ko Abanyarwanda batatuza mu gihe abanyamadini n’abashinzwe umuco batajyana n’umuvuduko w’Isi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza