Miliyari umunani zigiye kwifashishwa havugururwa Hotel Umubano

Yanditswe na Ferdinand Maniraguha
Kuya 16 Mata 2018 saa 09:09
Yasuwe :
0 0

Marasa Africa, Ishami rya Sosiyete Mpuzamahanga Madhvani Group ryatangiye kuvugurura hoteli Marasa Umubano, igikorwa kizarangira gitwaye miliyari 8.5 z’amafaranga y’u Rwanda.

Marasa Africa yaguze na Guverinoma y’u Rwanda Hotel Umubano muri Mata 2017 nyuma y’uko ivuye mu ntoki za Libya yari ifitemo imigabane myinshi.

Umuyobozi ushinzwe kumenyekanisha ibikorwa muri Madhvani Group, Parasuramn Eswar, yabwiye The East African ko Marasa Umubano Hotel izaba yamaze kuvugururwa mu mezi atandatu ari imbere.

Ati “Turashaka kuba twarangije kuvugurura inyuma hayo mu mezi atandatu. Kuyivugurura bizakorwa mu byiciro ku buryo bitazabangamira imikorere ya hotel n’iyo gusana.”

Uretse uruhande rw’imbere rureba mu muhanda, hazanavugururwa igice cyayo cyo hasi, igikoni, ibyumba by’inama, akabari na restaurant, urwinjiriro, ibyumba byo kuraramo n’ibindi.

Sosiyete Madhvani irashaka no kubaka indi nyubako izaba irimo inzu y’imyitozo ngororamubiri, aho kunanurira no kuruhura umubiri (massage, Sauna) na restaurant iteka indyo y’Abayapani.

U Rwanda rushyize imbere ubukerarugendo bushamikiye ku nama mpuzamahanga kandi amahoteli agezweho ni kimwe mu bigenderwaho ngo izo nama zibere mu gihugu.

Mu mwaka ushize u Rwanda rwakiriye inama 169 zitabiriwe n’abantu 28 306. Uyu mwaka hiteguwe inama nibura 123 aho byitezwe ko imwe izitabirwa n’abagera kuri 500. Byitezwe ko izo nama zizinjiza miliyari 63 Frw.

Hotel Umubano yubatswe ku bwa Col. Muammar Gaddafi, wari Perezida wa Libya. Nyuma y’Urupfu rwe, Leta y’icyo gihugu yasezeranyije iy’u Rwanda ko izakomeza kuyishoramo imari.

Leta ya Libya yemeye kuyivugurura, ikayigeza ku rwego rw’inyenyeri eshanu, ariko ntiyabikora uko yari yabyiyemeje ndetse hashize imyaka isaga icumi hari imishyikirano, ariko biza kunanirana hitabazwa inkiko.

Nyuma yo kunanirwa kumvikana Leta y’u Rwanda yareze iya Libya, aho ikirego mu rukiko cyavugaga ko Umunyamigabane muto (Rwanda) abangamiwe n’Umunyamigabane munini (Libya).

Ibyo byatumye abahagarariye inyungu za Libya bavuga ko ibyo basabwa bazabikora ariko ntibabikora.

Urukiko rwaje kwemeza ko haseswa sosiyete SOPROTEL, Leta y’u Rwanda yari ifitemo imigabane ingana na 40% n’aho iya Libya ikagira 60% hanyuma Hotel Umubano ikagurishwa.

Imirimo yo kubaka Hotel Umubano yatangijwe na SOPROTEL mu 1977 itangira gukora mu 1979 yitwa Hotel Umubano Meridien kugeza muri Mata 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza