Kwamamaza

Miliyari 52 zizifashishwa mu kongera umusaruro w’amata mu Rwanda

Yanditswe kuya 18-09-2016 saa 13:41' na Niyonsenga Schadrack


Minisiteri y’Ubuhinzi n’Ubworozi iratangaza ko amafaranga agera kuri Miliyari 52 z’amafaranga y’u Rwanda azakoreshwa mu mushinga uzatangira muri Mutarama 2017 wo kubaka amakaragiro y’amata 100,000 mu Rwanda.

Umuyobozi Mukuru Ushinzwe Ubworozi muri Minisiteri y’Ubuhinzi n’Ubworozi, Dr. Rutagwenda Théogène, yatangarije The New Times ko uyu mushinga uzamara imyaka itanu watewe inkunga n’Ikigega Mpuzamahanga gishinzwe guteza imbere ubuhinzi (IFAD) ukazafasha aborozi kubona amakaragiro meza hafi yabo, mu kongera ingano y’umukamo ku nka, gukemura ikibazo cyo kwita ku isuku y’amata ndetse no kuyageza ku isoko.

Dr. Rutagwenda yagize ati “Umushinga ugamije gukemura ikibazo cy’ibura ry’ubwatsi, amazi no kugabanya igihombo aborozi baterwaga n’umusaruro w’amata wagabanukaga mu gihe cy’izuba.”

Uyu muyobozi yanemeje ko uyu mushinga uzafasha mu kunoza uburyo bwo gutwara amata n’aho ahurizwa ndetse no kwita ku nganda ziyatunganya.

Uyu mushinga uzakorerwa mu turere cumi na tubiri tw’igihugu ni ukuvuga uturere dutatu muri buri ntara. Muri utwo turere harimo: Nyagatare, Rwamagana, Kayonza, Gicumbi, Burera, Musanze, Nyabihu, Rubavu, Rutsiro, Nyanza, Huye na Ruhango.

Dr. Rutagwenda avuga ko kugeza ubu mu gihugu habarurwa aborozi bagera kuri miliyoni n’ibihumbi magana ane, muri abo bose 54% nibo bafite umusaruro uhagize, 40% bari hagati naho 6% bo bafite umusaruro muke cyane
Icyakora uyu muyobozi yemeje ko umusaruro w’amata mu Rwanda wazamutse ukava kuri tone 7000 mu mwaka wa 1994 ukagera kuri tone 710000 uyu munsi.

Ikigo cy’Igihugu gishinzwe ubuhinzi kivuga ko mu Rwanda hari inka zitanga umukamo uri hagati ya litiro 25 na 30 n’ubwo hari n’izindi zo mu borozi batabigize umwuga zishobora gutanga litiro eshanu cyangwa ntizigereho ku munsi. Ibi ngo bituma impuzandengo igaragaza ko inka ikamwa yo mu Rwanda itanga litiro 8 ku munsi.

Gahiga Gashumba ukuriye Ihuriro ry’Aborozi mu Rwanda yasabye bagenzi be guhindura imikorere kuko ngo kuri ubu ubutaka bwo kororeraho bwabaye buke.

Dr. Rutagwenda, yavuze ko mu Rwanda habarurwa amakusanyirizo 106 gusa, aya ngo akaba ari make cyane. Gashumba we avuga ko n’aya makusanyirizo ahari adafite imikorere myiza kuko hakiri ikibazo cy’amazi n’umuriro w’amashanayrazi kandi ngo ibi byose biba bikenewe ku ikaragiro.

Uyu muyobozi avuga ko ikibazo cy’umuriro ku makaragiro cyo kirushijeho gukara kuko hari aho bakoresha imashini zitanga umuriro zikabahenda cyane. Izi mashini kandi ngo zitinda gukonjesha amata bikaba byakwangiza ubuziranenge bwayo kuko zimara amasaha ane cyangwa atanu, uyu ukaba ngo ari umwanya munini cyane mu ikonjeshwa ry’amata.

Icyakora Dr. Rutagwenda yamaze impungenge Gashumba atangaza ko iyi gahunda y’imyaka itanu izanafasha mu kongerera ubushobozi amakaragiro.

Ikibazo cy’imihanda mibi mu duce tumwe na tumwe nka Gishwati n’ahandi itorohera abagemura amata ndetse n’ibikoresho bitabugenewe cyane cyane nk’aho usanga bayagemura mu majerekani nabyo cyagarutsweho nk’imbogamizi igomba kwitabwaho n’iyi gahunda mu rwego rwo kongera amata mu gihugu.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved