Kwamamaza

Miliyari 5.5 zizakoreshwa mu matora ya Perezida mu 2017

Yanditswe kuya 29-08-2016 saa 08:26' na Cyprien Niyomwungeri


Guverinoma y’u Rwanda izashora abarirwa muri miliyari 5.5 z’amafaranga y’u Rwanda mu bikorwa by’amatora y’Umukuru w’Igihugu ateganyijwe muri Kanama umwaka utaha.

Ugereranyije n’ayakoreshejwe mu matora ya 2010, aya mafaranga yagabanutseho miliyoni 500 ariko na none yikuba birenze kabiri ku yakoreshejwe mu ya 2003 kuko yanganaga na miliyari 2.3 z’amafaranga y’u Rwanda.

Mu kiganiro kihariye na The New Times, Umunyamabanga Nshingwabikorwa wa Komisiyo y’Igihugu y’Amatora, Charles Munyaneza, yatangaje ko amafaranga azakoreshwa mu matora yagabanutse bitewe n’uburyo bw’ikoranabuhanga buzakoreshwa, abakorera bushake bazongera kwifashishwa no kutongera kugura ibikoresho by’amatora kuko hazifashishwa ibisanzwe.

Yagize ati “Muri 2010, ingengo y’imari yari hafi miliyari zirindwi z’amafaranga y’u Rwanda. Ntabwo tugura buri kimwe kuko nk’urugero dukoresha udusanduku tw’amatora twakoresheje mu matora y’Abadepite ya 2008.”

Akomeza avuga ko Guverinoma izatanga nibura 95% by’ingengo y’imari y’amatora. Aya mafaranga azafasha Abanyarwanda kwitegura amatora yaba ab’imbere mu gihugu no hanze yacyo [Diaspora].

Yagize ati “Dufatanyije n’abandi bafatanyabikorwa mu matora, turimo gutegura inyigisho ku matora n’imfashanyigisho zizakoreshwa. Turategura amahugurwa y’ibyiciro byihariye nk’abagore, urubyiruko, abafite ubumuga, abakora umwuga w’itangazamakuru, inzego z’umutekano, abahagarariye sosiyete sivile, indorerezi z’amatora, kugirango bamenyeshwe uruhare rwabo rwihariye mu migendekere y’amatora.”

Munyaneza wari mu mwiherero n’abayobozi ndetse n’abakomiseri ba Komisiyo ishinzwe amatora, yongeyeho ko barimo guhura nk’abakozi ba Komisiyo n’abandi bireba kugirango banagene ingengabihe y’amatora.

Yagize ati “Itariki y’amatora ntabwo irashyirwaho, nk’ibisanzwe itangazwa mu iteka rya Perezida wa Repubulika kandi ntirirasohoka, gusa turateganya ko uyu mwiherero tuzatanga itariki tukazayishyikiriza Inama y’Abaminisitiri kugirango iyemeze. Turizera ko izamenyekana mbere y’uko uyu mwaka urangira.”

Kugeza ubu abagera kuri miliyoni 6.6 bamaze kwiyandikisha kuri lisiti y’itora, bakaba bariyongereyeho miliyoni 1.4 ugereranyije n’abatoye muri 2010 mu matora ya Perezida. Muri 2003 hatoye abagera kuri miliyoni 3.9.

Munyaneza avuga ko lisiti y’itora isanzwe izavugururwa mu Ugushyingo uyu mwaka no muri Gicurasi 2017, bityo muri Nyakanga hagati lisiti ya nyuma y’itora itangazwe.

Nkuko amategeko agenga amatora abiteganya, biramutse byemejwe ko amatora ya Perezida azaba muri Kanama 2017, abakandida bazamenyekana mbere y’uko ibikorwa byo kwiyamamaza bitangira muri Nyakanga 2017.

Abanyarwanda bagera kuri miliyoni 6.6 bamaze kwiyandikisha kuri lisiti y’itora

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved