Kwamamaza

MIDIMAR na UNHCR mu mugambi wo gucutsa impunzi zicumbikiwe mu Rwanda

Yanditswe kuya 26-09-2016 saa 15:05' na Niyonsenga Schadrack


Minisiteri ishinzwe gukumira ibiza no gucyura impunzi mu Rwanda (MIDIMAR) ndetse n’ishami ry’umuryango w’Abibumbye ryita ku mpunzi (UNHCR), batangije gahunda yo gufasha impunzi kwibeshaho zidategereje inkunga yatangwaga n’imiryango nterankunga itandukanye.

Minisiteri y’Imicungire y’Ibiza no gucyura impunzi yavuze ko impunzi zigomba kuba abantu nk’abandi cyane ko n’insanganyamatsiko y’umunsi mpuzamahanga w’impunzi muri uyu mwaka ari byo yavugaga ko impunzi ari abantu nk’abandi bashoboye kwibeshaho aho gutegereza nko imiryango ntera nkunga irabagemurira.

Minisitiri Seraphine Mukantabana yagize ati “Bazahabwa ubushobozi butuma bashobora guha umurongo ubuzima bwabo aho gutegereza inkunga kuri UNHCR buri kwezi.”

Abakuru b’ibihugu ku Isi ubwo bari mu nama y’Inteko rusange y’Umuryango w’Abibumbye, bagarutse ku kibazo cy’impunzi basaba ibihugu kwiyemeza kugira icyo bikora mu gukemura ikibazo cy’impunzi zishakirwa ibisubizo birambye aho gukomeza kuba mu nkambi z’impunzi.

U Rwanda ni urwa mbere rwadukanye iyi gahunda yo guha impunzi uburenganzira bwo gukora imirimo izibeshaho nk’abandi baturage.

Minisitiri Mukantabana ati “Dufashe iya mbere ariko ntabwo turi twenyine, ni gahunda bigaragara ko iri gushakwa kugira ngo ikorwe mu mpunzi hose ku Isi. Kugira ngo iyi gahunda ikunde ni uko uba ufite ubuyobozi buhamye, ubuyobozi bwacu burahamye, duhereye rero no ku buryo gahunda yo kwigira ari yo ntero ku Rwanda, ntabwo twavuga ngo reka tureke abandi bazabikore, turavuga ngo reka tubikore nibiba ngombwa tuzereke n’abahandi inzira.”

Mu nama yayobowe na Perezida wa Amerika Barack Obama yigaga ku mpunzi (Obama refugee Summit), u Rwanda rwiyemeje gushyiraho ingamba zinoze kugira ngo impunzi zirusheho kwigira, kuzifungurira amasoko, kwigishwa nk’abandi bene gihugu, kuzorohereza kubona uko zajya mu mirimo ibyara inyungu no kwihangira imirimo. U Rwanda kandi rwiyemejo ko impunzi zizashyirwa muri gahunda yo kugenerwa ubwishingizi mu buzima.

Ntabwo iyi gahunda izatuma impunzi zihinduka abenegihugu

Minisitiri Mukantabana yemeza ko guteza imbere impunzi ari nko guteza imbere u Rwanda, ati “Ni impunzi, ariko n’impunzi ni abaturage. Mu by’ukuri u Rwanda ruteye imbere ariko tukagira abantu ibihumbi 163 basigaye inyuma bishobora natwe kudusubiza inyuma. Niba rero tuvuga tuti ’umunyarwanda nazamuke n’umuturarwanda wese nazamuke.”

Yakomeje agira ati"Kora wigire turashaka ngo no mu mpunzi ihagere ariko si ukuvuga ngo twabahaye ubwenegihugu, icyo twabahaye ni uburenganzira bwo kuba abantu nkatwe, kugira uburenganzira nk’uko n’umunyarwanda abufite, aho kugira ngo babe umutwaro ku gihugu ahubwo babe amahirwe ku gihugu cyacu.”

Aho ntibyatuma impunzi zishimira ubuhunzi ntizifuze gutaha?

Kuri iki MIDIMAR ivuga ko ibi bidashoboka, ikabishingira ku kuba nta muntu udakunda igihugu cyamubyaye. Aha Minisitiri Mukantabana yatanze urugero ku banyarwanda babaye imyaka myinshi mu buhunzi ariko igihe cyagera bagataha.

Icyakora yemeza ko uwari impunzi aramutse yiyumvisemo gukunda u Rwanda ariko atari mu buryo bwo kurubera umutwaro ahubwo ari mu buryo bwo kuruteza imbere, ngo ashobora kwaka ubwenegihugu agatura nk’umunyarwanda.

MIDIMAR ivuga ko mu nkambi z’impunzi habaga harimo abantu bafite ubumenyi butandukanye nyamara batabyaza umusaruro bategereje imfashanyo, ariko ubu ngo bagiye kuba igisubizo ku gihugu na bo ubwabo.

Ati“Ubu turavuga ngo ingufu zibarimo, ubwenge bafite be kubipfusha ubusa ahubwo babizane bidufashe kubaka igihugu cyabakiriye.”

Uyu muyobozi kandi yanemeje ko ibi bidakwiye gutera impungenge abanyarwanda bakwibaza ko birarushaho kongera ikibazo cy’ubushomeri.

Biteganyijwe ko iyi gahunda itangiranye amafaranga miliyoni 20 z’amadolari ya Amerika, akazatangwa na UNHCR, aho izajya itanga miliyoni 5 buri mwaka kugeza muri 2020.

Amafaranga yari asanzwe atunga impunzi mu buryo bw’ubufasha zahabwaga, ni yo azaherwaho mu gushyira amu bikorwa iyi gahunda.

Saber Azam uhagarariye UNHCR mu Rwanda yemeza ko kwemerera impunzi zo mu Rwanda kujya mu bikorwa bibyara amafaranga zigakora imirimo nk’iyo n’abandi baturage bakora aribwo buryo bushoboka ku mpunzi zicumbikiwe n’igihugu nk’u Rwanda.

Minisitiri Mukantabana (uwa gatatu ibumoso) n'abayobozi muri UNHCR batangiza iyi gahunda
Azam Saber, uhagarariye UNHCR mu Rwanda
Minisitiri Mukantabana na Azam Saber, Uhagarariye UNHCR mu Rwanda
Abayobozi ba MIDIMAR na UNHCR mu ifoto rusange

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved