00:00:00 IGIHE NETWORK KN KINYARWANDA EN ENGLISH FR FRANCAIS

Meya Kayitare yasobanuye impamvu abacuruzi b’i Muhanga basabwe gufunga saa Saba

Yanditswe na Prudence Kwizera
Kuya 30 Nyakanga 2021 saa 03:44
Yasuwe :
0 0

Hagamijwe gukumira ikwirakwira ry’icyorezo cya Covid-19 mu Karare ka Muhanga, imirenge irindwi yashyizwe muri gahunda ya Guma mu Rugo ndetse n’abemerewe gucuruza muri ibi bihe basabwa kujya bafunga saa Saba z’amanywa.

Kuva tariki ya 28 Nyakanga 2021 imirenge ya Shogwe, Nyamabuye, Cyeza, Muhanga, Mushishiro, Rugendabari na Kiyumba mu Karere ka Muhanga iri muri gahunda ya Guma mu Rugo.

Umuyobozi w’Akarere ka Muhanga, Kayitare Jacqueline, avuga ko ari umwanzuro wafashwe hamaze gupimwa abantu benshi bagasanga baranduye Covid-19.

Ati “Twafataga abantu 100 ni bo twapimaga muri buri kagari, ni ukuvuga ngo ni abantu 6300 twapimye hanyuma biza kugaragara ko hari imirenge yagaragayemo ubwandu buri ku gipimo cyo hejuru.”

Yavuze ko mu isesengura bakoze basanze myinshi muri iyo mirenge yegeranye n’Akarere ka Kamonyi kamaze iminsi muri Guma mu Rugo bitewe n’ubwandu bwa Covid-19 buri hejuru.

N’ubwo imirenge irindwi ari yo iri muri Guma mu Rugo, Kayitare yavuze ko itanu isigaye nayo ibintu bitameze neza ku buryo abayituye bakwirara kuko ibipimo byahafashwe byerekana ko hari abanduye batari bake.

Yasabye abari muri Guma mu Rugo kubahiriza amabwiriza yose ndetse n’abatayirimo bakirinda ingendo zitari ngombwa kugira ngo iminsi yateganyijwe izarangire umusaruro wabonetse nta bwandu bwinshi bihari, bitume ingamba zoroshywa.

Ati “Twashyizeho itsinda ry’abantu 10 muri buri mudugudu kugira ngo barebe ubuzima bw’umudugudu muri iyi minsi 14 ya Guma mu Rugo.”

Icya mbere bitaho ni ugukurikirana abanduye Covid-19 kugira ngo badasohoka bakaba bakwanduza abandi, bakareba n’abafite ibibazo bikomoka kuri iki cyorezo no kuri Guma mu Rugo kugira ngo bishakirwe ibisubizo.

Ku bijyanye no guha ibiribwa abatabifite muri iki gihe bitewe n’impamvu zitandukanye, Kayitare yavuze ko ubuyobozi buri kubitegura kugira ngo hatazagira uwicwa n’inzara.

Abemerewe gucuruza basabwe gufunga saa Saba

Nyuma yo kubona ko hari abasohoka bakabeshya ko bagiye guhaha kandi bigiriye mu bindi, ubuyobozi bw’Akarere ka Muhanga bwashyizeho amasaha yo kujya guhaha kugira ngo abajya kwitemberera bakumirwe.

Ni mu gihe ahandi hose mu gihugu abemerewe gucuruza basabwa gufungwa saa Kumi n’imwe z’Umugoroba.

Kayitare ati “Aya mabwiriza turi kugenderaho yemera ko ubucuruzi bw’ibiribwa bukorwa. Ibi rero byahaye icyuho abaturage bacu ku buryo amasaha ayo ari yo yose umuturage afite impamvu yo kuvuga ngo ‘ngiye guhaha’ ibyo bigatuma mu by’ukuri tubona bitazatanga umusaruro utegerejwe muri iyi minsi 14 twahawe kubera ko abaturage bari kubona impamvu iboroheye yo gusohoka.”

“Hanyuma dusanga kugira ngo umuturage adasohoka ari uko dushyiraho amasaha yo guhaha tukayamenyesha abaturage bakaba bahaha, hanyuma bikagira igihe tubona undi muturage ushaka kugenda ari kwica amabwiriza. Twabonye uburyo bwiza ari uko duhera saa Kumi za mu Gitondo kugera saa Saba z’Amanywa.”

Asobanura ko nyuma ya saa Saba abayobozi ku bufatanye n’Abajyanama b’Ubuzima n’abandi bafatanyabikorwa bakora ibikorwa byo gusura abarwayi ba Covid-19 no kubakurikirana kugira ngo abafite ibibazo bikemurwe.

Asanga byaba bibabaje iyi minsi 14 ya Guma mu Rugo ibapfiriye ubusa kubera imyitware mibi ya bamwe, ntitange umusaruro bakaba bakongezwa indi.

Bamwe mu bakora ubucuruzi mu Karere ka Muhanga basaba ko isaha ya saa Saba yo gufungiraho yakongezwa byibura igashyirwa saa Cyenda, bitewe n’uko abakiri baba bakiza guhaha kandi hari ibicuruzwa byabo byangirika.

Bavuga ko bazi neza ubukana bwa Covid-19 ifite ariko bishobotse bakongeraho nk’amasaha abiri yo gukora.

Umwe ati “Tuzi ko bitoroshye kuko noneho twaje inyuma ya Kigali mu kugira ubwandu bwinshi, ariko batwongereyeho isaha imwe cyangwa abiri yo gufunga ntacyo byakwangiza".

Abaturage nabo basaba ko bakongererwa igihe cyo kujya guhaha cyangwa kugurisha ibyo bejeje kuko saa Saba haba hakiri kare cyane.

Hari uwagize ati “Uwatwongereraho nibura isaha imwe cyangwa ebyiri nta kibazo kuko saa Saba ni hafi ku buryo hari n’abasubizayo ibyo bazanye kuko abaguzi batinya kuza kuko batabona umwanya wo kuza guhaha no gusubira mu ngo bigatuma duhomba.”

Mu gihugu hose imirenge 50 ni yo yashyizwe muri Guma mu Rugo y’iminsi 14 kuva tariki ya 28 Nyakanga 2021 kugeza ku wa 10 Kanama 2021.

Iyi mirenge yiyongera ku Mujyi wa Kigali n’uturere twa Burera, Gicumbi, Musanze, Kamonyi, Rwamagana, Nyagatare, Rubavu na Rutsiro turi muri gahunda ya Guma mu Rugo yatangiye ari iy’iminsi 10 nyuma hongerwaho iminsi itanu, bikaba biteganyijwe ko izarangira ku wa 31 Nyakanga 2021.

Abaturage bibutswa ko umaze guhaha agomba guhita asubira mu rugo mu kwirinda umuvundo
Abacuruza ibiribwa bemerewe gukora muri ibi bihe bya Guma mu Rugo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .