Kwamamaza

Meya Kayisime yasabye abatuye Kimisagara kurangwa n’isuku no kurwanya ibiyobyabwenge

Yanditswe kuya 30-10-2016 saa 12:21' na Serugendo Jean de Dieu


Ubwo yifatanyaga n’abaturage bo mu Murenge wa Kimisagara, Akagari ka Katabaro mu gikorwa cy’umuganda usoza ukwezi, Umuyobozi w’ Akarere ka Nyarugenge Kayisime Nzaramba, yabasabye kugira uruhare mu kwimakaza isuku y’aho batuye.

Uyu muganda wakozwe hahangwa umuhanda ufite uburebure bwa kilometero imwe muri ako gace.

Meya Kayisime yashimiye abaturage b’ aka kagali igitekerezo bagize cyo guhanga umuhanda ndetse anashimira abaturage bagiye batanga ubutaka bwabo kugira ngo uyu muhanda ushobore gukorwa.

Yagarutse kuri imwe mu mihigo y’akarere abaturage bagomba kugiramo uruhare irimo kwitabira gahunda y’ubwisungane mu kwivuza, kugira isuku mu ngo, abana bagatozwa isuku, kugirana amasezerano na kompanyi zitwara imyanda abaturage bakareka kujya bayijugunya muri za ruhurura mu gihe cy’imvura, kugira ibigega bifata amazi no kwitabira gahunda yo gukoresha gaz.

Yongeye kwibutsa abaturage gahunda yo kwizigamira, avuga ko nta terambere ryagerwaho abantu badafite umuco wo kuzigamira.

Yakanguriye abaturage bari aho n’aba Akarere ka Nyarugenge muri rusange, gufasha abantu bafite uburwayi bwo mu mutwe ndetse n’ababana n’ihungabana, yibutsa ko uburwayi bwo mu mutwe ari indwara nk’izindi kandi ivurwa igakira. Yagaragaje ko mu bintu byinshi bitera uburwayi bwo mu mutwe harimo n’ ikoreshwa ry’ibiyobyabwenge, asaba abaturage gukomeza kubirwanya.

Muri uwo muganda haremewe umugore utishoboye muri gahunda y’ibikorwa byahariwe gukunda igihugu, abasaba gukomeza uwo mutima w’ubufatanye banawucengeza mu bandi banyarwanda, barushaho gutera umugongo umuco wo gutegereza ko abanyamahanga ari bo baza kubafashiriza abavandimwe.

Meya Kayisime yijeje abaturage b’aka kagari ubufatanye mu kurangiza uyu muhanda wahanzwe.

Umuyobozi w’ingabo mu Karere ka Nyarugenge, Lt Col Frank Mutembe witabiriye ibyo biganiro, yashishakarije abaturage gukomeza ubufatanye bafitanye n’ingabo, kugira ngo umutekano ukomeze kurindwa neza, abasaba ko aho bazi abantu bashobora kuba bahungabanya umutekano bajya babigeza ku babishinzwe hakiri kare.

Uyu muhanda wahanzwe uzahuza imidigudu umunani yo mu Murenge wa Kimisagara, ari yo Kove, Akishuri, Akishinge, Kigarama, Umurinzi,Uruyange, Birama na Mpazi. Uretse imirimo y’amaboko yakozwe, abaturage kandi bakusanyije amafaraga angana na Miliyoni 4,220,000 azafasha mu kubaka uyu muhanda. Ibikorwa byose byakozwe bikaba bifite agaciro ka miliyoni zisaga 140 y’u Rwanda.

Uretse abaturage, Ubuyobozi bw’Akarere, ingabo na Polisi by’u Rwanda, uyu muganda kandi wari witabiriwe n’abanyeshuri bo muri Kaminuza y’u Rwanda ishami rya Nyarugenge ndetse n’aba Kaminuza ya Mount Kenya.

Meya Kayisime yifatanyijwe n'abatuye Kimisagara guhanga umuhanda
Abaturage benshi bari bitabiriye uyu muganda
Akarere ka Nyarugenge kijeje ubufasha abaturage ku irangizwa ry'uyu muhanda
Umuhanda wahanzwe ufite uburebure bwa Kilometero imwe
Meya Kayisime yasabye abaturage kwimakaza isuku mu ngo zabo
Lt Col Mutembe yasabye abaturage kujya bagaragaza hakiri kare abo bakeka ko bashaka guhungabanya umutekano
Muri uyu muganda kandi haremewe umukecuru utishoboye
Abaturage bemeye gutanga ubutaka bwo guhangwaho uwo muhanda bashimiwe

Serugendo Jean de Dieu, Umukozi ushizwe ubuzima no kurwanya indwara z’ibyorezo mu Karere ka Nyarugenge


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved