Kwamamaza

Meteo yemeza ko icyogajuru gitanga amakuru yizewe ku iteganyagihe

Yanditswe kuya 13-09-2016 saa 15:28' na Mukaneza M. Ange


Ikigo cy’Igihugu gishinzwe Iteganyagihe (Meteo Rwanda) cyagaragaje ko gukoresha ibipimo by’icyogajuru ku miterere y’ikirere, bituma amakuru atangwa ku mihindagurikire y’ikirere aba yizewe kuko haba harebwe impande zose.

Ibi byatangarijwe mu nama ya 12 ihuza ibihugu bya Afurika bikoresha ibyogajuru by’Umuryango w’ubumwe bw’u Burayi, iteraniye i Kigali kuva ku itariki ya 12 Nzeri 2016.

Inama yateguwe ku bufatanye bwa Meteo Rwanda na EUMETSAT (European Organisation for the Exploitation of Meteorological Satellites) ari nayo igenzura ibyogajuru bikoreshwa mu iteganyagihe muri Afurika n’i Burayi.

Umuyobozi wa Meteo Rwanda, John Ntaganda Semafara yavuze ko kugira ngo iteganyagihe rikorwe babanza gukusanya ibipimo byafatiwe kuri sitasiyo ziri hirya no hino mu gihugu ariko akaba atari ibintu byoroshye kuko habonekamo icyuho.

Ati ” Ntabwo byoroshye kugira ngo ugire sitasiyo buri hantu hose. Ibipimo rero dufata ku butaka byunganirwa na biriya bifatwa n’ibyogajuru. Biduha ububasha bwo kugira ngo tube twareba mu gihe nyacyo imiterere y’ikirere.”

Yakomeje avuga ko amashusho aturuka ku byogajuru bya EUMETSAT aboneka buri minota 15, akaba atuma babasha guhuza ibipimo byo mu Rwanda no hirya no hino ku Isi bakabasha gutanga amakuru y’iteganyagihe yizewe.

Umuyobozi wa EUMETSAT, Alain Ratier, yavuze ko amakuru atangwa n’ibyogajuru byayo ari ingenzi cyane ku Rwanda kuko atuma babasha kumenya igihe imvura izabonekera dore ko ari ingenzi cyane ku buhinzi.

Yakomeje avuga ko kandi aya makuru batanga aboneka mu gihe gito cyane kandi ko bibanda kuri Afurika kuko ariho ibyogajuru byabo bibasha kubona neza bitewe n’uko iri hasi ugereranyije n’u Burayi.

Ratier yavuze ko bateganya kohereza mu kirere ubwoko bwa gatatu bw’icyogajuru cyabo(Meteosat Third Generation) no gutangira gukoresha icyo mu bwoko bwa Meteosat-8 kitezweho mu rwego rwo gutanga amakuru menshi kandi mu gihe gito.

Iyi nama izasozwa ku itariki 16 Nzeri 2016 ihuje abantu basaga 200 bahagarariye ibigo by’iteganyagihe mu bihugu 57 birimo ibyo muri Afurika no ku mugabane w’u Burayi.

Biteganyijwe ko hazanaganirwa ku bijyanye no gushyiraho Ikigo cy’icyitegererezo mu bijyanye n’iteganyigihe kizaba gihuriweho n’ibihugu byo muri Afurika yo hagati.

Iyi nama yitabiriwe n'abantu b'ingeri zitandukanye
Inama ihuje abasaga 200 baturutse mu bihugu 57 byo muri Afurika n'i Burayi

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 3 Ukwakira 2016
Copyright © 2009 -2014 - IGIHE Ltd - All Rights Reserved