Météo Rwanda yaburiye abahinzi ko imvura izacika hakiri kare

Yanditswe na Jean Pierre Tuyisenge
Kuya 21 Gashyantare 2018 saa 04:51
Yasuwe :
0 0

Ikigo cy’Iteganya gihe, Météo Rwanda, gitangaza ko mu gihembwe cy’ihinga cya 2018 B, imvura izagwa ari nke ndetse ikazanagenda hakiri kare kuko ngo izahagarara hagati y’itariki 20 na 30 Gicurasi 2018.

Zimwe mu mpamvu Météo Rwanda igaragaza ko zatumye imvura izaba nkeya mu duce twinshi tw’igihugu ni uko ahahurira imiyaga mu gice cy’Iburengerazuba cy’inyanja ya Pacifique hashyushye cyane.

Ibyo ngo bikazatuma imvura igwa ari nke ikazagenda izamuka gahoro gahoro mu turere twa Musanze, Burera, Gicumbi, Rulindo, Gakenke, Rusizi na Nyamasheke.

Hari kandi uturere tumwe na tumwe imvura izagwa ari nyinshi ariko ikazagenda igabanuka. Utwo turimo Karongi, Rutsiro, Rubavu, Ngororero, Nyamasheke, Nyabihu, Muhanga, Huye, Nyanza, Bugesera, Gisagara, Nyaruguru, Kamonyi, Ruhango, Kirehe, Ngoma, Rwamagana, Kayonza, Kigali n’agace k’Iburasirazuba bwa Nyagatare na Gatsibo.

Ubwo iki kigo cyashyiraga hanze uko imvura yaguye mu gihembwe cy’ihinga cyabanje cyagenze n’uko mu gihembwe gikurikiyeho izaba yifashe, Umuyobozi mukuru wacyo, John Ntaganda Semafara, yatangaje ko abaturage badakwiye guhangayika kuko ngo atari ihame ahubwo bishobora guhinduka.

Yagize ati “ Aho imvura izagwa ari nyinshi ni mu Majyaruguru agana Iburengerazuba no mu Majyepfo agana Iburengerazuba ahandi ho biragaragara ko itazagwa ari nyinshi cyane ariko biturutse ku miterere y’ahantu, biriya byose bishobora guhinduka.”

Ikigo cy’Igihugu cy’Ubuhinzi n’Ubworozi, RAB, gitangaza ko amakuru atangwa na Météo Rwanda, kiyifashisha kibwira abahinzi ibikenewe gukorwa kugira ngo umusaruro utagira ubwo wahungabana.

Umuyobozi ushinzwe iterambere ry’ubuhinzi muri RAB, Dr Ndabamenye Telesphore, yasabye abahinzi gutera hakiri kare kugira ngo imvura izacike baramaze kweza imyaka.

Yagize ati “ Twabonye ko imvura izacika kare, abahinzi barakangurirwa gutera hakiri kare ariko banateganya ibikoresho byo kuhira, hari ibishobora kwifashishwa ku rwego rw’umuhinzi biri muri gahunda ya nkunganire.”

RAB itangaza ko guhabwa amakuru no kuyageza ku bahinzi ku gihe byatumye umusaruro w’ubuhinzi mu gihembwe gishize uba mwiza kuburyo wageze kuri toni 703,909 z’ibihingwa bitandukanye mu gihugu hose.

Umuyobozi Mukuru wa Meteo Rwanda, John Ntaganda Semafara
Umuyobozi ushinzwe iterambere ry’ubuhinzi muri RAB, Dr Ndabamenye Telesphore, yasabye abahinzi gutera hakiri kare kugira ngo imvura izacike baramaze kweza imyaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza