Marriott Hotel yasangiye ifutari n’Abayisilamu b’i Nyamirambo

Yanditswe na IGIHE
Kuya 7 Kamena 2018 saa 06:28
Yasuwe :
0 0

Abakozi ba Kigali Marriott Hotel basangiye ifunguro rya nimugoroba rizwi nka “iftar” n’Abayisilamu basengera mu Musigiti witwa Mar’wa Rah’Man uherereye mu gace ka Rwarutabura mu Murenge wa Nyamirambo, Akarere ka Nyarugenge.

Uyu musangiro wabaye ku mugoroba wo ku wa Gatatu, abakozi 21 ba Kigali Marriott bitwaje amafunguro maze bayashyikiriza kandi bayasangira n’Abasilamu barimo abagabo n’abagore, urubyiruko ndetse n’abana.

Umuyobozi ushinzwe Abakozi muri Kigali Marriott, Aisha Nante Mambo, wari unayoboye itsinda, yabwiye IGIHE ko bahisemo kwifatanya n’Abasilamu basangira ifutari muri uku kwezi kw’igisibo gitagatifu.

Yagize ati “Mu bikorwa dusanzwe dukora buri kwezi byo gufasha sosiyete dukoreramo, twasanze ari byiza ko muri uku kwezi kwa Ramadhan twifatanya n’Abayisilamu. Hari bamwe mu bakozi bacu basanzwe basengera hano ni bo badufashije guhitamo uyu musigiti. Batubwiye ko hano hari n’imiryango itishoboye tuba ari ho duhitamo ariko twasangiye n’abahasengera muri rusange.”

Mambo yakanguriye abantu bose by’umwihariko Abayisilamu bafite ubushobozi gukomeza gufasha abatishoboye nk’uko biteganywa n’imwe mu ntego z’igisibo cya Ramadhan nk’igihe cyo kwiyegereza Imana “Allah” no gufasha abakene.

Umuyobozi (Imam) w’Umusigiti wa Mar’wa Rah’Man, Sheikh Daoud Niyigena, yashimiye Kigali Marriott ko yabazaniye ifutari ndetse bagasangira n’abayoboke b’idini ya Islam avuga ko ari iby’agaciro cyane kuri bo.

Agaruka kuri bumwe mu butumwa bw’Intumwa y’Imana Mohammed, Sheikh Niyigena yagize ati “Turashimira cyane Marriott Hotel ku kuba yatuzirikanye ikatugenera iri funguro kandi ikifatanya natwe. Umuntu utanze ifutari, Allah amuha ibihembo bitagabanyije ibya wa wundi wayihawe. Twishimye kandi turasaba Allah kubaha ibihembo ku bw’iri funguro.”

Miliyoni nyinshi z’Abasilamu ku isi yose bubahiriza igisibo cyo kwiyiriza ubusa mu kwezi kwa Ramadhan buri mwaka. Muri uyu mwaka, igisibo cyatangiye ku wa 17 Gicurasi bikaba biteganyijwe ko kizarangira ku wa 14 Kamena.

Muri uku kwezi kwa Ramadhan, Abayisilamu bigomwa kurya, kunywa no kubonana ku bashakanye buri munsi kuva umuseke utambitse kugeza izuba rirenze.

Umuyobozi ushinzwe Abakozi muri Kigali Marriott, Aisha Nante Mambo, yasangiye n'Abayisilamu bagenzi be ifutari
Umwe mu bakozi ba Kigali Marriott akaba n'Umuyisilamu usanzwe asengera muri uyu musigiti ashyikiriza abandi amafunguro mu gihe cyo gufata ifutari
Umukozi wa Kigali Marriott yifurije Abayisilamu bagenzi be Ramadhan Mubarak
Abakozi ba Kigali Marriott Hotel basangira ifutari n'Abayisilamu b'i Nyamirambo ku wa Gatatu
Imam w'Umusigiti wa Mar’wa Rah’Man, Sheikh Niyigena Daoud
Kigali Marriott Hotel yatanze ifunguro inasangira ifutari n'Abayisilamu basengera Rwarutabura i Nyamirambo mu Mujyi wa Kigali
Umuyobozi ushinzwe Abakozi muri Kigali Marriott, Aisha Nante Mambo, ashyikiriza amafunguro abana mu gihe cyo gufata ifutari
Abakozi ba Kigali Marriott Hotel bageze ku Musigiti witwa Mar’wa Rah’Man uherereye mu gace ka Rwarutabura i Nyamirambo aho basangiye ifutari n’Abayisilamu bahasengera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza