Maj. Mvuyekure wari ushinzwe ubutasi muri FDLR yatahutse

Yanditswe na Ishimwe Israel
Kuya 26 Ugushyingo 2016 saa 04:01
Yasuwe :
0 0

Maj. Mvuyekure Pierre, umwe mu barwanyi ba FDLR wari ushinzwe ibikorwa by’ubutasi no gutegura urugamba muri Kivu y’Amajyaruguru yasesekaye ku butaka bw’u Rwanda ku wa Gatanu, tariki ya 25 Ugushyingo 2016, avuye aho yabaga mu mashyamba ari hafi y’ikirunga cya Nyamuragira muri Repubulika Iharanira Demokarasi ya Congo.

Uyu musirikare uvuka mu Karere ka Nyabihu mu Ntara y’u Burengerazuba yazanye na Sous-Lieutenant Ntibibuka Olivier(wavuye mu Rwanda mu 1998 ubwo abacengezi basubiraga Congo bamaze gutsindwa, bamutwarana n’abandi kubigisha igisirikare) uvuka i Nemba muri Gakenke, wabaga mu ngabo za Congo, FARDC zikorera Masisi. Aba bagabo bombi bageze ku mupaka wa Gisenyi utandukanya u Rwanda na Congo saa munani za ku manywa.

Maj. Mvuyekure uzwi ku izina rya Kinyange atangaza ko yishimira kuba yagarutse mu Rwanda, igihugu cyamubyaye.

Yagize ati “Kuba natashye nkagera mu Rwanda amahoro ni igikorwa gikomeye cyane, ni ibyo nakwita gukabya inzozi. Maze kubona uburyo mu mashyamba tubayeho mu buzima bubi, twacitsemo ibice bibiri nta bushobozi dufite tubeshejweho no kwiba, nafashe icyemezo nitonze mpitamo gutaha kuko kuko hari benshi byananiye.”

Yakomeje agira ati “Nari mfite umwanya mwiza kuko ninjye washakaga amakuru nkanategura ibijyanye n’ibitero ariko ubuzima twarimo nabonye bugoye , ndetse turwana urugamba tutazatsinda. Kuwa 19 Ugushyingo nibwo nabonye amahirwe yo kuva mu gace narimo, nsanga Ingabo za Loni zishinzwe kugarura amahoro muri Repubulika Iharanira Demokarasi ya Congo, MONUSCO i Tongo bangeza i Goma, mpita nambuka, kandi nishimiye kuba ngarutse iwacu.”

Maj. Mvuyekure avuga ko yari umwe mu basirikare bari bizewe kandi bakomeye bungirije Général de Brigade, Ntawunguka Pacifique uzwi nka Omega, gusa ngo nta byishimo yarafite byo gukomeza kuba mu ishyamba wenyine kure y’umuryango we.

Yagize ati “Nta byishimo byo kuba mu mashyamba, utabana n’umuryango wawe, utawuteganyiriza ahazaza."

Yasabye abasigaye mu mashyamba gushyira ubwenge ku gihe bagataha mu gihugu cyabo.

Maj Mvuyekure yavukiye mu yahoze ari Komini Nyamutera muri Perefegitura ya Ruhengeri “Nyabihu y’ubu”, akaba yarinjiye muri FDLR mu mwaka wa 1997, icyo gihe abacengezi barwaniraga iwabo bamukuye aho avuka bamujyana muri Congo nuko aza kwigishwa igisirikare mu gace kitwa Rushihe.

Si ubwa mbere umwe mu barwanyi bashinzwe ubutasi muri FDLR afata icyemezo cyo gutaha kuko ku itariki ya 16 Ugushyingo umwaka ushize na Lt. Col Désiré Habamungu yageze i Gisenyi avuye muri Congo.

Maj Mvuyekure Jean Pierre wavuye muri FDLR (iburyo) na Sous-Lieutenant, Ntibibuka Olivier wabaga mu ngabo za FARDC

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza