MAGERWA yibutse abari abakozi bayo bishwe muri Jenoside (Amafoto na Video)

Yanditswe na Mukaneza M.Ange
Kuya 12 Gicurasi 2018 saa 03:46
Yasuwe :
0 0

Mu gihe u Rwanda rukomeje kwibuka ku nshuro ya 24 Jenoside yakorewe Abatutsi, abayobozi n’abakozi b’ububiko bw’ibicuruzwa biva n’ibijya mu mahanga, MAGERWA bibutse abari abakozi b’iki kigo bishwe bazira kuba Abatutsi.

Ku wa Gatanu nibwo uyu muhango wo kwibuka wabaye, igikorwa cyabanjirijwe no gushyira indabo ku rwibutso ruriho amazina y’abakozi 11 ba MAGERWA bishwe muri Jenoside.

Cyakomereje ku rwibutso rwa Jenoside rwa Kigali ku Gisozi, aho bunamiye Abatutsi barenga ibihumbi 250 bahashyinguwe, ndetse hanabera umugoroba wo kwibuka.

Mukabalisa Immaculée wari umukozi wa MAGERWA mbere ya Jenoside yatanze ubuhamya bw’uburyo yahohoterwaga n’abakozi bagenzi be bamuhora kuba ari umututsi, kugeza ubwo yiswe intasi agafungwa amezi atandatu.

Ati “Twafunzwe mu kwa cumi tuvamo mu kwa gatatu […]. Igihe cyarageze numva ngo abantu bari gusubizwa ku mirimo cyangwa bakajya kuburana amafaranga yabo bakabahemba, ndavuga nti uwajya muri Magerwa nkajya kwishyuza amafaranga yanjye y’amezi atandatu. Ndibuka ko nkigera muri Magerwa nahuye n’uwari ushinzwe abakozi, akimbona arambwira ngo witwaje ibaruwa kandi natwe hari iyawe dufite? Narayifunguye nsanga handitsemo ko nataye akazi,ngo ntabwo nari mfunzwe nataye akazi.”

Ubugome n’ingengabitekerezo yari muri Magerwa kandi byanagarutsweho na Nzamwita Bonaventure wari ufite umuvandimwe wakoraga muri iki kigo akaza kwicwa muri Jenoside, anaboneraho gushimira ubuyobozi bwiza bwaje nyuma ndetse bugatangiza igikorwa cyo kubibuka.

Mu kiganiro yatanze, Ndabaganje Jules Cesar, wari uhagarariye Komisiyo y’Igihugu yo kurwanya Jenoside, CNLG yagarutse ku mateka yaranze u Rwanda, uburyo umugambi w’ubwicanyi wateguwe ndetse ugashyirwa mu bikorwa, ndetse yongera gushimangira ko uretse kuba kwibuka ari ugusubiza agaciro Abatutsi basaga miliyoni imwe bishwe mu minsi 100 gusa, ari n’uburyo bwo gufata mu mugongo abarokotse no kubagarariza ko batari bonyine.

Umuyobozi Mukuru wa MAGERWA, Nyoni Lambert, wihanganishije ababuze ababo bakoraga muri iki kigo ayobora, yavuze ko kuri ubu icyo bishimira ari uko iyo bavuga amateka bagera ku musozo bagaragaza ko hari impinduka nziza.

Ati “Amateka ya Magerwa bahora bayavuga ariko ikintu gishimishije ni uko bayavuga baganisha ko byahindutse tumerewe neza, niyo umuntu abarebye gutya usanga muri abasore, muratanga icyizere ko ibyabaye bitazongera ukundi.”

Yanagarutse kandi ku busabe bwa CNLG ku birebana no kwandika aya mateka avuga ko bizakorwa, kandi bazanakomeza gukorera ubuvugizi abo mu miryango y’abari abakozi ba MAGERWA bishwe muri Jenoside bafite ibibazo bitandukanye.

MAGERWA (Magasin Généraux du Rwanda), yashinzwe mu 1969, ifite ibigega byifashishwa mu kubika ibicuruzwa bitandukanye bivuye mu mahanga ndetse n’ibigiye koherezwayo.

Abakozi ba Magerwa bakirwa ku Rwibutso rwa Jenoside rwa Kigali aho bakoreye umugoroba wo kwibuka
Abakozi ba MAGERWA bashyira indabo ku mva zishyinguyemo Abatutsi bazize Jenoside basaga ibihumbi 250
Abakozi ba MAGERWA bavuga ko kuri ubu nta ngengabitekerezo ikibarwangwamo
Abakozi ba MAGERWA bunamiye bagenzi babo bahowe kuba Abatutsi
Bacanye urumuri rw'icyizere bazirikana ingabo zari iza RPA zahagaritse Jenoside ndetse zikabohora u Rwanda
Bahawe ikiganiro ku mateka y'u Rwanda, uko Jenoside yateguwe igashyirwa mu bikorwa, n'uko igihugu cyongeye kwiyubaka
Ubwo basobanurirwaga amateka y'urwibutso rwa Jenoside rwa Kigali ku Gisozi
Bamwe mu bari abakoze ba MAGERWA barokotse, n'abo mu miryango ya bagenzi babo bakoreraga iki kigo bishwe muri Jenoside nabo bashyize indabo ahanditse amazina yabo
Bashyize indabo ku mva ndetse banafata umunota wo kunamira abahowe kuba Abatutsi
Mukabalisa yavuze uburyo yahohoterwaga n'abo bakoranaga muri MAGERWA kugeza ubwo bamufungishije bamwita icyitso
Mukabalisa, Nzamwita n'undi ufite uwe wakoraga muri MAGERWA bashyira indabo ku mva ku rwibutso rwa Gisozi
Nagiriwubuntu Dieudonné, Umukozi ku Rwibutso rwa Jenoside rwa Kigali niwe wayoboye iki gikorwa cyo kwibuka
Ndabaganje wari uhagarariye CNLG yavuze ko kwibuka ari uguha agaciro inzirakarengane zishwe no kuzirikana abarokotse
Nyoni yasabye abakozi ba MAGERWA gukomeza kurangwa n'ubumwe baharanira gukora cyane
Urukuta rwanditseho amazina y'abari abakozi ba MAGERWA bazize Jenoside yakorewe Abatutsi
Umuyobozi wa MAGERWA, Lambert Nyoni (ibumoso) acanira abandi bakozi urumuri rw'icyizere
Urubyirulo rwibumbiye muri HORA Rwanda rwari rwaherekeje bamwe muri bagenzi babo bafite ababo bakoraga muri MAGERWA bishwe muri Jenoside

Amafoto: Niyonzima Moise

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza