Madamu Jeannette Kagame yitabiriye inama nkuru y’urugaga rw’abagore rushamikiye kuri FPR Inkotanyi

Yanditswe na Philbert Girinema
Kuya 2 Ukuboza 2017 saa 10:39
Yasuwe :
0 0

Madamu Jeannette Kagame yitabiriye Inama Nkuru y’Urugaga rw’Abagore rushamikiye kuri FPR Inkotanyi, yateranye kuri uyu wa Gatandatu tariki ya 2 Ukuboza 2017 ku cyicaro gikuru cy’uyu muryango giherereye i Rusororo mu Karere ka Gasabo.

Iyi nama nkuru ibaye mu gihe Umuryango wa FPR Inkotanyu uri mu gihe cyo kwizihiza isabukuru y’imyaka 30 ubayeho. Inakurikira iyahuje urubyiruko ruhuriye mu rugaga rushamikiye kuri FPR Inkotanyi yo ku wa 26 Ugushyingo 2017. Zizakurikirwa na Kongere ya FPR Inkotanyi ku rwego rw’igihugu ari nayo izasoza ibikorwa byo kwizihiza iyi sabukuru.

Muri iyi nana nkuru, abagore bo muri FPR Inkotanyi baraganira ku ruhare rwabo mu iterambere ry’igihugu, ku musanzu w’umugore mu guhindura imibereho iganisha k’u Rwanda na Afurika twifuza’ hagendewe ku mirongo migari y’uyu muryango.

Iyi nama ihuriranye n’igihe cyo kwishimira ko Umukandida wa FPR Inkotanyi, Paul Kagame, yegukanye intsinzi mu matora ya Perezida wa Repubulika aheruka.

Hashize iminsi mu bice bitandukanye by’igihugu hakorwa ibikorwa binyuranye bifitanye isano no kwizihiza iyi sabukuru. Abanyamuryango ba FPR Inkotanyi mu gihugu no mu mahanga bari guhurira mu biganiro bigamije kurushaho gusobanura intego zawo no kwiyemeza uko gahunda zayo zashyirwa mu bikorwa hagendewe ku byo Perezida Kagame yemereye abaturage muri manda ye izasozwa mu 2024.

Ubwo yatangizaga ku mugaragaro inama nkuru y’urugaga rwa FPR Inkotanyi rushamikiye ku rubyiruko, Umunyamabanga Mukuru w’Umuryango FPR Inkotanyi, François Ngarambe, yarusabye kurwanya ibibazo by’imirire bihereyeho, bagaharanira ko imirire mibi icika naho izindi ngamba nazo bakazigiramo uruhare bahereye kuri ibyo bisaba ubushake bahindura abagifite imyumvire yo hasi.

Amatariki y’ingenzi mu mateka ya FPR Inkotanyi

1979: Ivuka rya RANU (Rwandese Alliance for National Unity) yaje guhinduka FPR Inkotanyi, iyi RANU yashingiwe mu Mujyi wa Nairobi muri Kenya.

1980: Opollo Milton Obote wari warahesheje ubwigenge Abagande bigobotoye ubukoloni bw’Abongereza yagarutse ku butegetsi bwa Uganda maze yemeza ko abanyarwanda bari ku butaka bw’igihugu cye bahambirizwa bakirukanwa aho yakoresheje ijambo rivuga ngo “Uwaje kera ni we uzagenda mbere”.

Ku wa 06 Gashyantare 1981: Yoweri Kaguta Museveni yatangije intambara y’ishyamba aherekejwe n’abanyarwanda barimo Fred Gisa Rwigema. (Urugamba rwabereye mu Majyaruguru ya Uganda mu bantu barurwanye 96 % byari abanyarwanda).

1980-1981: Obote yashyize mu bikorwa umugambi we wo kwirukana impunzi z’abanyarwanda zari muri Uganda.

Ku wa 26 Mutarama 1986: Museveni abifashijwemo n’abanyarwanda yafashe ubutegetsi bwa Uganda.

Ku wa 25 Ukuboza 1987: Habaye inama ya RANU yageze ku musozo wayo hafatiwemo imyanzuro ikomeye irimo ivuka ry’Umuryango FPR-Inkotanyi (Front Patriotique Rwandais), inyandiko z’iremezo: intego, imigambi, amategeko remezo ndetse n’imyitwarire yayo.

Muri iyi nama ni ho hemejwe ishyirwaho ry’abakada, urugaga rw’urubyiruko ndetse n’urugaga rw’abategarugori.

Ku wa 01 Ukwakira 1990: FPR-Inkotanyi yatangije urugamba rwo kubohora u Rwanda

Ku wa 02 Ukwakira 1990: Nyuma y’umunsi umwe urugamba rwo kubohora igihugu rutangiye, Fred Gisa Rwigema wari Jenerali Majoro wari uyoboye urugamba, yarasiwe i Kagitumba [Nyagatare] arapfa.

Ku wa 20 Ukwakira 1990: Paul Kagame yavuye muri Amerika; Inkotanyi zisubira inyuma zihindura imirwanire y’intambara zitangira urugamba bundi bushya.

Ku wa 01 Ugushyingo 1990: Inkotanyi zatangiye urugamba rwo mu ishyamba zigamije kubohora u Rwanda aho abaturage barwo bamwe bicwaga na leta ya Habyarimana.

Ku wa 03 Ugushyingo 1990: Inkotanyi zafashe umuhanda ujya Gatuna

1991: Umwana wavukaga i Kibungo wari wariyunze ku ngabo za RPA yahimbye indirimbo y’Umuryango wa FPR Inkotanyi ari nayo ikoreshwa muri iki gihe

Ku wa 23 Mutarama 1991: Inkotanyi zafashe Gereza ya Ruhengeri.

Kuva muri Kanama kugera mu Ugushyingo, Inkotanyi zari zarashinze ibirindiro mu Mutara mu cyo bise “Intambara y’Ibirindiro”. Muri icyo gihe aho inkotanyi zari zimaze gufata zahitaga “u Rwanda mu Rundi”.

Ku wa 16 Nzeri 1991: Uyu munsi habaye imishyikirano hagati ya leta ya Habyarimana na FPR-Inkotanyi. Iyi mishyikirano yabereye mu yahoze ari Zayire (Repubulika Iaharanira Demokarasi ya Congo) ahitwa Nsele-Gbadolite.

Werurwe kugera muri Kanama 1992: Habayeho iyiswe “Intambara yo Kugota”.

Ku wa 04 Kanama 1992: Hatangiye imishyikirano ya Arusha.

Ku wa 06 Kanama 1992: Igitero cy’i Byumba.

Ku wa 01 Nyakanga 1992: Guhagarika intambara, igikorwa cyiswe “Ceasefire” mu rurimi rw’icyongereza.

1993: Indirimbo ya FPR ni bwo yaririmbiwe ku Murindi ubwo hari hahuriye amashyaka yose, iririmbwa na Unit ya 101 y’ingabo za RPA.

Ku wa 03 Kanama 1993: Isubukurwa ry’imishyikirano ya Arusha

Ku wa 28 Ukuboza 1993: Inkotanyi muri CND i Kigali.

Ku wa 06 Mata 1994: Ihanurwa ry’indege ya Habyarimana, hatangira ishyirwa mu bikorwa ry’umugambi wa Jenoside

1994 Mata-Nyakanga: FPR-Inkotanyi zari mu rugamba rwo guhagarika Jenoside yakorerwaga abatutsi.

Ku wa 04 Nyakanga 1994: Inkotanyi zifata Kigali.

Ku wa 19 Nyakanga 1994: Ishyirwaho rya Leta y’Ubumwe bw’Abanyarwanda.

Ku wa 25 Kamena 2003: Habaye amatora y’Umukuru w’Igihugu yatsinzwe na Paul Kagame umukandida wari watanzwe n’Umuryango FPR-Inkotanyi.

Ku wa 20 Ukuboza 2012: I Kigali, abanyamuryango ba FPR-Inkotanyi bizihije Yubile y’imyaka 25.

Ku wa 11 Kanama 2010: Perezida Kagame wari watanzwe na FPR Inkotanyi nk’umukandida wayo mu matora y’Umukuru w’Igihugu, yatorewe manda ya kabiri n’amajwi 93.08%

Ku wa 17 Kamena 20017: Perezida Kagame n’abandi banyamuryango ba FPR-Inkotanyi batashye icyicaro gishya cy’uyu muryango giherereye i Rusororo mu Karere ka Gasabo.

Uwo munsi ni nabwo yemejwe nk’umukandida w’uyu muryango mu matora ya Perezida wa Repubulika yabaye ku wa 03 no ku wa 04 Kanama 2017

Ku wa 22 Kamena 2017: Abanyamuryango ba FPR-Inkotanyi basaga 200 baherekeje Paul Kagame kuri Komisiyo y’Igihugu y’Amatora ubwo yari agiye gutanga kandidatire ye ku mwanya wa Perezida wa Repubulika

Ku wa 04 Kanama 2017: Perezida Paul Kagame yatorewe kuyobora u Rwanda mu yindi manda y’imyaka irindwi n’amajwi 98.79%, aza kurahira ku itariki ya 18 Kanama 2017.

Abagore bari mu rugaga rushamikiye kuri FPR Inkotanyi bahuriye mu Nama Nkuru ku cyicaro cy'Umuryango i Rusororo
Bacinye akadiho bishimira ibyo FPR Inkotanyi imaze kugeza ku Banyarwanda
Depite Oda Gasinzigwa uhagarariye u Rwanda mu Nteko Ishinga Amategeko ya Afurika y'Uburasirazuba, EALA
Guverineri w’Intara y’Amajyepfo, Mureshyankwano Marie Rose, acinya akadiho ubwo yari yitabiriye Inama Nkuru y'Urugaga rw'Abagore rushamikiye ku Muryango FPR Inkotanyi

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza