Kwamamaza

Madamu Jeannette Kagame yibukije ababyeyi n’abarezi kwita ku buzima bw’imyororokere bw’abangavu

Yanditswe kuya 22-09-2016 saa 13:36' na Cyprien Niyomwungeri


Madamu Jeannette Kagame yagaragaje ko ubuzima bw’imyororokere bw’abana b’abakobwa, bukwiye kwitabwaho mbere na mbere n’ababyeyi, abarezi n’abatanga serivisi z’ubuzima, kugira ngo babarinde ingaruka zirimo inda zitateganyijwe no gucikiriza amashuri.

Ibi Madamu Jeannette Kagame yabitangaje ejo kuwa Gatatu tariki 21 Nzeri 2016 mu nama y’ihuriro ry’abafasha b’abakuru b’ibihugu bya Afurika (OAFLA), yabereye rimwe n’inama rusange ya 71 y’Umuryango w’Abibumbye i New York (USA).

Iyi nama yahuje abafasha b’abakuru b’ibihugu bya Ghana, Malawi, Chad, Zambia, Burkina Faso, Côte d’Ivoire, Mozambique, Namibia, Nigeria, Sierra Leone; umufasha w’umukuru w’igihugu cy’u Buyapani Mrs. Akie Abe, Minisitiri w’Ububanyi n’Amahanga wa Ethiopia, Dr. Tedros Adhanom; Umuyobozi Nshingwabikorwa wa UNAIDS, Mr. Michel Sidibé; Umuyobozi Mukuru wa UNESCO, Ms. Irina Bokova n’abandi bafatanyabikorwa.

Iyi nama yitabiriwe kandi n’umukuru w’igihugu cya Namibia Nyakubahwa Hage Geingos mu rwego rwo gushyigikira ibikorwa by’umuryango w’abafasha b’abakuru b’ibihugu bya Afurika.

Abafasha b’abakuru b’ibihugu bunguranye ibitekerezo ku ruhare rwabo mu kwita ku burenganzira n’ubuzima bw’imyororokere bw’abangavu no gutera inkunga iyi gahunda muri Afurika.

Madamu Jeannette Kagame yavuze ko imbogamizi z’umuco na sosiyete zidakwiye guca intege ibikorwa byo kwigisha abangavu ubuzima bwabo bw’imyororokere.

Yagize ati “Nubwo twese dushobora kwemeranya ko iyi ngingo ikiri icyizira muri sosiyete no mu mico ya benshi muri twe, ntidushobora gutuma izo mbogamizi zitubuza gushishikariza ababyeyi, abarezi n’abatanga serivisi z’ubuzima kuganiriza abana b’abakobwa kuri iki kibazo.”

Yakomeje agira ati “Ukwemera kwanjye ni uko uruhare rwacu ari ukumenya ko abakobwa n’abahungu bacu bagerwaho n’ibibagenewe ku myaka yabo, serivisi zigenewe urubyiruko, serivisi z’ubuzima kandi tugashimangira inshingano yacu yo kubashyigikira mu bumenyi bugendanye n’ubuzima bwabo bw’imyororokere no kubafasha kugira ubuzima bwiza bubabereye bo ubwabo ndetse n’abazabakomokaho.”

Madamu Jeannette Kagame yanasangije abitabiriye inama imwe mu mishinga yo guteza imbere ubuzima muri rusange no kwigisha urubyiruko ibijyanye n’ubuzima bw’imyororokere n’imihindagurikire y’umubiri, kwiteza imbere binyuze mu mishinga mito ibyara inyungu ishyirwa mu bikorwa na Imbuto Foundation, Umuryango udaharanira inyungu washinzwe na Madamu Jeannette Kagame mu myaka 15 ishize.

Muri yo harimo gahunda zo kuboneza urubyaro, kurinda umubyeyi kwanduza umwana Virusi itera Sida, indyo yuzuye, ubufashamyumvire, uruhare rw’abagabo n’izindi mu iterambere ry’umuryango n’ibindi.

Ibi byiyongeraho ubukangurambaga bwo gushishikariza ingimbi n’abangavu kumenya uburenganzira bwabo n’ubuzima bw’imyororokere binyuze muri gahunda zitandukanye zirimo umushinga wa 12+ wo kwigisha abana b’abakobwa bato ubuzima bw’imyororokere, kubungabunga ubuzima n’ubukungu bw’imiryango yabo.

Iyi nama wari umwanya mwiza kuri OAFLA n’abafatanyabikorwa bayo wo kongera imbaraga mu buvugizi bugamije gutuma serivisi z’ubuzima zigera kuri buri muturage bimworoheye.

Umufasha wa Perezida wa Sierra Leone, Sia N. Koroma, yagaragaje akamaro ku burere ku buzima bw’imyororokere, asobanura ko serivisi z’ingenzi ku buzima bw’imyororokere zidahagije zishobora gutuma habaho gutwita kutateganyijwe, gutuma abakobwa bacikiriza amashuri, bikagira ingaruka zo kutabona amakuru n’ubumenyi bubafasha kugena ejo heza habo cyangwa ngo babone imirimo bakora.

Abafasha b’abakuru b’ibihugu, abayobozi ba za Guverinoma n’abandi bafatanyabikorwa bemeranyijwe ko iyo ushaka kugira ejo heza, kwita ku gisekuru cy’ahazaza bitangira uyu munsi.

Umuyobozi Mukuru wa UNESCO, Ms. Irina Bokova, yavuze ko bikenewe ko inzego zose zihuriza hamwe kugira ngo serivisi zigenewe urubyiruko zirugereho binyuze mu matsinda y’urubyiruko, ingando ngarukamwaka, ubukangurambaga ku rwego rw’igihugu, itangazamakuru, gushyira mu nteganyanyigisho ubuzima bw’imyororokere n’ibindi.

Abana bashyingirwa bakiri bato

Avuga ku kibazo cy’abana bashyingirwa bakiri bato, Madamu Hinda Deby Itno, umufasha w’umukuru w’igihugu cya Chad yagarutse ku kuba hakenewe gushyiraho amategeko arwanya kandi anahana abashyingira abana bato nkuko byakozwe muri uyu mwaka wa 2015 u gihugu cye cya Chad.

Ibi byashimangiwe n’ubuhamya bw’umudamu wo muri Chad washyingiwe ku gahato ubwo yari afite imyaka 10, akaza kubasha gutoroka ihhoterwa yakorerwaga ubu akaba ari umwe mu baharanira ko uku gushyingirwa kw’abana gukurwaho burundu aho agenda aganiriza abantu batandukanye ibibi by’iyi migenzo.

Abafasha b’abakuru b’ibihugu banagarutse ku bana bashyingirwa ari bato, bemeranya ko hakenewe kongerwa imbaraga mu buvugizi bubakorerwa no gushyira mu bikorwa gahunda zigamije kurandura ubukene kugira ngo iki kibazo gicike.

Madamu Jeannette Kagame mu nama ya OAFLA yigaga ku kwita ku buzima bw'imyororokere y'abangavu
Madamu Monica Geingos (Namibia) ageza ijambo ku bitabiriye inama
Madamu Deby Itno (Chad) akurikiye ijambo rya Madamu Kabore (Burkina Faso) mu nama ya OAFLA ku wa 21 Nzeri 2016
Madamu Koroma (Sierra Leone ) afungura ikiganiro ku kwita ku buzima bw’imyororokere y’abangavu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved