00:00:00 IGIHE NETWORK KN KINYARWANDA EN ENGLISH FR FRANCAIS

Madamu Jeannette Kagame yayoboye Inama Ngishwanama ya mbere ya UGHE asaba impinduka mu rwego rw’ubuvuzi

Yanditswe na IGIHE
Kuya 21 Kanama 2021 saa 06:50
Yasuwe :
0 0

Madamu Jeannette Kagame nk’umwe mu bayoboye Inama Ngishwanama ya Kaminuza itanga amasomo ajyanye n’ubuvuzi, Global Health Equity, yasabye ko hashyirwa imbaraga mu mpinduka zikwiriye mu rwego rw’ubuvuzi.

Yabigarutseho ku wa Gatanu tariki ya 20 Kanama 2021 ubwo we na Prof. Senait Fisseha, Umuyobozi wa gahunda muri Susan Thompson Buffett Foundation bari bayoboye Inama Ngishwanama ya Kaminuza ya Global Health Equity.

Ku wa 14 Kanama nibwo iyi Kaminuza yatangaje ko yashyizeho Inama Ngishwanama yayo ku mugabane wa Afurika, iyobowe na Madamu Jeannette Kagame na Prof. Senait Fisseha.

Madamu Jeannette Kagame yasabye abari muri iyi nama gukomeza urugendo rugamije iterambere ry’urwego rw’ubuzima, hashingiwe ku masomo Isi yakuye ku mwaka wa 2020 wabayemo ikwirakwira rikabije rya Covid-19.

Ati “Ntabwo twakomeza imikorere isanzwe.”

UGHE ni Kaminuza yiyemeje guha ubumenyi bugezweho abanyafurika n’abaturuka mu bindi bihugu mu bijyanye n’ubuzima hagamijwe ko ubuvuzi bugera kuri bose by’umwihariko ab’amikoro make.

Inama y’Ubutegetsi yayo yashyizweho hagamijwe guharanira ko iyo ntego igerwaho uko bikwiriye.

Prof Senait Fisseha yatangaje ko kuba Global Health Equity yaratangiriye ibikorwa mu Rwanda atari impanuka, ahubwo bishingiye no ku buryo u Rwanda nk’igihugu rwabaye intangarugero ku mugabane no ku Isi muri rusange.

Inama Ngishwanama y’iyi Kaminuza yiyemeje gukomeza kuyifasha mu gutanga uburezi ku rubyiruko hagamijwe kubaka urwego rw’ubuvuzi ruhamye nk’imwe mu nkingi z’iterambere n’umudendezo ku Isi by’umwihariko muri Afurika.

Umuyobozi w’iyi Kaminuza, Prof. Agnes Binagwaho, yatangaje ko bazakomeza guteza imbere urwego rw’ubuvuzi binyuze mu burezi bufite ireme.

Ati “Twizeye ko gutanga uburezi bufite ireme bizazamura urwego rw’ubuzima mu baturage b’Isi yose by’umwihariko abo mu miryango ikennye muri Afurika.”

Mu bandi batanze ibitekerezo muri iyi nama harimo Prof. Paul Farmer, Umuyobozi w’Icyubahiro w’iyi Kaminuza, yavuze ko izakomeza gushingira ku bigwi by’u Rwanda ku buryo izahura urwego rw’ubuzima ku Isi.

UGHE ubu iyobowe n’uwahoze ari Minisitiri w’Ubuzima mu Rwanda, Prof Agnes Binagwaho. Ni Kaminuza yatangiye mu 2018 itangijwe n’Umuryango udaharanira Inyungu wa Partners in Health ku bufatanye na Guverinoma y’u Rwanda, ndetse n’imiryango itandukanye nka Cummings Foundation, Bill & Melinda Gates Foundation, Kaminuza ya Havard ndetse n’iya Tufts iherereye i Boston muri Amerika.

Madamu Jeannette Kagame yayoboye Inama Ngishwanama ya mbere ya UGHE asaba impinduka mu rwego rw’ubuvuzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .