Kwamamaza

Madamu Jeannette Kagame yashimye ubutwari bw’abarinzi b’igihango

Yanditswe kuya 5-11-2016 saa 07:40' na Cyprien Niyomwungeri


Ku nshuro ya kabiri hashimiwe abarinzi b’igihango 17 bakoze ibikorwa by’indashyikirwa byo kutigera na rimwe bibagirwa ko bambitswe ikirezi maze bagahekera u Rwanda mu bihe byose, ndetse no mu makuba ndengakamere, bakarugira mu mujishi ngo rudasitara rukagwa kandi bariho.

Ku munsi wa kabiri w’ihuriro rya 9 ry’Umuryango Unity Club, Madamu Jeannette Kagame yashimiye abarinzi b’igihango 17 batoranyijwe ku rwego rw’igihugu, barimo uwahishe umurambo w’uwahoze ari Minisitiri w’Intebe, Agathe Uwiringiyimana.

Mu barinzi b’igihango batoranijwe, abagera kuri 12 barapfuye bazize kurengera ubuzima bw’abantu no kwanga ko Abatutsi bicwa muri Jenoside.

Ibikorwa by’ubutwari n’ibigwi bidasanzwe bibumbatiye umurage w’ubumwe bw’Abanyarwanda, nibyo kuri uyu wa Gatanu tariki 4 Ugushyingo 2016 byazirikanwe.

Gushimira abarinzi b’igihango byatangiye umwaka ushize, nabwo hashimirwa abagera kuri 17.

Abarinzi b’igihango ku rwego rw’igihugu mu mwaka wa 2016 n’ibikorwa byabo

Barangwanzare Eliesel

Uyu mugabo witabye Imana yari atuye mu Karere ka Gakenke, Umurenge wa Muyongwe, Akagari ka Nganzo mu mudugudu wa Vugangoma.

Yari umuyoboke w’ishyaka MRND ryari ku butegetsi mu gihe cya Jenoside, yanze kwiga imbunda ari ‘responsable’ wa selile Vugangoma bituma atayihabwa nk’abandi. Yarwanye ku bana babiri bahungiye muri selile ye bakurikiwe n’igitero kivuye muri selile Kabingo.

Yakanguriye abaturage be kutitabira ibikorwa by’ubwicanyi muri Jenoside. Kuva mu 1995 yabaye Konseye wa Segiteri Nganzo, arwanya abacengezi anabishishikariza abaturage yayoboraga. Yaje kwicwa n’abacengezi bamuca umutwe, igihanga cye bakimanika ku idirishya rya segiteri yayoboraga, igihimba bagihagarika ku giti cy’ibendera, bakizirikisha impu z’intama bari bahabagiye.

Abaturage bamwigiyeho ubunyangamugayo no gukorera neza abaturage, umutima ukunda n’ubudahemuka.

Dr.Habyarimana Jean Baptiste

Dr. Habyarimana yavukiye mu yahoze ari komini Runyinya, ubu ni Nyaruguru muri Kibeho. Yabaye perefe umwe rukumbi w’umututsi mu gihe cya Leta yateguye Jenoside. Muri Perefegitura ya Butare yayoboraga, yakoze uko ashoboye ngo ubwicanyi ntibugeremo. Mu gihe cy’amashyaka yabaye umuyoboke wa PL.

Abo yayoboraga kubera icyizere bari bamufitemo, baramwumviye banga kwijandika mu bwicanyi ndetse n’abahigwaga banga guhunga kugeza ubwo ubutegetsi bwariho bwagombye kumukura kuri uwo mwanya, bujya gukora ubukangurambaga kugirango abaturage bitabire ubwicanyi.

Dr.Habyarimana yanze gusiga abo yayoboraga yemera gupfana na bo we n’umuryango we wose. Yahagaze ahakomeye, yabaye umushumba mwiza ugwa mu irembo.

Gisagara Jean Marie Vianney

Yavukiye mu yahoze ari Komini Nyabisindu ubu ni akarere ka Nyanza. Ubwo yari Burugumesitiri w’iyo komini, yanze ko muri komini ye habera ubwicanyi, akangurira abaturage n’abakonseye kutitabira ubwicanyi anagerageza gukumira interahamwe zavaga mu yahoze ari Komini Rukondo afatanyije n’abapolisi ba Komini.

Yishwe ashinyaguriwe kugirango batinyure abaturage ba Nyabisindu kwitabira ubwicanyi. Bamaze kumwica baramufashe bamuzirika ku modoka bagenda bamukurura mu muhanda ngo bemere ko uwababuzaga yabanje akicwa.

Karamaga Thadee

Ubu atuye mu karere ka Burera, Umurenge wa Kinoni, Akagari ka Nkumba umudugudu wa Kabuguma.

Yari umusirikare mu kigo cya Kanombe afite ipeti rya kaporari. Yari mu mutwe wari ushinzwe gushyingura abasirikare baguye ku rugamba n’abandi bazize ibindi. Yarokoye abana babiri yasanze mu ntumbi z’abiciwe ku mpande z’urugo rwa Habyarimana Juvenal indege ye ikimara kuraswa.

Mu gitondo cyo kuwa 8 Mata 1994, yategetswe na Major Ntibihora Augustin guhamba umurambo wa Uwiringiyimana Agathe vuba kandi adashyizeho umusaraba. Karamaga ntabwo yabikoze ahubwo umurambo yawushyize mu y’abari baguye hamwe na Habyarimana.

Inkotanyi zibokeje igitutu, yafashe ikaramu y’ubururu yandika ku murambo wa Agathe Uwiringiyimana amagambo akurikira: ‘Premier Ministre Uwiringiyimana Agathe’, ahamya ko yabikoze kugirango abazamubona bazamushyingure mu cyubahiro.

Yahungiye muri RDC n’abana 17 yari yarokoye, abagome bashaka kumwicana nabo ariko Imana irahaba. Abo bana bariho.

Mukankaka Rose

Akomoka mu Karere ka Karongi. Mu 1994 yashinze umuryango ‘Mwana Kundwa’, agamije gushyira hamwe no gufasha abana b’imfubyi bari bafite ibikomere binyuranyen’ihungabana bari ku mihanda nyuma ya Jenoside bagarurirwa icyizere.

Uyu muryango waragutse ubu ukorera muTurere dutanu; Huye, Karongi, Kicukiro, Gisagara na Kayonza.

Mukasarasi Godelive

Akomoka mu karere ka Muhanga. Nubwo na we ari umupfakazi wa Jenoside, yagize uruhare mu gufasha abapfakazi ba Jenoside gukira ibikomere, kwiyubaka no kwiteza imbere.

Yakoreye ubuvugizi abagore bafashwe ku ngufu abatinyura gutanga ubuhamya ku byababayeho no kwakira abana bavutse kuri iryo hohoterwa. Yagize uruhare mu bikorwa bihuza abantu mu byiciro bitandukanye, hagamijwe guteza imbere umuco w’amahoro n’indangagaciro nyarwanda.

Munyakayanza Leopold

Yavukiye mu karere ka Rutsiro hafi y’ikiyaga cya Kivu. Guhera mu 1990 Abatutsi iyo baterwaga bamuhungiragaho we na mukuru we.

Yapfuye yishwe kubera gukora ibikorwa byo kurokora abahigwaga mu gihe cya Jenoside yakorewe Abatutsi, akaba yarabambutsaga abajyana ku kirwa cy’Idjwi akoresheje ubwato.

Yishwe yambutsa abantu ku nshuro ya kane, yicirwa kuri centre ya Mirambi kandi ashyingurwa ataravamo umwuka. Yishwe n’abantu bakomoka mu muryango umwe.

Munyurabatware Sostene

Yari mukuru wa Munyakayanza Leopord, akaba na we yarishwe azira ibikorwa byo kurokora Abatutsi bahigwaga mu gihe cya Jenoside, akaba yarabambutsaga abajyana ku kirwa cy’Idjwi akoresheje ubwato.

Bamwicanye na murumura we dore ko ari nawe bafatanyaga ibyo bikorwa byo kurokora abantu.

Ndagijimana Callixte

Yavukiye mu yahoze ari Komini Mugina ubu ni mu karere ka Kamonyi. Yanze ko Abatutsi bicwa muri Komini Mugina yayoboraga, yifashishije ubumenyi mu bya gisirikare yari yarakuye mu ishuri rikuru rya gisirikare, ESM, yagerageje guhangana n’ibitero by’interahamwe.

Yakanguriye abaturage bo muri Komini yayoboraga kutitabira ubwicanyi kandi akajya no guhumuriza impunzi zari zahungiye kuri paruwasi Mugina. Bamaze kubona ko Jenoside itazashoboka akiriho, bamutumije mu nama ku yahoze ari Perefegitura ya Gitarama, bamwicira muri Ntongwe.

Ntawuruhunga Jean Baptiste

Yavukiye mu Karere ka Rubavu. Yanze kwitabira inama z’abateguraga umugambi wo kwica Abatutsi, yanga kwitandukanya n’Abatutsi yahishe iwe, agerageza kubarwanaho biranga kugeza bamwicanye n’abo yari yahishe bose. Bamwishe bamukase ijosi.

Mu nkubiri y’ubwicanyi yabwiye abicanyi ati “N’inyamaswa ihungiye ku muntu ntiyirukanwa nkanswe abantu. Arongera ati “Muzabica nanjye mwanyishe.”

Ntawuryerera Isacar

Yavukaga mu karere ka Karongi. Mu gihe cya Jenoside yahungishije Abatutsi benshi abajyana ku Idjwi, uwari Burugumesitiri Karasankima aramubuza aranga, uwari konseye wa Gishyita witwaga Mika nawe aramubuza aranga akomeza kubajyana. Umunsi umwe konseye n’abahungu be baramutema bamujugunya mu rwobo aho bashyiraga Abatutsi bicwaga.

Padiri Mario Marie Falcon

Padiri Mario ni Umutaliyani warokoye abatutsi barenga 3000 bahungiye kuri Paruwasi ya Muhura. Yanze kubasiga igihe imodoka ya Minuar yari ije kumuhungisha ngo asubire iwabo mu Butaliyani, akomeza kubatunga no kubaha imyambaro n’ibindi nkenerwa, abana na bo kugeza amahoro agarutse.

Yatabaye abana b’imfubyi bari mu kigo cy’imfubyi i Muhura bagera kuri 200 mu gihe cya Jenoside, arabahungisha abajyana mu Butaliyani banyuze Entebbe muri Uganda. Amahoro agarutse yagiye kubagarura abafasha kwiga, arabubakira, arabaremera, aboroza amatungo magufi n’amaremare.

Yahishe abahigwaga mbere ya Jenoside guhera mu 1990 arabacumbikira cyane cyane abari baravuye muri Komini Murambi.

Nyuma ya Jenoside yakomeje gushishikariza abaturage kwiyunga, gusaba imbabazi no kubabarira ataretse kugeza ibikorwa by’amajyambere ku baturiye aho akorera.

Padiri Munyaneza J.Bosco

Padiri Munyaneza yakoraga muri Paruwasi ya Mukarange iri mu karere ka Kayonza nk’umupadidi. Yanze gusiga abari bamuhungiyeho mu gihe cya Jenoside bagera ku bihumbi icumi (10 000), interahamwe zimusaba ko yakwitandukanya nabo arabyanga avuga ko adashobora kwitandukanya n’intama yaragijwe n’Imana, ko atagomba kuzivamo ahubwo agomba kuzirinda kugeza igihe azinjirije amahoro mu ijuru.

Interahamwe zabanje kumurasa ziramukomeretsa aranangira zihita zimwica zikurikizaho Abatutsi bari bamuhungiyeho.

Padiri Niyomugabo Joseph

Yavukiye mu karere ka Nyamagabe. Mu gihe cya Jenoside yari Padiri Mukuru wa Paruwasi y Cyanika, aho yanze gusiga impunzi z’abatutsi bari bamuhungiyeho nubwo nawe yahigwaga.

Ubwo bashakaga kumuhungishiriza kuri Diyosezi ya Gikongoro yarabyanze agumana n’abamuhungiyeho, akomeza kubarwanaho abashakira ibibatunga kugeza ubwo bamwicanye nabo kuwa 24 Mata 1994.

Renzaho Sosthene

Yavukiye mu karere ka Gatsibo mu murenge wa Muhura. Pasiteri Renzaho yari umushumba mu itorero ry’Angilikani Paruwasi Ruhanga. Mu gihe cya Jenoside yasabwe n’interahamwe kuvangura abakristu b’abahutu n’abatutsi mu rusengero ngo babone uko bica abahigwaga arabyanga.

Bamwishe urubozo bamutemagura bamukuraho ibice by’umubiri bimara iminsi itatu nibwo yashizemo umwuka. Bamwiciye mu nzu ye iri hafi ya kiliziya n’umuryango we wose.

Rutagayintabaza Leonard

Yari atuye muri Komini Rusumo ubu ni muri Kirehe. Yahishe imiryango 10 y’abatutsi bari bamuhungiyeho mu gihe cya Jenoside, yagerageje kubarwanaho mu gihe cy’ibyumweru bibiri ariko biranga agambanirwa na murumuna we, bamwicana n’abamuhungiyeho bose.

Soeur Marcienne Kamuzima

Uyu mubikira uvuka mu Karere ka Nyamasheke ari naho akorera ubutumwa i Shangi. Yagaragaje ubutwari mu gihe cya Jenoside yakorewe Abatutsi kandi nawe yarahigwaga.

Yanze gusiga abantu bari bamuhungiyeho mu kigo cy’ababikira cy’Abapenitente cya Shangi n’abari bahungiye kuri Paruwasi Gatolika ya Shangi, akabashakira ibyo kurya n’imiti yo kubavura.

Yarenze imfubyi nyinshi atarobanuye agamije kuzifasha mu myigire, azigisha umuco wo kubabarira no kwimakaza amahoro. Icyo kigo yari akuriye harokokeye abantu basaga 100 kandi ntibigeze bicwa n’inzara cyangwa inyota.

Kamuzima yagize kandi uruhare mu kuvura inkomere nyuma y’igitero cy’interahamwe yitwa Yusouf Munyakazi cyasize inkomere nyinshi i Shangi.

Madamu Jeannette Kagame ashimira Abarinzi b'igihango
Madamu Jeannette Kagame ageza impanuro ku bitabiriye ihuriro rya cyenda ry'Umuryango Unity Club
Bamwe mu bitabiriye ibikorwa by'ihuriro rya cyenda n'isabukuru y'imyala 20 ya Unity Club byabereye muri Kigali Convention Centre

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved