Kwamamaza

Jeannette Kagame yahamagariye Abanyarwanda guharanira uburenganzira bw’abana n’abagore

Yanditswe kuya 16-10-2016 saa 08:34' na Cyprien Niyomwungeri


Mu muhango wo kwizihiza Umunsi Mpuzamahanga w’Umugore wo mu cyaro wahujwe n’Umunsi Mpuzamahanga w’Umwana w’Umukobwa, kuri uyu wa Gatandatu tariki 15 Ukwakira 2016, biteguwe na Minisiteri y’Uburinganire n’Iterambere ry’Umuryango, bikizihirizwa mu Murenge wa Cyahinda mu Karere ka Nyaruguru mu Ntara y’Amajyepfo; Madamu Jeannette Kagame yahamagariye Abanyarwanda guharanira uburenganzira bw’abana n’abagore.

Madamu Jeannette Kagame yifatanije n’abaturage 5000 bo mu Mirenge ya Cyahinda na Nyagisozi, abayobozi mu nzego za leta barimo n’abahagarariye Minisiteri y’Uburinganire n’Iterambere ry’Umuryango, Minisiteri y’Ubuzima, Minisiteri y’Ubutegetsi bw’Igihugu, abashinzwe inzego z’umutekano. Abandi bitabiriye iki gikorwa barimo abafatanyabikorwa batandukanye bo mu mashami y’Umuryango w’Abibumbye, imiryango ya Care International, Plan International ndetse n’amatorero atandukanye akorera mu Karere ka Nyaruguru.

Ubu bukangurambaga bw’umuryango buzasozwa kuwa 25 Ugushyingo 2016, bugamije gukangurira ababyeyi kurushaho kwita ku burere bw’abana babo, gukangurira abagore kwitabira ibikorwa by’iterambere n’ibindi.

Madamu Jeannette Kagame yifashishije umugani wa Kinyarwanda “Umwana umuhera icyo wamubyariye, ntumuhera icyo azakumarira”, yibutsa ababyeyi guha uburere bwiza abana babo badashingiye ku cyo bazabamarira ahubwo bakabikorana urukundo, ari nako bakomeza kubaka umuryango ubereye umwana birinda amakimbirane n’ibindi byatuma adakurira mu muryango umubereye.

Ati “Ndifuza ko twafata akanya ko gutekereza ku muryango iwacu imuhira. Muri iyi minsi hagaragara hamwe na hamwe amakimbirane mu miryango. Ese dukore iki ? Nagira ngo nsabe inzego zose gushyira imbaraga mu ‘Mugoroba w’Ababyeyi.”

Madamu Jeannette Kagame avuga ku kamaro ko kubungabunga uburenganzira bw’umwana n’umugore

Guharanira uburenganizra bw’abana b’abakobwa

Madamu Jeannette Kagame yavuze ko Umunsi Mpuzamahanga w’Umwana w’Umukobwa ari umwanya wo kwishimira intambwe abakobwa bagezeho mu iterambere kuko bagaragaje ko bashoboye, haba mu bukorikori n’imyuga, muri Siyansi ndetse no mu ikoranabuhanga.

Ku rundi ruhande ariko yakomoje ku kibazo cy’abana b’abakobwa 7% mu Rwanda batwara inda bataruzuza imyaka 19, avuga ko ikibabaje ari uko abazibatera n’ababyeyi bahita babatererana bikazana ibibazo birimo impfu zijyanye no gukuramo inda, kubyara abana nta bushobozi bwo kubarera, bishobora no gutera ikindi kibazo cy’abana bo mu muhanda.

Madamu Jeannette Kagame yagarutse ku ngaruka zikomeye abana b’abakobwa batewe inda bakiri bato bahura na zo, yibaza niba abazibatera babihanirwa mu buryo bukomeye nk’izo ngaruka baba bateye abo bana b’abakobwa.

Madamu Jeannette Kagame yashingiye kuri izi ngaruka ziyongeraho guta amashuri zikabatera no kuba mu buzima bubi, asaba ko abatera inda bariya bana bajya bakurikiranwa bose kandi bagahanwa biremereye.

Yakomeje asaba ababyeyi, abana b’abakobwa n’ubuyobozi kurandura iki kibazo by’umwihariko abakobwa bagaharanira kwigira.

Ati “Bana b’abakobwa, nk’uko dukunda kubibabwira, nimukorere ku ntego kugira ngo mushobore kwigira. Ntimukwiye kwisuzugura no kwisuzuguza.”

Umukobwa witwa Joselyne Izere Mucunguzi, umwe mu Nkubito z’Icyeza wiga ku Rwunge rw’Amashuri rwa Mère du Verbe, mu buhamya yatanze yashimiye Imbuto Foundation kuba yarafashije imiryango guhindura imyumvire ikava mu mitekerereze ya kera yashishikarizaga umukobwa kwita ku mirimo yo mu rugo kuruta gushakisha ubumenyi no kwita ku masomo yabo.

Yasabye bagenzi be kwirinda ubuhendabana butuma baterwa inda zitateguwe.

Yagize ati “Ndasaba abakobwa bagenzi banjye kwirinda ubuhendabana kuko buryohera buhanda, bugasiba isura yagushyigikiraga.”

Madamu Jeannette Kagame yanagarutse ku kibazo cy’icuruzwa ry’abana b’abakobwa rikorwa cyane cyane mu turere twegereye imipaka, atanga umukoro ku miryango, ubuyobozi n’abana, wo gushaka umuti w’iki kibazo no kugikumira.

Yagarutse ku iterambere ry’umugore mu Rwanda

Madamu Jeannette Kagame yibukije agaciro umugore yahawe n’ubuyobozi bw’igihugu, nk’inkingi mwikorezi y’iterambere ry’ibanze ry’u Rwanda.

Imibare ya Minisiteri y’Uburinganire n’Iterambere ry’Umuryango igaragaza ko umubare w’ingo ziyobowe n’abagore, bafite nibura konti mu kigo cy’imari wiyongereye.

Kuva mu 2012 kugeza mu 2014 wavuye ku bagore 27%, ugera kuri 44%. Abagore 42% bitabiriye gahunda ya Hanga Umurimo, naho 46 % bagana ibigo by’Imari byo kubitsa no kugurizanya.

Ubu abagore 54 % bafatanyije ubutaka n’abagabo babo, kandi mu bwumvikane busesuye.

Ibipimo kandi bigaragaza ko mu Rwanda, muri 2005, umugore umwe yabyaraga abana batandatu, kuva 2010 kugeza ubu, biragaragara ko umugore umwe, abyara abana bane, ibi bisobanuye ko bumvise gahunda yo kuboneza urubyaro.

Minisitiri w’Uburinganire n’Iterambere ry’Umuryango, Esperance Nyirasafari, yashimye politiki n’ingamba byo guteza imbere umuryango igihugu cyashyizeho, ariko asobanura ko icyatumye hategurwa ubukangurambaga bw’umuryango ari uko hakiri ibibazo mu miryango birimo amakimbirane, guteshuka ku nshingano kw’ababyeyi bamwe.

Ubu bukangurambaga bugamije kongera guhamagarira umuryango kugaruka ku nshingano zawo.

Minisitiri Nyirasafari yashimye ibikorwa bya Imbuto Foundation bikomeje gufasha Umuryango Nyarwanda binyuze muri gahunda yo guteza imbere uburere n’uburezi by’umwana w’umukobwa aho muhemba inkubito z’icyeza, gukwirakwiza gahunda mbonezamikurire y’abana bato (ECD), gahunda ya Malayika Murinzi ikangurira ababyeyi kwita ku mwana wese nk’uwawe, gahunda yo gufasha urubyiruko mu bijyanye n’ubuzima bw’imyororkere, gahunda yo gufasha ababyeyi banduye agakoko gatera SIDA kubyara abana bazima, n’izindi nyinshi.

Umuyobozi uhagarariye Ishami ry’Umuryango w’Abibumbye ryita ku bana, UNICEF mu Rwanda, Ted Maly, yavuze ko umuryango ari ishingiro rya byose kandi uburere bw’umwana butangira akiri muto.

Muri uyu muhango hashimiwe imigoroba y’ababyeyi mu kugira uruhare mu gukomeza imibanire y’imiryango no gusigasira uburenganzira bw’abana mu miryango, gushimira ba Malayika Murinzi bashyikirizwa inka, ndetse hanaremerwa imiryango itishoboye ngo yiteze imbere ive mu bukene.

Muri uyu muhango hanamuritswe ibikorwa byakozwe n’amashyirahamwe y’abagore n’ay’ urubyiruko birimo ikawa, imyambaro, imitako n’ibindi bikorwa by’ubugeni.

Madamu Jeannette Kagame n’abayobozi batandukanye mu gutangiza bukangurambaga bw’umuryango
Minisitiri Esperance Nyirasafari wa MIGEPROF yakomoje ku bijyanye n’ ubukangurambaga bw’umuryango
Umukobwa witwa Joselyne Izere Mucunguzi, umwe mu Nkubito z’Icyeza wiga ku Rwunge rw’Amashuri rwa Mère du Verbe
Abagize Itorero Abakunda Amahoro bishimira intambwe y’abagore bo mu cyaro
Madamu Jeannette Kagame ashimira abagize Umugoroba w'ababyeyi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved