Madamu Jeannette Kagame agaragaza ko bishoboka kurwanya kanseri y’inkondo y’umura ibangamiye cyane abagore

Yanditswe na Habimana James
Kuya 3 Ukuboza 2019 saa 10:02
Yasuwe :
0 0

Madamu Jeannette Kagame yavuze ko kanseri y’inkondo y’umura ari indwara ibangamiye Afurika bitewe n’umubare w’abagore ihitana agashimangira ko abantu bashyize hamwe yakumirwa ikanavurwa.

Yabigarutseho kuri uyu wa Kabiri muri Marriott Hotel, ubwo yari yitabiriye ikiganiro cyagarutse ku bufatanye mu kurwanya kanseri y’inkondo y’umura. Ni ikiganiro cyatanzwe muri gahunda z’Inama mpuzamahanga yiga kuri SIDA n’izindi ndwara zandurira mu mibonano mpuzabitsina (ICASA) iri kubera i Kigali.

Ni inama kandi yitabiriwe n’abafasha b’abakuru b’ibihugu barimo uwa Botswana, Niger, Tchad n’abandi bafatanyabikorwa.

Imibare igaragaza ko mu Rwanda hamaze kubarurwa abarwaye kanseri y’inkondo y’umura 1304 n’abandi 921 yahitanye.

Ni mu gihe kugeza ubu kandi abakobwa 93% uhereye ku myaka 12 bamaze guhabwa urukingo rwa kanseri y’inkondo y’umura.

Kanseri y’inkondo y’umura ishyirwa ku mwanya wa Kabiri muri Afurika mu zikunze kwibasira abagore kandi zikica benshi, mu Rwanda ho iza ku mwanya wa mbere. Agakoko ka Human Papillomavirus (HPV) kihariye 99.7% mu gutera kanseri y’inkondo y’umura.

Madamu Jeannette Kagame avuga ko iyi kanseri ibangamiye ubuzima bw’abagore bityo ikaba igomba kwitabwaho, kubera ko iyo urebye hari ubushobozi buke bugaragara mu bijyanye no kuyikingira no kuyirinda.

Yavuze ko inama nk’iyi ifasha kugira ngo buri wese agaragaze uruhare rwe mu guhangana n’iki kibazo cyibasiye cyane Umugabane wa Afurika.

Madamu Jeannette Kagame yavuze ko uburyo bwakoreshejwe bwatumye abagore bagera ku bihumbi 70 bari hagati y’imyaka 30-49 basuzumwa hamenyekana uko bahagaze. Binyuze mu muryango Imbuto Foundation, hakozwe ubukangurambaga mu turere intego ari ukurwanya iki kibazo.

Ati “Nk’uko OMS ibivuga kanseri y’inkondo y’umura ni indwara ya kane ku isi yica kandi muri Afurika ikaba iya kabiri mu ndwara zica abantu benshi gusa ikaba yakwirindwa, u Rwanda ruri mu bihugu bifite umubare munini w’abantu bafite iyi ndwara kuko ari abantu 31.9% mu bagore ibihumbi 10 n’ikigero cy’abapfa 24.1% ku bagore ibihumbi 10.”

Yavuze ko u Rwanda rwashyizeho imbaraga mu kurandura iki kibazo, kuko ufite ubwisungane mu kwivuza ashobora kwisuzumisha.

Ati “Inshingano yacu mu 2011 nk’uko twari twarabyihaye ubona ko turimo kugenda tubigeraho biturutse ku bafatanyabikorwa bacu benshi bari hano, ubu 93% by’abana b’abakobwa mu Rwanda bafite imyaka 12 baracyingiwe, ni iby’igiciro gikomeye kugira ngo dushyire hamwe imbaraga kandi tugire uburyo abantu bacu basuzumwa bakavurwa ku giciro gihendutse, twese mu nzego zacu tugomba gukoresha ikoranabuhanga kugira ngo twongere imbaraga."

Yavuze ko Umuryango wa Imbuto Foundation washyizeho ingamba zikomeye harimo gutanga ubufasha ku bafite ubwandu bwa virusi itera Sida, kwirinda no kuvurwa.

Umuyobozi w’Umuryango Mpuzamahanga UNITAID, Marisol Touraine, yashimiye Madamu Jeannette Kagame, uburyo akora ubuvugizi ngo hatezwe imbere iby’ubuzima mu Rwanda, by’umwihariko kurwanya iyi kanseri.

Yavuze ko kimwe cya kabiri cy’abatuye isi bakunze guhura n’ikibazo cyo kugerwaho na serivisi z’ubuzima, gusa ko mu Rwanda ho ubona ko hari gahunda nyinshi zifasha mu by’ubuzima harimo ibigo nderabuzima, ku buryo ushaka serivisi z’ubuzima ako kanya azibona.

Ati “Twavuga ko serivizi z’ubuzima hari igihe umuntu atazibona bitewe n’aho yakuriye ariko izo ngaruka ntabwo zikwiye kuba ikintu twemera, nk’ubu buri mwaka miliyoni 1.5 z’abagore bahura n’ikibazo cyo kurwara kanseri y’inkondo y’umura, tugomba kwegeranya imbaraga kugira ngo tubashe kubabonera uko bavurwa.”

Yavuze ko hagomba kubaho guhanga udushya kuko bifasha kuvura iyi kanseri y’inkondo y’umura iterwa cyane cyane n’Agakoko ka HPV, hakabaho kukamenya mbere kuko ari byo byafasha mu kuyirwanya.

Umuyobozi wa Partners in Health, Dr Joel Mubiligi, yavuze ko igihe hashyirwagaho Ibitaro bya Butaro bivura Kanseri habonetse abarwayi ba kanseri y’inkondo y’umura 63, mu mwaka wakurikiye bikubye kabiri, naho mu myaka itatu ho bageze kuri 200 buri mwaka.

Yagize ati “53% byabo baba bafite iyo kanseri kandi bari ku rwego rwa nyuma, dukeneye kugira ibigo bitanga imiti kuko iyo umaze kubaka uba ugomba no kugira imiti, kurwanya kanseri ni ibintu bihenze cyane ku buryo ingo zinjiza amafaranga adahagije bigoye kuba zakwivuza iyi ndwara. Hakwiye gutekerezwa uburyo iki kibazo cyashakirwa igisubizo.”

Lt Col Dr Mugenzi Pacifique uyobora Ikigo cya Kanseri mu Bitaro bya Gisirikare bya Kanombe we avuga ko kuva muri Werurwe 2019 batangiye kuvura iyi ndwara, abafite kanseri y’inkondo y’umura ni bo benshi kuko mu mezi icyenda bavuye abarwayi 300, muri bo 25% babaga bafite iyi kanseri y’inkondo y’umura.

Uwimpuwe Sidonie uhagarariye Umuryango Clinton Health Access Initiative (CHAI) yavuze ko ubusanzwe umuntu amenya ko arwaye abanje kwipimisha. Yashimangiye ko batangije gahunda yo kwipimisha mu bihugu birindwi birimo bitandatu byo muri Afurika birimo n’u Rwanda.

Minisitiri w’Ubuzima mu Misiri, Hala Zayed, we agaragaza ko mu kurandura ubu burwayi hakenewe ubushake bwa politiki.

Ati “Mu Misiri natwe twashyizeho uburyo bwo gupima ariko hari ibyo twakora harimo gupima gusa na mbere yo gupima tumenya ubushobozi buhari, kuko iyo upimye abantu ugomba kubizeza ko uzabavura nusanga barwaye, ugomba gushaka imiti abantu bashobora kwishyura.”

Umuyobozi w’Ishami rishinzwe kurwanya kanseri mu Kigo cy’Igihugu cy’Ubuzima (RBC), Dr Uwinkindi François, yavuze ko muri rusange ku Isi hagaragara ubwoko bwa kanseri zirenga 20, kanseri y’inkondo y’umura ikaba ariyo iza imbere cyane mu Rwanda.

Mu Rwanda mu 2018 hagaragaye abagore 362 bafite kanseri y’inkondo y’umura nubwo ngo abantu bashobora kuba ari bake bitewe n’ubukangurambaraga butaragera ahantu hose.

Madamu Jeannette Kagame yagaragaje ko nubwo kanseri y’inkondo y’umura ibangamiye abagore ariko ari indwara ishobora kwirindwa ndetse yavurwa igakira
Usanase Angéline yatanze ubuhamya bw'uburyo yakize kanseri y’inkondo y’umura
Minisitiri w'Ubuzima, Dr Gashumba Diane, atanga ubutumwa bwo kurwanya kanseri y’inkondo y’umura
Abitabiriye iyi nama baganirijwe ku ngamba zikwiye gufatwa mu guhangana na kanseri y'inkondo y'umura
Iyi nama iri muri gahunda z’iyiga kuri SIDA n’izindi ndwara zandurira mu mibonano mpuzabitsina (ICASA) iri kubera i Kigali

Amafoto: Imbuto Foundation


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza