Madame Jeannette Kagame yakoze ibilometero 10 muri Marathon Mpuzamahanga ya Kigali (Amafoto)

Yanditswe na Eric Tony Ukurikiyimfura
Kuya 16 Kamena 2019 saa 06:41
Yasuwe :
0 0

Madamu Jeannette Kagame yakoze ibilometero 10 byo mu cyiciro cya ‘Run For Peace’ muri Marathon Mpuzamahanga ya Kigali yabaye ku nshuro ya 15 kuri iki Cyumweru.

Marathon ya Kigali igamije kwimakaza amahoro binyuze mu mikino yabaye kuri iki Cyumweru, yitabiriwe n’abantu 3899 baturutse mu bihugu 55, aho basiganwe mu byiciro byayo uko ari bitatu birimo Marathon (ibilometero 42,195), igice cya Marathon (ibilometero 21,097) ndetse na Run For Peace (ibilometero 10).

Madame Jeannette Kagame na we yasiganwe mu cyiciro cya Run For Peace, aho yakoze intera y’ibilometero 10 n’amaguru ari kumwe na Minisitiri w’Umuco na Siporo, Nyirasafari Espérance ndetse na Meya w’Umujyi wa Kigali, Rwakazina Chantal hamwe n’abandi banyacyubahiro batandukanye.

Mu cyiciro cya Marathon cyakozwe ku ntera y’ibilometero 42, isiganwa ryegukanwe na Philip Kiplimo wo muri Uganda naho mu bagore aba Jepchirchir Korir na we wo muri Kenya.

Mu gusiganwa igice cya Marathon (Half Marathon) ku ntera y’ibilometero 21, uwa mbere mu bagore yabaye Chepchirchir Celestine wo muri Kenya, mu bagabo aba Kiminine Shadrack wo muri Kenya.

Marathon Mpuzamahanga ya Kigali yatangiye kuba mu 2005 ishyigikiwe na Perezida Paul Kagame. Irushanwa ry’uyu mwaka ryahurijwe hamwe no kwibuka abatutsi bishwe muri Jenoside mu 1994.

Umuyobozi w’Ishyirahamwe ry’Imikino ngororamubi mu Rwanda, Mubiligi Fidèle, yavuze ko isiganwa ry’uyu mwaka ryagenze neza n’ubwo abanyarwanda batabashije kwegukana imidali ya mbere.

Ati “Isiganwa ryagenze neza muri rusange kandi mwabonye ko ryitabiriwe n’ibyiciro byose birimo n’abayobozi bakuru. Ku bijyanye n’abatsinze, ubushize Igice cya Marathon cyari cyatwawe n’abanyarwanda ariko uyu mwaka nta munyarwanda twabonye, twagize uwabaye uwa kabiri mu bakobwa, ni ibisanzwe mu irushanwa habaho gutsinda no gutsindwa. Uyu mwaka haje abarushanwa bakomeye kuko twongereye ibihembo.”

Abanyarwanda batatu bitwaye neza kurusha abandi muri buri cyiciro cya Marathon Mpuzamahanga ya Kigali na bo bagiye bagenerwa ishimwe.

Madamu Jeannette Kagame yitabiriye iri siganwa mu cyiciro cya Run For Peace kireshya n'ibilometero 10
Madamu Jeannette Kagame asuhuza abantu barebaga abasiganwa
Madamu Jeannette Kagame akunze kugaragara mu bikorwa bya siporo mu buryo buhoraho
Madamu Kagame mu ifoto y'urwibutso n'abandi bayobozi bitabiriye iri siganwa mu cyiciro cya Run For Peace. Uhereye ibumoso hari: Minisitiri w'Uburinganire n'Iterambere ry'Umuryango, Nyirahabimana Solina; Umuyobozi Mukuru w’Ikigo gishinzwe Mine, Peteroli na gas, Francis Gatare; Minisitiri w’Ubucuruzi n’Inganda, Soraya Hakuziyaremye; Minisitiri mu Biro bya Minisitiri w’Intebe Ushinzwe Imirimo y’Inama y’Abaminisitiri, Kayisire Marie Solange; Minisitiri w’Umuco na Siporo,Nyirasafari Espérance; Meya w’Umujyi wa Kigali, Rwakazina Marie Chantal; Umuyobozi Mukuru wa Imbuto Foundation, Umutoni Sandrine n’Umujyanama wa Madamu Jeannette Kagame, Radegonde Ndejuru
Akanyamuneza kari kose ku bitabiriye iyi marathon...
Abantu bagera ku 3900 nibo bitabiriye iri siganwa
Abasozaga iri siganwa, bahabwaga amazi kugira ngo bice icyaka
Muri Stade hari abakaraza basusurutsa abitabiriye iyi marathon
Alain Numa ukora muri MTN nawe yari mu bitabiriye iri siganwa
Nyampinga w'u Rwanda mu 2019, Nimwiza Meghan nawe yitabiriye iyi marathon
Ba Nyampinga b'u Rwanda, Iradukunda Elsa (2017) na Iradukunda Liliane (2018) nabo birukanse mu ntera y'ibilometero 10
Abakozi ba Imbuto Foundation nabo bari bitabiriye bambaye ubururu
Umubare munini w'abitabiriye iyi marathon wari urubyiruko
Kugera ku murongo aho isiganwa ryasorezwaga, byabaga ari igikorwa gikomeye
Uyu yahise areba ku isaha ngo amenye ibihe yakoresheje
Abashinzwe ubutabazi babaga bari hafi ku buryo bita ku barangije isiganwa
Kiminine Shadrack wo muri Kenya ni we wahize abandi mu kwiruka intera y'ibilometero 21 aho yacyuye $2500
Jepchirchir Korir wo muri Kenya ni we wabaye uwa mbere ku ntera y’ibilometero 42
Mu cyiciro cya Marathon cyakozwe ku ntera y’ibilometero 42, isiganwa ryegukanwe na Philip Kiplimo wo muri Uganda wahembwe ibihumbi bitanu by'amadolari
Byari ibyishimo kuri batatu ba mbere ubwo bari bamaze kwambikwa imidali
Abakozi ba Imbuto Foundation bafata ifoto y'urwibutso nyuma yo gusoza isiganwa mu gice cy'abishimishaga
Ambasaderi w'Umuryango w'Ubumwe bw'u Burayi mu Rwanda, Nicola Bellomo ari kumwe na Ambasaderi wa Ethiopie, Lulit Zewdie Gebremariam

Amafoto: Himbaza Pacifique na Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza