Lt Col Rwasanyi yavuze uko interahamwe 500 zitwaje imihoro zashatse kurwanya ingabo za RPA

Yanditswe na Habimana James
Kuya 17 Kamena 2019 saa 07:43
Yasuwe :
0 0

Umuyobozi w’Ingabo mu Karere ka Kicukiro, Lt Col Sam Rwasanyi, yavuze ko uburyo abateguye Jenoside yakorewe Abatutsi bamaze igihe bigisha ubugome bwo kwanga abatutsi, byatumye ingabo zari iza RPA, zigera mu Majyepfo y’u Rwanda, zigaterwa n’interahamwe zitwaje imihoro

Mu busanzwe bizwi ko iyo umuntu afite imbunda bitorohera uwo ariwe wese kuba yamurwanya mu gihe we nta mbunda afite.

Lt Col Rwasanyi yabwiye abanyeshuri ba Kaminuza y’Amahoteli, Ubukerarugendo, Ikoranabuhanga n’Ubucuruzi (UTB), ubwo bibukaga Jenoside yakorewe Abatutsi ko kugira ngo ibe, abayiteguye babanje kuvana ubumuntu mu kiremwamuntu, ku buryo byageze aho umuntu yumva ko we atakiri umuntu.

Yavuze ko ikintu cya mbere abateguye Jenoside babanje gukora ari ugusenya ubumuntu butuma abantu bibagirwa indangagaciro zabo, bakibagirwa ko babyawe cyangwa babyaye, ku buryo umuntu adatekereza ko afite umubiri ushobora kubabara.

Lt Col Rwasanyi mu kugaruka uko abantu bari barabaye nk’ibyihebe, yavuze ku byo yabonye mu 1994 ubwo ingabo zari iz’Inkotanyi zarimo zirwanya abarimo gukora Jenoside, zigatungurwa no kubona Interahamwe zitwaje imihoro zitinyuka kurwanya abari bafite imbunda kubera ko bari Abatutsi.

Yagize ati “Impamvu mbivuga mu 1994 wabaga urimo kurwana ukajya kubona ukabona haje abantu bavuga ngo baje gutera Inkotanyi kandi nyamara abasirikare twarwanaga bahunze ndetse n’Abafaransa bari baje kubafasha na bo banze kuhagera kandi aribo bafite ibikoresho bikomeye.”

Yakomeje agira ati “Tugeze mu Majyepfo hari umusozi witwaga Kanyarira, nka saa tanu twari hejuru y’ako gasozi mbona haje igitero cy’Interahamwe nka 500, mbwira abasirikare banjye nti ese aba bantu bameze gute? Abo twarwanaga bahunze kandi aribo bari bafite imbunda na buri kimwe none bo bazanye imihoro? ariko mbere bakiza twabanje gukeka ko wenda ari abantu bahungutse, ariko twaje gutungurwa n’uko ubwo bari bageze nko muri metero 800 batangiye kutuvugiriza amafirimbi barasa na bwa busasu (imbunda ibamo isasu rimwe) ndetse batera n’imihoro hejuru.”

Yavuze ko ibi byamugaragarije ko mu kwigisha abantu ubugome, abateguye Jenoside babanje no kubavanamo ubumuntu kandi ibi byose bikorwa imyaka myinshi.

Umuyobozi Mukuru wungirije ushinzwe Amasomo, Ubushakashatsi n’Imyigire muri UTB, Prof Dr. Tombola Gustave, yavuze ko mu gihe cyo Kwibuka ari ngombwa gukomoza ku bugwari bwaranze abanyarwanda bamwe ariko bakanibuka abagize ubutwari.

Ati “Turibuka ubugwari bwa leta yateguye igashyira mu bikorwa Jenoside yakorewe Abatutsi, turibuka kandi ubugwari bw’abanyarwanda bashishikajwe no kwica bagenzi babo bakanabyemera, iyo umuntu aje kwibuka si ugukora urugendo gusa ajye azirikana yibuke ubwo bugwari bw’abo bantu.”

“Iyo wibutse ibigwari biba bivuze ko uzarahanira kutaba ikigwari, twese uko turi aha icyo tugomba kuzirikana ni uko tutagomba kuzaba ibigwari. Ikindi twibuka ni ubutwari bw’abana b’abanyarwanda, ingabo zari iza FPR-Inkotanyi zahagaritse Jenoside. Iyo tubwibutse bituma tuzirikana ko ubugwari aho buva bukagera tugomba kubwanga.”

Lt Col Rwasanyi yasobanuye uko Interahamwe 500 zaje kurwanya Inkotanyi zitwaje imihoro
Abanyeshuri n'abakozi ba UTB bibutse ku nshuro ya 25 Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza