Leta Zunze Ubumwe z’Abarabu zahaye u Rwanda amagare 75 y’abafite ubumuga

Yanditswe na Thamimu Hakizimana
Kuya 27 Ugushyingo 2019 saa 10:30
Yasuwe :
0 0

Leta Zunze Ubumwe z’Abarabu (UAE) zahaye Guverinoma y’u Rwanda inkunga y’amagare 75 y’abafite ubumuga afite agaciro ka miliyoni 30 Frw mu rwego rwo gufasha abafite ubw’ingingo.

Kuri uyu wa Gatatu, tariki ya 27 Ugushyingo 2019, nibwo Ambasaderi wa UAE mu Rwanda, Hazza Mohammed Falah Kharsan, yashyikirije abaturage 30 bafite ubumuga bw’ingingo amagare 30 muri 75 yagenewe u Rwanda azabafasha mu buzima bwabo bwa buri munsi.

Aya magare yagenewe abafite ubumuga, buri rimwe rifite agaciro k’ibihumbi 400 Frw.

Uyu muhango wabaye mu gihe ku wa Kabiri tariki ya 26 Ugushyingo 2019, ari bwo mu Rwanda hatangiye icyumweru cyo kwita ku bafite ubumuga kizasozwa ku wa Gatatu w’icyumweru gitaha.

Ambasaderi Hazza Mohammed yashimye Leta y’u Rwanda uburyo yita ku bafite ubumuga anashimangira ko ibihugu ahagarariye nabyo bizakomeza kubafasha.

Yagize ati “Turashima Leta y’u Rwanda uburyo ikomeza kwita ku bafite ubumuga kandi ikindi kuba aba bantu bafite ubumuga ntibivuze ko badashoboye ahubwo njye mbona bafite ubushobozi.”

Yongeyeho ko bahisemo gufasha abafite ubumuga kuko mu gihugu cyabo ubu bari mu kwezi kw’impuhwe.

Umunyamabanga wa Leta muri Minisiteri y’Ubutegetsi bw’Igihugu (Minaloc) ushinzwe Imibereho Myiza y’abaturage, Nyirarukundo Ignatienne, yasabye abafite ubumuga kwirinda gusabiriza ku mihanda kuko atari cyo gisubizo cy’ibibazo byabo.

Ati “Kuza ku muhanda ntibyemewe kandi ntibizihanganirwa bitari uko wenda bitanga isura mbi ku bantu banyura ku muhanda kuko ntacyo biba bibabwiye ahubwo bitanga isura mbi ku muntu ku giti cye kubera ko gusabiriza ntabwo biha ubikora agaciro.”

“Kuba gusabiriza bidaha ubikora agaciro birasaba ko ufite ubumuga akwiye kujya aho ubufasha buri kuko hari ibihugu bimwe binyuza ubufasha kuri za kiriziya ariko hari n’ibihitamo kunyuza ubufasha bw’abatishoboye ku mirenge.”

Yongeyeho ko mu Rwanda ubufasha bw’abatishoboye buba buri ku mirenge ku buryo ugize ikibazo ariho yagakwiye kujya kubusaba aho kujya gusabiriza ku muhanda.

Muhawenimana Shakila ufite ubumuga bw’ingingo yanyuzwe no kubona igare rishya kuko iryo yari afite ryari rishaje.

Ati “Nishimye cyane kubera ko igare ryanjye ry’ubururu nari mfite ryari rimaze gusaza cyane ntakibasha kurigenderaho, kuba mbonye iri rizamfasha cyane kandi rwose n’uwarimpaye Imana izamwongerere aho yavanaga inamuhe imigisha myinshi.”

Umuhango wo gutanga amagare ku bafite ubumuga wabereye mu Murenge wa Muhima mu gihe kuri uyu wa 27 Ugushyingo 2019, muri Lemigo Hotel habereye inama igamije kurebera hamwe uko iyubahirizwa ry’uburenganzira bw’abafite ubumuga rishyirwa mu bikorwa.

Muhawenimana Shakila ufite ubumuga bw’ingingo yishimiye cyane guhabwa igare rishya kuko iryo yari afite ryari ryarashaje
Ku ikubitiro hatanzwe amagare 30 ku bafite ubumuga bw’ingingo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza