00:00:00 IGIHE NETWORK KN KINYARWANDA EN ENGLISH FR FRANCAIS

Leta yashyize Miliyari 10 Frw mu gusana ibyangijwe n’ibiza mu mwaka umwe

Yanditswe na Prudence Kwizera
Kuya 9 Ugushyingo 2021 saa 04:13
Yasuwe :
0 0

Minisiteri y’Ibikorwa by’Ubutabazi, MINEMA, yasabye Abanyarwanda gushyira ingufu mu gukumira ibiza no kubyirinda kuko iyo bibibasiye bibatwara ubuzima, bikanabashyira mu gihombo.

Umunyamabanga Uhoraho muri Ministere Ishinzwe Ibikorwa by’Ubutabazi, Olivier Kayumba, yagaragaje ko Leta itanga amafaranga menshi mu gusana ibyangijwe n’ibiza nyamara bishoboka kubyirinda.

Yabigarutseho mu mpera z’icyumweru gishize ubwo yifatanyaga n’abaturage bo mu Kagari ka Byinza mu Murenge wa Kinazi mu karere ka Huye, gukora umuganda hasanwa inzu zasenywe n’imvura nyinshi ivanze n’inkubi y’umuyaga.

Ati “Ibyabaye hano ni umuyaga wasenyeye abaturage, wari ukomeye koko ariko ugasanga hagati y’amazu atatu hari inzu imwe yagurutse igisenge, izindi zigasigara kuko ziziritse neza. Icyo tubasaba rero ni ukumenya uburyo bwiza bwo kubaka kugira ngo birinde ibiza.”

Imibare intangwa na MINEMA igaragaza ko mu mwaka ushize w’ingengo y’imari wa 2020/21, Leta y’u Rwanda yakoresheje amafaranga arenga Miliyali 10 mu bikorwa byo gusana ibyangijwe n’ibiza hirya no hino mu gihugu.

Kayumba yabagiriye inama yo kujya bibuka kuzirika ibisenge by’inzu, guca imiyoboro n’ibyo bifata amazi kandi bagatera ibiti kugira ngo bitangire umuyaga.

Ati “Igisenge kukizirika ni amafaranga ibihumbi bitandatu nk’uko umwubatsi yabitubwiye, ariko iyo utakiziritse kikaguruka uhita utakaza amafaranga ibihumbi 198 by’amabati wasakaje.”

Bamwe mu baturage bo mu Kagari ka Byinza babwiye IGIHE ko ibiza by’imvura n’umuyaga biherutse kubasenyera byabasigiye isomo.

Njangwe Venant ati “Ikiza cyatwibasiye cyaduhaye isomo ko tugomba kuzirika inzu tukazikomeza kandi tukubaka inzu zikomeye, kuko inzu nyinshi za hano iwacu zarangiritse cyane.”

Mukagashugi Jeanette we avuga ko bagiye kongera gutera ibiti ku bwinshi nk’uko mbere byari bimeze.

Ati “Mbere hano hari ibiti byinshi byaturindaga umuyaga ariko urabona ko twabitemye tubimaraho hasigara ari ubutayu. Ubu rero icyo ubuyobozi bwadusabye kandi turi gukora ni ukongera gutera ibiti kandi ntitwongere kubyangiza tubitemera rimwe. Niba bikuze ni ukujya kubisarura twateye ibindi.”

MINEMA igaragaza ko mu gihugu hose mu kwezi kumwe, kuva ku itariki ya 1 Nzeri kugeza kuya 30 Ukwakira 2021 ibiza byishe abantu 28 bikomeretsa abagera kuri 50, byangiza inzu z’abaturage 848 n’ibihingwa biri ku buso bwa hegitari zirenga 1493.

Byishe inka 18 n’andi matungo magufi 287; byangiza amashyamba ku buso bwa hegitali 39; bisenya ibyumba by’amashuri 137 n’insengero eshanu; byangiza umuhanda umwe n’ibiraro bibiri.

Byasenye ibiro by’ubuyobozi bitatu; byangiza imiyoboro y’amazi 20, bisenya n’uruganda rumwe.

Abasenyewe n'ibiza bahawe amabati yo gusakaza inzu zabo
Abaturage bagiriwe inama yo kujya bibuka kuzirika ibisenge by'inzu zabo, gufata amazi y'imvura no gutera ibiti birindi ibiza
Mu kagali ka Byinza imvura yangije inzu nyinshi
Habaye umuganda wo gusanira abasenyewe n'ibiza
Imvura irimo umuyaga iherutse gusenyera abaturage bo mu Kagari ka Byinza
Inzu zitandukanye zo mu Kagari ka Byinza zasenywe n'ibiza mu kwezi gushize
Abaturage bavuze ko bigiye isomo mu ngaruka batewe n'ibiza mu kwezi gushize
Umunyamabanga Uhoraho muri Ministere Ishinzwe Ibikorwa by’Ubutabazi, Olivier Kayumba, yagaragaje ko Leta itanga amafaranga menshi mu gusana ibyangijwe n’ibiza nyamara bishoboka kubyirinda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .