Leta yasabwe guhana abateza ibihombo bishingiye ku micungire y’abakozi itarindiriye inkiko

Yanditswe na Evariste Nsengimana
Kuya 3 Ugushyingo 2018 saa 09:48
Yasuwe :
0 0

Komisiyo y’igihugu y’Abakozi ba Leta, yatangaje ko yakoze igenzura igasanga hari abayobozi bahora mu makosa ashingiye ku micungire idahwitse y’abakozi, ibasabira gufatirwa ibihano hadategerejwe imyanzuro y’inkiko.

Byatangajwe na Perezida w’Inama y’Abakomiseri muri iyi komisiyo, Habiyakare François, mu kiganiro yagiranye n’abanyamakuru kuri uyu wa 2 Ugushyingo.

Cyibanze kuri raporo y’ibikorwa byayo by’umwaka wa 2017/2018 iheruka gushyikiriza Inteko rusange y’Inteko Ishinga Amategeko, imitwe yombi.

Habiyakare yavuze ko ‘Hari abayobozi mu bigo bya Leta bakora amakosa ashingiye ku micungire y’abakozi, rimwe na rimwe bitewe n’ubumenyi buke cyangwa ubushake bwabo bigateza igihombo.’

Yatanze urugero aho ‘Umukozi agera igihe cyo kujya mu kiruhuko cy’izabukuru ugasanga ntiyigeze atangirwa imisanzu nta n’uburyo bwo guhabwa impamba yateganyirijwe.’

Ati “Ntabwo byumvikaba ko umuntu agera igihe cyo kujya mu kiruhuko cy’izabukuru, ukaba aribwo ubona ko amafaranga yo kumuha impamba atateganyijwe, ukaba aribwo ubona ko atigeze atangirwa imisanzu mu bwiteganyirize bw’abakozi”.

Hari kandi aho usanga abayobozi bamwe bafatira ibihano abakozi byo ku rwego batemerewe birimo nko kwirukanwa, abandi bagasezererwa hari amafaranga agenerwa abagiye mu butumwa bw’akazi batahawe n’ibindi.

Habiyakare yavuze ko ‘kuba bagenzura bagasangamo ayo makosa bataribwirije kuyakosora, byumvikanisha ko baba batazi ko ahari nta n’ibihano abayakoze bahabwa.’

Ibyo bigira ingaruka ku bukungu bw’igihugu kuko uwarenganyijwe hari igihe arenganurwa yabanje kwitabaza inkiko, Leta igatsindwa ikishyura irengejeho n’indishyi.

Habiyakare ati “Kuki bategereza ko bijya mu nkiko? Kuki baba batayamuhaye kare?..Guverinoma itere intambwe ijye ihana abantu batakurikije amategeko muri ibi byo gucunga abakozi nk’uko ihana abatayakurikije mu gucunga amafaranga.”

Habiyakare yavuze ko abo ‘Bakwiye gufatirwa ibihano byo mu rwego rw’ubutegetsi birimo; kwirukanwa, kugawa n’ibindi nk’ibyo’ naho ibyo kwishyuza amafaranga bahombeje Leta bikaba aribyo bikorwa bibanje guca mu nkiko.’

Leta y’u Rwanda yatakaje miliyoni 224 Frw biturutse ku byemezo binyuranyije n’amategeko byagiye bifatirwa abakozi bayo bakayijyana mu nkiko, hagati ya Nyakanga 2015 na Kamena 2017, mu gihe mu myaka itatu yabanje yari yahombejwe miliyoni 524 Frw.

Habiyakare yavuze ko hari abayobozi mu bigo bya Leta bakora amakosa ashingiye ku micungire y’abakozi, rimwe na rimwe bitewe n’ubumenyi buke cyangwa ubushake bwabo bigateza igihombo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza