Kwamamaza

Leta yagobotse abari barabuze urubyaro ishimangira ibyo kororoka hifashishijwe ikoranabuhanga

Yanditswe kuya 20-09-2016 saa 23:05' na Philbert Hagengimana


Uko iminsi igenda yicuma niko ikoranabuhanga riri gukataza rikagera no mu mibereho bwite ya muntu. Hakunze kuvugwa imiryango ibura urubyaro burundu nk’aho umugore ashobora kudasama mu gihe umugabo yujuje inshingano ze, magingo aya amategeko mashya aha uburenganzira abashakanye ko bashobora kugana abaganga hakifashishwa ubundi buryo bwatuma babona urubyaro.

Itegeko No 32/2016 ryo kuwa 28/8/2016 rigenga abantu n’umuryango, ryasohotse mu igazeti ya Leta kuwa 12 Nzeri 2016, riteganya uburyo bwo kororoka kw’abantu hifashishijwe ikoranabuhanga, icyo kikaba ari kimwe mu bishya bitari biri mu itegeko nº 42/1988 ryo ku wa 27 Ukwakira 1988 ryahinduwe nyuma y’imyaka 28 ryari rimaze.

Nk’uko byasobanuwe na Minisitiri w’Ubutabera akaba n’Intumwa Nkuru ya Leta, Johnston Busingye, kororoka hakoreshejwe ikoranabuhanga bivuze ko umuntu ashobora kujya mu ivuriro rishobora guhuza intanga ibizwi nka IVF (In Vitro Fertilization), umugore n’umugabo bakabafasha kubona urubyaro batabanje kujya mu buriri ngo baryamane.

Minisitiri Busingye yagize ati “Ubundi iyo umuntu ashatse undi bakajya mu buriri ntibikunde baravuga ngo byaranze. Ubu siyansi yazanye akandi kantu kavuga ngo hari impamvu nyinshi bishobora kwanga, ariko ubwanyu muri abantu bazima bashobora kubyara abana, mureke tubafashe, mukaba mwakororoka biciye muri izo nzira.”

Ubwo buryo bwa IVF ubusanzwe bufasha ababyeyi bafite ibibazo byo kuba badasama mu buryo busanzwe, aho umugore ategurwa, agahabwa imiti kugira ngo amagi ashobora kuvamo umwana aboneke. Nyuma yo kuboneka avanwa mu mubiri we agashyirwa muri laboratwari.

Ubwo buryo bwaratangiye no gukoreshwa mu Rwanda, ndetse muri Kanama umwaka ushize wa 2015, ni bwo havutse imfura z’ubwo buryo zikaba zari n’impanga.

Icyo gihe, Dr Eugene Ngoga, Inzobere mu kuvura abagore, yabwiye IGIHE ubu buryo bwatangiye mu Rwanda mu mwaka wa 2014, ari na bwo bukoreshwa n’ahandi hose ku Isi, aho igice cya mbere ari uguhuza intanga z’umugore n’iz’umugabo ariko bikorewe hanze y’umubiri.

Bitandukanye n’ibyo abantu bavuga ko intanga zishobora gushyirwa ahantu hamwe kugeza amezi icyenda ashize.

Inkuru bifitanye isano: Bwa mbere mu Rwanda havutse abana hifashishijwe ikoranabuhanga rihuza intanga

Minisitiri Busingye yavuze ko itegeko rishya rigena ibyo kororoka hifashishijwe ikoranabuhanga rizafasha abari barabuze urubyaro

Ntawe ushobora gushyingirwa adafite imyaka 21

Uretse kororoka hifashishijwe ikoranabuhanga, mu Itegeko rishya rigenga abantu n’umuryango, imyaka y’ubukure yashyizwe kuri 18 uretse mu gushyingirwa ho byagumye ku myaka 21, ndetse byagizwe ibidashoboka kuba umuntu yashyingirwa adakwije iyo myaka 21.

Minisitiri Busingye ati “Ubundi mbere muzi ko mbere hajyaga habaho uburyo Minisitiri ashobora kwemera ngo uyu muntu arakuze kandi atarageza iyo myaka bitewe n’impamvu. Ubu icyo na cyo Inteko Ishinga Amategeko yaratekereje mu izina ry’Abanyarwanda bose, isanga umwana w’umukobwa cyangwa umuhungu akwiriye kuba arengeje imyaka 21 kugira ngo ahinduke umugabo cyangwa umugore ku mpamvu nyinshi: kugira ngo haboneke umwanya wo kwiga, kugira ngo umuntu akure, abe yagira ubushobozi bwo kwibeshaho nk’umuntu mukuru.”

Umugore nawe ni umuyobozi w’urugo

Mu gihe byavugwaga ko umugabo ari we muyobozi w’urugo, itegeko rishya riteganya ko umugabo n’umugore bombi ari abayobozi b’urugo, bityo ibyo bashaka gukora baba bagomba kubyumvikanaho.

Icyakora Minisitiri Busingye ngo atekereza ko ayo mategeko atazabuza umuryango w’umunyarwanda gukomeza kubaho nk’umuryango w’umunyarwanda, kuko ayo mategeko ajyaho kugira ngo abe igisubizo igihe byakomeye gusa.

Ati “Ibyo byakuyeho icyavugaga ko ufata icyemezo ari umuntu umwe, icyakora sintekereza ko umugabo n’umugore mu rugo bazajya baba bicaranye itegeko, buri gitondo bakazana igitabo cy’itegeko bakagishyira ku meza, bati ubwo tugiye kunywa icyayi turebe ingingo ya gatandatu, ubwo tugiye gukinga urugi turebe ingingo ya munani, ubwo tugiye kugurisha ikimasa turebe ingingo ya cumi, ubwo dushaka kwimuka aha turebe ingingo ya 20.”

Minisitiri Busingye n'Umunyamabanga Uhoraho muri Minisiteri y'Ubutabera, Isabelle Kalihangabo
Umunyamabanga Uhoraho muri Minisiteri y'Ubutabera, Isabelle Kalihangabo
Umunyamakuru wa Royal FM, Placide Ngirinshuti abaza ikibazo

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved