Kwamamaza

Leta y’u Rwanda yashoye miliyari zigera kuri 30 mu kurwanya Malariya

Yanditswe kuya 26-09-2016 saa 08:07' na Ntakirutimana Deus


Abanyarwanda hafi miliyoni 12 bagiye guhabwa inzitiramibu zigeze kuri miliyoni esheshatu zizatwara akayabo k’amafaranga y’u Rwanda agera kuri miliyari 30 mu rwego rwo kurwanya Malariya.

Malariya ni imwe mu ndwara zimaze iminsi zibasira benshi mu Rwanda. Mu rwego rwo guhangana nayo Minisiteri y’Ubuzima yatangaje ko yafashe ingamba zitandukanye ngo hatazagira umunyarwanda wongera guhitanwa nayo.

Umunyamabanga wa Leta muri Minisiteri y’Ubuzima, Dr Ndimubanzi Patrick yazisobanuye ubwo yifatanyaga n’abatuye Akarere ka Ruhango areberera, mu muganda rusange ngarukakwezi wabaye ku wa Gatandatu tariki ya 24 Nzeri 2016.

Yavuze ko mu mpera z’umwaka usanga Malariya yiyongera, kuko muri icyo gihe cy’imvura usanga n’imibu yiyongereye.

Yagize ati “Tugiye kuzatanga inzitiramibu zigera kuri miliyoni esheshatu twatumije, turakangurira abantu bose kuziryamamo. Turabasaba kuzifata neza, kuko zirahenze cyane ku gihugu kiba cyavuze ngo mu rwego rwo kurinda ubuzima bw’abaturage bacu, reka tuzibagurire.”

Ndimubanzi yavuze ko inzitiramibu imwe ifite agaciro k’amadorali ya Amerika agera kuri atanu, ni ukuvuga ibihumbi hafi bitanu by’amafaranga y’u Rwanda buri nzitiramibu. Kuba u Rwanda rwaratumije izigera kuri miliyoni esheshatu ni ukuvuga ko biteganyijwe ko abantu babiri bazasangira imwe.

Abazirobesha n’abazifashisha mu bworozi bazafatirwa ibihano

Uburyo izo nzitiramibu zihenze n’imbaraga Leta y’u Rwanda yafashe mu guhangana na Malariya ikomeje guhitana Abanyarwanda benshi, uzakoresha nabi izo nzitiramibu bishobora kutazamugwa neza, nkuko Dr Ndimubanzi yabigarutseho.

Ati “Turabasaba kutazikoresha nabi, bamwe usanga baratangiye kuzicamo uduce bakazikoramo ibikoresho bifashisha mu koga (gant), abandi batangiye kuzirobesha, kandi ziba zahenze cyane. Hari ibindi bintu byinshi Leta iba yigomwe gukora kugira ngo izigeze ku baturage. Muzifate neza mujye muzimesa n’isabune isanzwe mwirinde kuzanika ku zuba nkuko babibakangurira.”

Mu zindi ngamba zo kurwanya iyo ndwara, Abanyarwanda barakangurirwa kwirinda umwanda, kuvanaho ibigunda bikikije ingo ndetse n’ibimene by’amacupa, ibicuma n’ibindi bishobora guha imibu urwaho ikabona aho kororokera n’ibindi.

Abarwayi kandi barasabwa kujya kwa muganga igihe cyose babonye ibimenyetso by’iyo ndarwa, bakivuza neza kuko ngo ntawe yahitana mu gihe yayivuje nk’uko bisabwa kandi ku gihe.

Ndimubanzi ati “Tubyiteho cyane umwaka ushize twagize malariya nyinshi cyane, hari n’abo yishe, ariko ubundi Malariya nta muntu yakagombye kwica, iyo wivuje hakiri kare, ukabona imiti kare.”

Mu zindi ngamba zafashwe, inzu zo mu turere dushyuha kurusha utundi dukunze kwibasirwa na Malariya zigiye guterwamo imiti yica imibu, nayo ihenze ugereranyije n’iyajyaga ihaterwa.

Umunyamabanga wa Leta muri Minisiteri y’Ubuzima, Dr Ndimubanzi Patrick ashimangira ko Leta yafashe ingamba zo guhashya Malariya

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved