Leta n’abikorera basanga nta mpamvu yo kugura ibikoresho by’ubwubatsi mu mahanga

Yanditswe na Ishimwe Israel
Kuya 23 Ugushyingo 2016 saa 09:51
Yasuwe :
0 0

Abahanga mu myubakire bahuriza na Leta ku ngingo y’uko mu Rwanda hasigaye hakorerwa ibikoresho byakwifashishwa mu bwubatsi, kandi bigafasha mu kutangiza ikirere ugereranyije n’ibitumizwa mu mahanga.

Ibi byatangarijwe mu nama mpuzamahanga yatangirijwemo Umuryango Nyarwanda ugamije imyubakire irengera ibidukikije (Rwanda Green Building Organization-RwGBO) kuri uyu wa Kabiri, tariki ya 21 Ugushyingo 2016.

Umuyobozi Mukuru w’Ikigo cy’Igihugu gishinzwe kurengera ibidukikije (REMA), Ruhamya Colette, yavuze ko mu Rwanda hakigaragara imyubakire itarengera ibidukikije aho usanga abantu bakenera ibyuma bitanga amahumbezi mu nzu bitwara umuriro w’amashanyarazi ndetse bacana n’amatara ku manywa n’ibindi byangiza ikirere.

Yavuze ko igihe kigeze ngo mu Rwanda hatezwe imbere imyubakire irengera ibidukikije nkuko bikorwa mu bihugu nka Singapore aho usanga bubaka inyubako zikoresha imirasire y’izuba ndetse zinafasha gukoresha ibikoresho birimo Frigo.

Ruhamya asanga u Rwanda rufite ibikoresho byakoreshwa mu bwubatsi byakemura n’ikibazo cyo kwangiza ikirere.

Ati “Ibyo ni ibikorwa byiza dushaka gukora aho bishoboka, kandi tugakoresha ibikoresho by’ibanze dufite mu Rwanda. Mubona ko abantu iyo tugiye kubaka tugakura ibintu mu Bushinwa usanga harimo imyuka myinshi yangiza ikirere, kandi nihagira icyangirika uzasubira kugishaka mu Bushinwa. Turashaka kureba ni gute twebwe twakoresha ibintu dufite tukabyubakisha, tukajya dutumiza bike cyane, nibwo twakubaka bya bindi birambye.”

Ruhamya yavuze ko ikoreshwa ry’ibikorerwa mu Rwanda rizafasha mu gushyira mu bikorwa ivugururwa ry’amasezerano ya Montréal ryemerejwe i Kigali ryo kugabanya imyuka yangiza ikirere.

Umuyobozi w’Ikigo gishinzwe imiturire mu Rwanda (RHA), Eng Didier Sagashya yavuze ko ibi bikoresho bihari ku bwinshi.

Ati “Ibikoresho birahari, amabuye yo kubaka n’imicanga biri mu Rwanda, isima, imbaho, amakaro, amarangi, n’amabati birahari, ibyuma bikorerwa mu Rwanda. Ikintu abantu batazi nuko kubivana mu mahanga nabyo byangiza ikirere.”

Sagashya yakomeje avuga ko ibyo bikoresho bizanwa mu bwato butumura imyuka yangiza ikirere ndetse n’imodoka.

Ati “Icyiza ni ukubigura mu Rwanda, kuko ni no guteza imbere ibihakorerwa.”

Umuyobozi wa RwGBO, Kayumba Eudes, yavuze ko abona gukoresha ibikomoka mu Rwanda byagira akamaro gakomeye.

Ati “Turabyizera ko hari ibikoresho bihagije mu kubaka inyubako yujuje ubuziranenge utaguze ibikoresho hanze. Abaje kudutera inkunga ni abakora ibikoresho byo kubaka banabigurisha bo mu Rwanda. Byinshi ubu birakorerwa mu Rwanda, uturutse ku musingi kugeza igihe inzu irangiriye.”

Yakomeje avuga ko kera bavugaga ko ibikoresho byinshi bigomba guturuka hanze, ariko ubu ngo ubu siko biri, mu Rwanda hari ibikoresho birimo amakaro akorwa n’uruganda “East African Granite Industries”, n’amatafari ya Ruriba ahagije kandi yujuje ubuziranenge.

Ati “Kuzana ibikoresho biva hanze ni bimwe mu bihumanya ikirere. Tukaba dusanga niduteza imbere ibyakorewe iwacu bizadufasha mu buryo bwo kubaka inyubako zujuje ubuziranenge.”

Kayumba avuga ko n’ibikoresho byifashishwa mu gukora isuku nabyo bihari, nk’amarangi n’ibindi bitandukanye bikorerwa mu Rwanda.

Ati “Dufite inganda nyinshi z’amarangi mu Rwanda, dukora insinga, amatara hari inganda nka Sahasra zatangiye gukora amatara mu Rwanda ku buryo ibikoresho byinshi ubu ngubu bikorerwa mu Rwanda.”

Umuyobozi w’Ikigo Mpuzamahanga gishinzwe guteza imbere ibijyanye no kurengera ibidukikije mu Rwanda (GGGI), Innocent Kabenga, yavuze ko u Rwanda rudashobora kugira imijyi irengera ibidukikije mu gihe hatubatswe inzu zisabwa muri urwo rwego.

Yasabye abubaka gukurikiza ayo mabwiriza, kuko hari igihe kizagera abakodesha inyubako n’abazigura bagashaka izibungabunga ibidukikije.

Umuyobozi ushinzwe ubucuruzi mu ruganda rukora amarangi rwa Crown Paints, Vipul Kapur, yatangaje ko bakorera mu Rwanda amarangi yujuje ubuziranenge bwo kutangiza ibidukikije, bakora bifashishije ikoranabuhanga mpuzamahanga.

Yavuze ko bafite ububiko buhagije bwahaza abayakeneye, dore ko yanifashishijwe mu gukora amasuku mu nyubako za Kigali Convention Center, Radisson Blue Hotel, Marriot, RSSB, RRA, n’ahakorera imwe mu mitwe ya politiki mu Rwanda.

Ku ruhande rw’uruganda rwa Ruriba Clays narwo ngo ifite amatafari ahagije yahaza abashaka kubaka mu Rwanda, kuko ngo usanga bagemura ayo matafari no mu bihugu bikikije u Rwanda.

Umuyobozi Mukuru w’Ikigo cy’Igihugu gishinzwe kurengera ibidukikije (REMA), Ruhamya Colette
Umuyobozi w’Ikigo gishinzwe imiturire mu Rwanda (RHA), Eng Didier Sagashya
Umuyobozi w’Ikigo Mpuzamahanga gishinzwe guteza imbere ibijyanye no kurengera ibidukikije mu Rwanda (GGGI), Innocent Kabenga
Umuyobozi wa RwGBO, Kayumba Eudes aganira n'itangazamakuru
Abantu batandukanye bari bitabiriye iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244