Leta ikeneye miliyari 4.3Frw ngo isezerere amabati ya ‘asbestos’ ku nyubako zayo

Yanditswe na Evariste Nsengimana
Kuya 25 Kamena 2019 saa 10:14
Yasuwe :
0 0

Minisiteri y’Ibikorwa remezo (Mininfra) yatangaje ko ikeneye nibura miliyari 4.3Frw zo kwifashisha mu bikorwa byo gusezerera burundu amabati ya ‘asbestos’ agisakaje inyubako za Leta hirya no hino mu gihugu.

Minisitiri Amb Gatete Claver, yatangarije Inteko Ishinga Amategeko, Umutwe w’Abadepite kuri uyu wa 25 Kamena ubwo yayigezagaho ibisobanuro mu magambo ku bibazo byagaragaye muri raporo y’ingendo Abadepite bakoreye mu Mirenge yose y’Igihugu.

Izo ngendo Abadepite bakoze muri Mutarama na Gashyantare 2019 mu rwego rwo kugenzura ishyirwa mu bikorwa rya gahunda zo guteza imbere abaturage no kubakura mu bukene, mu bibazo bagaragaje harimo kuba hirya no hino mu gihugu hakiri inyubako zisakajwe ayo mabati.

Imyaka hafi 10 irashize Leta ifashe umwanzuro wo gusezerera amabati ya asbestos kubera ingaruka mbi agira ku buzima bwa muntu zirimo nko kumutera indwara zidakira nka kanseri y’ibihaha n’izindi.

Ikibazo babajije Minisitiri Gatete harimo kuba barasanze hari inyubako za Leta zigisakajwe ayo mabati nyamara harafashwe ingamba ko agomba guhindurwa.

Kiti “Ni iyihe mpamvu ituma gahunda yo gukura isakaro rya fiburosima ku nyubaka zaba iza Leta, iz’abikorera n’iz’abantu ku giti cyabo itubahirizwa? Ese igeze he ishyirwa mu bikorwa?”

Abadepite bakomeje kubaza Minisitiri Gatete umubare w’inyubako zisigaranye aya mabati, gahunda ihari n’ingengo y’imari ikenewe kugira ngo bikorwe.

Minisitiri Gatete yagize ati “Kuri izo, asbestos imaze kuvanwaho ku mazu ya Leta yose ni 57%, ibisigaye ubwo ni 43% zigomba kuvanwaho. Ku bantu bikorera zimaze kuvanwaho ni 66%, ubwo izisigaye nazo zikeneye kuvanwaho.”

Yakomeje agita ati “Mu rwego rw’ingengo y’imari dushaka kugira ngo turebe uko iki kibazo cyakemuka ni miliyari zigera kuri 4.3Frw kugira ngo tubashe kuba twakemura iki kibazo burundu.”

Minisitiri Gatete yavuze ko icyo kibazo yagishinze inkeragutabara ndetse ko hari ikigo cyemeye kuguriza u Rwanda amabati yo gusimbuza ayo mabi.

Ati “Dufite icyizere ko mu mwaka umwe ku mazu ya Leta yose icyo kibazo kizaba gikemutse burundu, ibisigaye ni ukwishyura byo tuzakomeza tubikorane ku bijyanye n’amasezerano dufitanye n’icyo kigo.”

Minisitiri Gatete yavuze ko n’abikorera bakomeza gushishikarizwa gusimbuza aya mabati ku muvuduko umwe n’uwo Leta ikoresha iyasimbuza ku nyubako zayo.

Ikibazo cy’aya mabati giheruka kugarukwaho na Perezida Kagame ubwo yasuraga abaturage b’uturere twa Musanze na Nyabihu, bahurira mu kibuga cya Busogo, mu karere ka Musanze muri Gicurasi 2019.

Yavuze ko hashize imyaka hafi 10 hafashwe umwanzuro ko inyubako zisakajwe na asbestos zisimbuzwa ariko uzisanga hirya no hino.

Perezida Kagame yavuze ko ‘Iyo ubajije impamvu bakubwira ko ari ingengo y’imari, n’uwabyibagiwe akavuga ko ikibazo ari ingengo y’imari kandi ari imyumvire yabo’.

Minisitiri Gatete yavuze ko u Rwanda rukeneye arenga miliyari 4Frw ngo rusimbuze amabati ya asbestos ku nyubako za leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza