Leta igiye gushyiraho ibigo 10 by’ubumenyingiro mu guhangana n’ubushomeri mu rubyiruko

Yanditswe na Evariste Nsengimana
Kuya 9 Kanama 2017 saa 10:26
Yasuwe :
0 0

Leta y’u Rwanda igiye gushyiraho ibigo 10 byigishya amasomo y’ubumenyingiro n’ibigo bine byo gufasha abashoramari bagitangira ubucuruzi, bizafasha cyane cyane urubyiruko kubona ubumenyi bukenewe ku isoko ry’umurimo.

Umushinga w’itegeko ryemerera kwemeza burundu amasezerano y’inguzanyo y’amadolari miliyoni 81, yatanzwe na Banki y’ubucuruzi y’Abahinde, izafasha mu kubaka ibyo bigo, wemejwe n’Inteko rusange y’Umutwe w’Abadepite ku wa Mbere w’iki cyumweru.

Minisitiri w’Imari n’Igenamigambi, Amb. Claver Gatete, yasobanuye ko ayo mafaranga azifashishwa mu mishanga yo gukemura ibura ry’akazi mu rubyiruko.

Yagize ati “Icya mbere cyo, uraza gusubiza ikibazo kijyanye n’ibura ry’akazi mu rubyiruko. N’izindi gahunda zo kurwanya ubushomeri (NEP) dufite kandi ni ikibazo gikomeye; ni ikibazo kizahoraho kuko abo dufite uyu mwaka, nimutekereze na none abantu bazongera bakajya ku masoko umwaka utaha n’uzakurikiraho. Ni ugukoresha uburyo bwose bushoboka kugira ngo turebe ko twabaha ubumenyi bukenewe.”

Uretse ibyo bigo 10 byigisha iby’ubumenyingiro, hazanajyaho ibindi bine byo gufasha abafite ubucuruzi bagitangira, biteganyijwe kubakwa mu Karere ka Nyarugenge, aka Huye, aka Rubavu na Nyagatare.

Umuyobozi w’Ikigo cy’Igihugu gishinzwe ubumenyi ngiro, Gasana Jerome, ybwiye RBA ko intego ari ugukemura ikibazo cy’abatangiza imishinga ntibayikomeze.

Yagize ati “Icyo bisobanuye, ni ugufata umuntu ufite igitekerezo ukamushyigikira, ukamubwira uti ‘numara kugikora, ku isoko bizagenda gutya’, ukamuharekaza muri rwa rugendo kugira ngo abashe gukora cya gihangano cye, ukanamufasha no muri ya minsi ya mbere akigera ku isoko ry’umurimo. Abantu benshi bakunda kugira ibibazo, bariya benshi bashinga ibigo, hashira iminsi, amezi abiri, atatu, atandatu, akavuga ati ‘mbivuyemo’ cyangwa akavuga ati ‘imibare nayikoze nabi’. Ibyo twifuza ko bigomba kugenda bihinduka.”

Ibi bigo bine biziyongera ku bindi bitanu byari bisanzwe bifasha abashoramari bagitangira kubona ubumenyi ku gukora imishinga, biri hirya no hino mu gihugu.

Amasomo azatangwa n’ibyo bigo uko ari 10 bizashyirwa hirya no hino mu gihugu, azibanda ku nzego zirimo serivisi z’ubwubatsi, ubuhinzi, gutunganya ibiribwa, inganda n’ubucukuzi bw’amabuye y’agaciro.

Minisitiri w’Imari n’Igenamigambi w’u Rwanda, Amb. Claver Gatete

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza