Leta ifite intego yo gukumira kuba ubutayu bw’inyandiko

Yanditswe na Ferdinand Maniraguha
Kuya 23 Ugushyingo 2017 saa 09:31
Yasuwe :
0 0

Minisitiri w’Umuco na Siporo, Uwacu Julienne, yavuze ko Leta igiye gukora ibishoboka byose umuco wo gusoma no kwandika mu banyarwanda ugatera imbere, hagacika kuvuga ko muri Afurika y’Iburasirazuba ari mu butayu bw’inyandiko ndetse no kuvuga ko mu Rwanda nta muco wo gusoma uhaba.

Minisitiri Uwacu yatangije kuri yu wa Kane ubukangurambaga bwiswe ‘Gira Igitabo Aho Uri’ bugamije gukangurira abana bato gukurana umuco wo gusoma no kwandika ibitabo kugira ngo hazagerwe ku bukungu bushingiye ku bumenyi.

Yavuze ko mu Rwanda hari abantu bashoboye kwandika ibitabo ndetse n’ibyo kwandika byinshi, hakaba hakenewe kubikundisha abato.

Yagize ati “Muri twe, mu rubyiruko rwacu dushoboye kwikorera ibifitiye inyungu abanyarwanda haba ku mashuri no mu miryango. Ni kenshi tubwirwa ko nta byo gusoma bigenewe abana mu rurimi rwacu bihari ndetse no kuba bavuga ko Afurika y’Iburasirazuba ari ubutayu mu bijyanye n’inyandiko bivuze ko tudafite ibihagije, gusa hari intambwe imaze guterwa.”

Uwacu yakomeje avuga ko uko igihugu kizagenda gitera imbere n’umuco wo gusoma no kwandika uzatezwa imbere.

Ati “Uko tugenda dutera imbere nk’igihugu n’umugabane wa Afurika hari umuco wo gusoma ugenda ukura, bitanga icyizere ko cya kindi cyo kuvuga ko tudafite umuco wo gusoma kizahinduka amateka. Ibyo kwandika turabifite n’ababyandika barahari.”

Umuyobozi w’Inzu y’Ibitabo Arise Education, Gasana Mutesi yashishikarije ababyeyi gukundisha abana ibitabo, babibashyirira mu rugo nk’uko bahashyira n’ibindi nkenerwa.

Ati “Byashimisha kubona mu nzu yawe hari divayi ariko harimo n’ibitabo, kuko nubwira umwana wawe ko akwiye gukunda gusoma kandi nta bitabo abona ahubwo akabona inzoga, uzaba umubwira ibitari byo. Ikiza ni ukubimubwira umwereka n’ibitabo.”

Umuyobozi w’Umuryango Save The Children, Phillipe Adopoe , yavuze ko mu bushakashatsi bakoze mu Rwanda basanze mu bana biga kuva mu mwaka wa mbere kugeza mu wa gatatu w’amashuri abanza, abasoma neza badategwa bari hagari ya 40% na 45%.

Avuga ko ibyo ari ikimenyetso kibi kuko bishobora gutuma abana benshi bava mu ishuri kubera ko ibyo bigishwa batabyumva.

Yagize ati “Niba umwana arangije umwaka wa kabiri cyangwa uwa gatatu atazi gusoma, uwo mwana ntazakomeza, amahirwe menshi n’uko azava mu ishuri. Nibura umwana akwiye gusoma ibitabo 40 mu mwaka kugira ngo ubwo azaba arangije umwaka wa gatatu azabe afite ubushobozi bwo gusoma no kwandika. Iyo arangije iyo myaka atabizi rero ishuri arivamo kuko ntiyakomeza kwiga ibintu atumva.”

Cyusa Brian w’imyaka 10 wiga kuri Mother Mary School mu mwaka wa gatandatu w’amashuri abanza, we uretse gusoma, amaze kwandika ibitabo by’abana bitatu birimo n’icyo yamuritse kuri uyu wa Kane cyitwa ‘Ntibavuga, Bavuga” kigamije gusobanurira abantu uburyo bunoze bwo kuvuga Ikinyarwanda.

Uyu mwana utuye mu Mujyi wa Kigali, yavuze ko nawe Ikinyarwanda atakizi neza ariko ko ibyo atumva yabibajije abamurera akanakora ubushakshatsi.

Ati “Nashatse kwigisha abantu bavuga Ikinyarwanda kitari cyo uburyo bwo kukivuga neza. Nanjye sinkizi neza ariko narashakishije, mbaza ababyeyi n’abarezi. Ndateganya kurangiza amasomo yanjye nkandika ibitabo byinshi. Abandi bana nabagira inama yo gusoma ibitabo, abatazi gusoma nkabereka ko nabo babishobora.”

Ubukangurambaga ‘Gira Igitabo Aho Uri’ buzagezwa mu gihugu hose, hashakishwa uko amasomero n’amaguriro y’ibitabo yashyirwa hose mu turere, gushyira ibitabo ahahurira abantu benshi nko mu modoka zitwara abagenzi n’ahandi.

Minisitiri w’Umuco na Siporo, Uwacu Julienne mu gutangiza ubukangurambaga bwo gusoma no kwandika bihereye mu bato
Cyusa Brian w’imyaka 10 wiga kuri Mother Mary School mu mwaka wa gatandatu w’amashuri abanza yatangiye kujya yandika ibitabo
Ubukangurambaga ‘Gira Igitabo Aho Uri’ bugamije gukangurira abana bato gukurana umuco wo gusoma no kwandika ibitabo
Minisitiri w'urubyiruko, Mbabazi Rosemary
Minisitiri w’Umuco na Siporo, Uwacu Julienne

Amafoto: Moses Niyonzima


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza