Leopold Munyakazi yagejejwe i Kigali nyuma y’imyaka 12 ashakishwa (Amafoto)

Yanditswe na Philbert Girinema
Kuya 28 Nzeri 2016 saa 06:56
Yasuwe :
0 0

Leopold Munyakazi ushinjwa ibyaha bya Jenoside yakorewe Abatutsi, yagejejwe mu Rwanda nyuma y’imyaka 12 ubutabera bw’u Rwanda bumutegereje ngo abazwe ku byaha akekwaho ko yakoreye muri Kayenzi mu yahoze ari Perefegitura ya Gitarama.

Kuri uyu wa Gatatu tariki 28 Nzeri, saa 5:58 nibwo yasohotse mu ndege, mu ipantalo yera n’umupira w’umweru w’amaboko maremare, inyuma yarengejeho undi wa Lacoste w’amaboko magufi.

Munyakazi w’imyaka 66 afite impamyabumenyi y’ikirenga mu bijyanye n’indimi.

Umuvugizi w’Ubushinjacyaha, Nkusi Faustin yavuze ko iyi ari intambwe nziza itewe mu bijyanye n’ubutabera.

Ati “Yoherejwe na Leta Zunze Ubumwe za Amerika kandi ni igihugu dushima cyane kuko gikomeje kugaragaza ubushake mu kohereza abakoze jenoside. Kuba bamuzanye ni ibintu twishimira mu butabera. U Rwanda ni igihugu kimaze kugaragaza ko gishoboye kuburanisha imanza za Jenoside, ubutabera araza kubuhabwa.”

“Ibyaha yabikoreye muri Kayenzi, harimo gutegura Jenoside, kuyishishikariza, kuyishyira mu bikorwa, aho yanyuraga kuri za bariyeri areba ko zishyirwa mu bikorwa.”

Nkusi yavuze ko yafatanyaga na Burugumesitiri Mbarubukeye Jean, akangurira abahutu kwica abatutsi, “ndetse hari abo yishe ku giti cye, abo yagiye asanga mu nzu.”

Yakomeje agira ati “Ubu ageze mu Rwanda, turamwakiriye, polisi igiye kumubaza, Polisi bamumenyeshe uburenganzira afite bujyanye n’umuntu ufunze, noneho hategurwe n’umwavoka umufasha. Nubwo atamwishakiye ariko dufite inshingano zo kumufasha. Polisi iramubaza, imukorere inyandiko imufunga kuri sitasiyo ya Kicukiro, ubundi bamufunge iminsi itanu y’agateganyo.”

Biteganyijwe ko nyuma yo gukora idosiye polisi ishyikiriza ubushinjacyaha, nabwo bugahita buyiregera urukiko kugira ngo habeho ifunga n’ifungurwa ry’agateganyo, hakaregerwa urukiko rw’ibanze rwa Muhanga.

Uyu mugabo yahunze igihugu mu 2004, nyuma yo gufungurwa by’agateganyo ngo hakomeze iperereza ku byaha yakekwagaho, ahita yerekeza muri Leta Zunze Ubumwe za Amerika.

Mu 2006 Munyakazi hari ikiganiro yatanze muri Kaminuza yo muri Leta Zunze Ubumwe za Amerika, aho yavuze ko mu Rwanda nta Jenoside yabaye ahubwo yari intambara hagati y’impande ebyiri zari zihanganiye ubutegetsi.

Yakomeje gusaba ubuhungiro n’ubwenegihugu ariko inzego zishinzwe abinjira n’abasohoka ntizanyurwa n’impamvu atanga,

Mu 2008 nibwo ubushinjacyaha bw’u Rwanda bwatanze impapuro zo kumuta muri yombi, mu 2009 aza gufatwa ariko hakomeza iperereza, ntihahita hafatwa umwanzuro wo kumwohereza mu Rwanda.

Kumwohereza mu Rwanda byagiye bigorana, kugeza ubwo mu 2015 Ubushinjacyaha bwari bwatangaje ko bitarenze Nzeri 2015 yagombaga kuba yagejejwe mu Rwanda, ariko nabyo ntibyashobotse.

Munyakazi yoherejwe mu Rwanda nyuma ya Ladislas Ntaganwa uheruka kuzanwa mu Rwanda muri Werurwe 2016, akaba ari umwe mu basaga 400 u Rwanda rwatangiye impapuro zo guta muri yombi bari bacyihishahisha mu mahanga.

Leopold Munyakazi akigera ku kibuga cy'indege cya Kigali
Abantu barimo n'abo mu nzego zishinzwe umutekano bari bamutegereje
Munyakazi amaze kugera mu maboko y'abapolisi

Amafoto:Luqman Mahoro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244