Léopold Munyakazi ukurikiranyweho ibyaha bya Jenoside aragezwa i Kigali

Yanditswe na Ishimwe Israel
Kuya 27 Nzeri 2016 saa 06:19
Yasuwe : XX
0

Ubutabera bwa Leta Zunze Ubumwe za Amerika bwohereje Dr. Léopold Munyakazi mu Rwanda ngo akurikiranweho ibyaha bya Jenoside yakorewe Abatutsi n’ibindi byaha byibasiye inyokomuntu nyuma y’igihe kirekire acumbikiwe muri iki gihugu.

Umuvugizi w’Ubushinjacyaha, Faustin Nkusi, yatangarije IGIHE ko Munyakazi azagezwa ku butaka bw’u Rwanda mu masaha ya saa yine yo mu gitondo cyo kuri uyu wa Gatatu, tariki ya 28 Nzeri 2016.

Munyakazi w’imyaka 65 akurikiranyweho ibyaha bya Jenoside yakorewe Abatutsi, ubufatanyacyaha muri Jenoside, gucura umugambi wayo, ubwicanyi nk’icyaha cy’ibasiye inyokomuntu, ndetse no kwica bigamije kurimbura imbaga.

Ashinjwa kandi n’ibindi byaha bisanzwe nko kurema umutwe w’abagizi ba nabi, guhakana no gupfobya Jenoside yakorewe Abatutsi.

Ibyaha Munyakazi akurikiranyweho, ubushinjacyaha buvuga ko byakorewe ahitwa Kayenzi mu yahoze ari Perefegitura ya Gitarama.

Munyakazi yahunze u Rwanda mu 2004 nyuma yo gufungurwa by’agateganyo ngo hakomeze iperereza ry’ibyaha yakekwagaho.

Ubutabera bw’u Rwanda bwasabye ko yatabwa muri yombi kubera ibyaha akurikiranyweho, nyuma yo kubisuzuma, Leta Zunze Ubumwe za Amerika zimwambura ubwenegihugu.

Mu 2006, Munyakazi yatanze ikiganiro muri Kaminuza imwe yo muri Leta Zunze Ubumwe za Amerika aho yavuze ko nta Jenoside yabaye mu Rwanda ahubwo habayeho intambara hagati y’impande ebyiri zarwaniraga ubutegetsi.

Mu kwakira 2008 Ubushinjacyaha bw’u Rwanda bwatanze impapuro zisaba ko yatabwa muri yombi ndetse muri 2009 aza gufatwa bwa mbere atangira gukorwaho iperereza muri Amerika, aho yari afungiye muri Gereza ya Alabama.

Munyakazi yoherejwe yiyongera ku bandi banyarwanda 13 barimo batatu boherejwe n’Urukiko Mpuzamahanga mpanabyaha rwashyiriweho u Rwanda Arusha.

Mu banyarwanda boherejwe n’amahanga kuburanishwa n’Inkiko z’u Rwanda ku byaha bya Jenoside, hamaze kurangira urwa Dr.León Mugesera n’urwa Jean Uwinkindi bombi bakatiwe igifungo cya burundu n’urwa Charles Bandora wakatiwe gufungwa imyaka 30, bombi bakaba barajuririye Urukiko rw’Ikirenga.

Dr. Léopold Munyakazi ukurikiranyweho ibyaha bya Jenoside aragezwa mu Rwanda kuri uyu wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE