Lauren wamamaye muri Arsenal yasuye ingagi mbere yo Kwita Izina

Yanditswe na Manzi Rema Jules
Kuya 6 Nzeri 2018 saa 10:46
Yasuwe :
0 0

Umunya-Cameroun Laureano Bisan Etamé-Mayer uzwi nka Lauren wabaye umwe mu bakinnyi bakomeye ba Arsenal, yasuye Ingagi mu birunga mbere y’umuhango azitabira wo kwita izina abana bazo kuri uyu wa Gatanu.

Lauren yageze mu Rwanda ku wa Kabiri w’iki cyumweru mu rwego rw’ubufatanye ikipe yahoze akinira ifitanye n’Ikigo cy’Igihugu gishinzwe Iterambere (RDB), biciye muri gahunda ya ‘Visit Rwanda’.

Ku wa Gatatu yari kuri Stade Amahoro i Remera aho yahuye n’abana b’abakobwa n’abahungu bafite inzozi zo kuzakina ruhago, aganira nabo, abagira inama ndetse bagira n’umwanya wo gukinana.

Urugendo rwe yarukomereje mu birunga kuri uyu wa Kane, ndetse ari mu bantu bakomeye bazita amazina abana 23 b’ingagi, mu birori by’akataraboneka bizabera mu Kinigi mu Karere ka Musanze kuri uyu wa Gatanu.

Lauren yatwaranye na Arsenal ibikombe bibiri bya FA Community Shield (2002 na 2004), ayihesha bitatu bya FA Cup (2001–02, 2002–03, 2004–05) na bibiri bya shampiyona harimo n’icya 2003-04 Arsenal yegukanye idatsinzwe umukino n’umwe.

Si we wenyine uzava muri Arsenal uzitabira ibi birori kuko kuri uyu wa Kane i Kigali hategerejwe Umwongerezakazi wahoze nawe ari umukinnyi ukomeye w’iyi kipe y’abagore, Alexandra Virina Scott uzwi nka ‘Alex Scott’.

Scott yahamagawe inshuro 140 mu ikipe y’Igihugu y’u Bwongereza ndetse ahagararira ubwami bw’u Bwongereza mu mikino Olimpiki ya 2012 yabereye i Londres.

Yafashije Arsenal kwegukana ibikombe bitanu bya shampiyona y’abagore, birindwi bya FA Cup mu bagore, kimwe cya UEFA Women’s Champions League mu 2007 n’ibindi bitandukanye.

Lauren mu Kinigi, aho ba mukerarugendo baherwa amabwiriza mbere yo kurira ibirunga bajya kureba ingagi
Abantu batandukanye bishimiye guhura n'uyu mukinnyi wakanyujijeho muri Arsenal FC
Lauren ,mbere gato yo kujya kureba ingagi
Aha Lauren yaganiraga n'umwe mu barinda Pariki y'Igihugu y'Ibirunga
Akanyamuneza kari kose
Yari yambariye imbeho n'imvura bidasiba mu birunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza