Kwamamaza

Lamin Manneh yacyeje u Rwanda ku ntambwe rwateye mu kubaka amahoro

Yanditswe kuya 22-09-2016 saa 14:19' na Ntakirutimana Deus


Umuhuzabikorwa w’amashami ya Loni mu Rwanda, Lamin Manneh, asanga u Rwanda ari igihugu cyateye intambwe ku bijyanye n’amahoro yabonetse nyuma y’ibibazo bya Jenoside yakorewe Abatutsi rwaciyemo, ariko ubu amahanga akaba aza kuruvomaho ubumenyi, asanga ari imiyoborere myiza.

Manneh asanga mbere y’imyaka myaka 22 u Rwanda rwari igihugu kibuze byinshi ariko ubu intambwe cyateye ngo igaragarira bose.

Ibyo yabigarutseho mu nyandiko ndende yanditse ku wa Gatatu tariki ya 21 Nzeri 2016, ubwo Isi yose yizihizaga Umunsi Mpuzamahanga wahariwe Amahoro.

Ati “ Mu myaka 22 ishize, u Rwanda rwatangiye inzira y’ubumwe n ‘ubwiyunge, maze iha umurongo igihugu cyendaga kugwa mu manga, kiba kimwe mu bihugu ku isi bitanga icyizere mu nzego nyinshi zijyanye n‘iterambere.”

Avuga ko u Rwanda rwahisemo gushyira imbere politiki y’ubumwe n‘ubwiyunge, aho kwimika iyo kwihorera n’amacakubiri, nyuma ya Jenoside yakorewe abatutsi mu 1994 yaguyemo abarenga miliyoni mu minsi 100 gusa.

Intambwe u Rwanda rwateye ngo yakuruye amahanga adasiba kuyigiraho.

Ati “ Ibyo byatumye u Rwanda ruba igihugu nyabagendwa. Mu by’ukuri ibihugu byinshi bya Afurika n‘ahandi ku Isi byohereza intumwa kwigira ku Rwanda, kubijyanye n‘uburyo bwakoreshejwe mu nzira y’ubumwe n‘ubwiyunge.”

Iyo ntambwe yatewe ngo yatumye Abanyarwanda biyumvanamo, bagirirana icyizere bongera kuba umwe. Ibyo byose byunganiwe n‘ibiganiro byahuje Abanyarwanda, biciye mu matsinda y’ubumwe n‘ubwiyunge mu baturage no mu mashuri.

Manneh yavuze ko ibyagezweho byose byagizwemo uruhare na Perezida Paul Kagame afatanyije n’izindi nzego zinyuranye zirimo Komisiyo y’Ubumwe n’Ubwiyunge, Sosiyete sivile ndetse n’indi miryango itandukanye.

Ubwo uyu munsi wizihizwaga mu Rwanda, Fidele Ndayisaba, Umunyamabanga Nshingwabikorwa wa Komisiyo y’Igihugu y’Ubumwe n‘Ubwiyunge, yavuze ko ubumwe n’ubwiyunge byagejeje Abanyarwanda ku ntamwe nziza ibaganisha ku iterambere ryubaka igihugu basangiye.

Yashimye kandi abafashije u Rwanda gutera iyo ntambwe barimo no kubaka amahoro barimo inzego za Leta, Loni ishami ryayo mu Rwanda n‘imiryango itari iya Leta n ‘Abanyarwanda muri rusange.

Ndayisaba yemeza ko amahanga aza kwigira ku Rwanda uburyo bwo kwikemurira ibibazo nyuma yo kunyura mu mateka yaranzwe n‘amacakubiri, ihohoterwa, Jenoside, intambara, ariko bagashobora kwisana no kwiyubaka bibaha ubuhamya bwihariye ku bijyanye n‘agaciro k’amahoro.

Ndayisaba yashishikarije urubyiruko kubyaza umusaruro amahirwe ruhabwa n’igihugu mu nzego zose, ubukungu, umutekano, amahoro no gushyira imbere ubunyarwanda.

Umunsi w’amahoro washyizweho mu mwaka wa 1981 n ‘icyemezo cy’Inteko rusange ya Loni, utangira kwizihizwa muri Nzeri 1982. Iyo tariki ifatwa nk’umunsi ngarukamwaka wo guhagarika intambara no kwirinda amakimbirane.

Mu Rwanda Umunsi Mpuzamahanga w’Amahoro watangiye kwizihizwa bigizwemo uruhare na Loni guhera mu 2011.

Insanganyamatsiko y’uyu mwaka ihamagarira abakora umurimo wo kubaka Amahoro gushyira hamwe imbaraga no guhuza ibikorwa. By’umwihariko mu Rwanda yibanda ku ruhare rw’urubyiruko mu kubaka amahoro n‘iterambere rirambye’’

Lamin Manneh yemeza ko imiyoborere myiza ari yo itumye u Rwanda rwigirwaho n'ibindi bihugu ibyo kubaka amahoro n'ubwiyunge

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved