Kwamamaza

Kwitana inkomamashyi hagati ya Depite Bamporiki na Byabarumwanzi byaturutse he?

Yanditswe kuya 19-10-2016 saa 15:20' na IGIHE


Hashize iminsi mu bitangazamakuru binyuranye hacicikana inkuru zivuga ko umwuka waba utari mwiza hagati y’Abadepite babiri bagize Inteko Ishinga Amategeko y’u Rwanda, Bamporiki Edouard na Byabarumwanzi François.

Ibyo byose ngo byabaye kuwa 3 Ukwakira 2016 ubwo Abadepite bagize Komisiyo y’Uburenganzira bwa muntu, Ubumwe bw’Abanyarwanda no kurwanya Jenoside basuraga Akarere ka Nyamagabe bakaganira n’Abagize nyobozi n’abashinzwe umutekano mu Karere.

Perezida w’iyi Komisiyo, Byabarumwanzi François niwe wari uyoboye iri tsinda ryari ririmo Depite Bamporiki Edouard, Françoise Mukayisenga na Mukakanyamugenge Jacqueline.

Bijya gutangira, ngo aba badepite bari bari gufata ifunguro maze batangira kubaza Perezida wa Komisiyo yabo iby’urugendo aherutsemo mu Bushinwa. Mu kubasubiza, ngo yabaciriye ku mayange yitsa cyane ku buryo umutekano uba wakajijwe maze nabo bakomeza kumuhata ibibazo.

Mu kiganiro na IGIHE, Depite Bamporiki yavuze ko Byabarumwanzi yageze ubwo asubiza avuga ati ‘ibyo ntimukajye mubimbaza, njye mujye mumbaza ibyo ku bwa Habyarimana.’

Depite Bamporiki Edouard

Imvugo ku rupfu rwa Senateri Mucyo nayo yateje urujijo…

Mu gihe Abadepite bari mu biganiro n’abaturage b’i Nyamagabe mu gitondo cyo kuwa 3 Ukwakira 2016, Depite Bamporiki avuga ko yaje kumenya ko Senateri Mucyo Jean de Dieu yitabye Imana ‘nongorera Byabarumwanzi wari uyoboye inama’ amubwira ko yabimenyesha abaturage, undi nawe amusubiza ko ‘byarogoya inama’.

Inama ngo yarakomeje ariko igana ku musozo, Depite Byabarumwanzi abwira abaturage inkuru y’akababaro ko ‘Senateri Mucyo yitabye Imana’ gusa ko ‘yari amaze igihe arembye’.

Ibyo ngo byakuruye impaka ‘abantu bibaza ukuntu umuntu wari mu nama nimugoroba yaba yari amaze igihe arembye’; nabwo hibazwa ku mvugo ya Depite Byabarumwanzi.

Si aho byagarukiye…

Kuri icyo gicamunsi nyuma y’inama, Abadepite bakomereje imirimo yabo ku gusura abagororwa i Nyamagabe. Bageze muri gereza, ngo abagororwa babajije ibibazo byinshi kugeza nubwo bavuga ko ‘abadepite ntacyo bamaze’.

Depite Bamporiki avuga ko yaje gufata umwanya abigisha ku bubi bwa jenoside, ingaruka zayo n’aho yagejeje u Rwanda bigeza ubwo bacururuka ndetse asoza bamuha amashyi bigaragaza ukunyurwa kwabo.

Depite Byabarumwanzi wari ukuriye abo badepite ngo yaje gufata ijambo avuga ngo ‘njye si ndi inkomamashyi, ibyo Bamporiki ababwiye sinabishobora’.

Byabarumwanzi nta kibazo dufitanye

Depite Bamporiki yabwiye IGIHE ko nta kibazo na kimwe afitanye na mugenzi we Byabarumwanzi ahubwo ko nawe yatunguwe no kuba aya makuru yarabatanze i Kigali.

Ati “Ndakubwiza ukuri ko nta kibazo na kimwe mfitanye na Byabarumwanzi. Iyi nkuru yadutanze i Kigali none ho n’itangazamakuru rirayikabiriza gusa ni uko Byabarumwanzi ari umuntu usabana (sociable) aba yaragize ngo ndi guhangana nawe.”

Depite Byabarumwanzi n’abandi badepite bari kumwe babivugaho iki?

Nyuma y’aho aya makuru atangiye gucicikana, mu gitondo cyo kuwa Kabiri tariki ya 18 Ukwakira 2016, IGIHE yagerageje kuvugana na Depite Byabarumwanzi maze avuga ko aza kugira icyo adutangariza amaze gusoma ibyamwanditsweho.

Kuva icyo gihe ntiyigeze yongera kwitaba telefoni. Ku mugoroba wo kuri uyu wa Kabiri ubwo Inteko Rusange y’Abadepite yatoraga imishinga y’amategeko ajyanye n’ubwikorezi bwo mu kirere, basoje ibikorwa, Umunyamakuru wa IGIHE yegereye Depite Byabarumwanzi ngo amubaze kuri ibi maze amusubiza agira ati “Mfite audience [abantu] integereje turaza kuvugana nyuma”. Kugera saa 18:40 ntabwo yari yakabonetse bishoboka yari akiri kumwe n’abo bantu.

Twagerageje kandi kuvugana na we ku murongo wa telefone gusa ntiyigeze yitaba cyangwa ngo asubize ubutumwa bugufi yari yandikiwe kugeza ubwo twasohoraga iyi nkuru.

Imvugo za Depite Byabarumwanzi zibajijweho

Ku rundi ruhande, Depite Françoise Mukayisenga ku mugoroba wo kuri uyu wa Kabiri saa 18:06 ku murongo telefone yabwiye umunyamakuru IGIHE ati ‘ hari abantu turi kumwe wongere umvugishe nyuma y’iminota 10’, kuva ubwo ntabwo arongera kwitaba telefoni; mu gihe Mukakanyamugenge Jacqueline na we wari uhari atigeze yitaba ngo adusobanurire uko byagenze.

Turacyagerageza no kuvugisha abayobozi b’akarere ka Nyamagabe ngo bagire icyo badutangariza kuri aya magambo.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved