Kwamburwa amasambu, kutiga, kwirukanwa muri Gishwati: Akaga k’Abatwa kabwiwe Habyarimana akaruca akarumira

Yanditswe na Habimana James
Kuya 8 Kanama 2019 saa 01:19
Yasuwe :
0 0

Amateka agaragaza ko ubwo abakoloni bageraga mu Rwanda, iturufu ya mbere bakoresheje ari ugucamo abanyarwanda ibice kugira ngo babone uko babayobora. Aha niho batesheje agaciro amoko 19 bahasanze biga ubucakura bwo kurema andi make.

Bafashe amoko yarangaga imiterere y’imiryango mu by’imibereho yabo ya buri munsi n’imiterere y’ubutunzi ari yo; Abahutu, Abatutsi n’Abatwa, babihindura ubwoko busimbura bwa bundi 19.

Nyuma y’ubwigenge, ubutegetsi bwagiyeho mu Rwanda bwakomeje gushyira imbere ya moko, aho kuba umuhutu byahinduwe iturufu mu miyoborere n’ubundi buzima bwite bw’igihugu naho kuba Umututsi bikaba akaga gakomeye n’imvano y’ubuzima bushaririye.

Abatutsi bagiye bicwa mu bice bitandukanye by’igihugu, bigeze mu 1994 biba agahomamunwa ubwo Jenoside yakorwaga abarenga miliyoni imwe bakicwa mu minsi 100 gusa.

Nubwo ubwoko bw’Abatwa butahigwaga nk’Abatutsi, nabo bakomeje gusigazwa inyuma mu majyambere, bafatwa nk’abatazi iyo igihugu kiva n’iyo kigana, insuzugurwa zasigajwe inyuma muri byose.

Ku butegetsi bwa Perezida Habyarimana Juvénal byabaye bibi cyane kuko n’abari bafite ubutaka barabwambuwe, abari bafite ibishanga bacukuragamo ibumba barabyamburwa, abandi birukanwa mu ishyamba rya Gishwati. Intego yari uko bava mu gihugu cyangwa bagapfa.

Abatwa bahuye n’aka kaga ni benewabo wa Kalimba Zephyrin. Icyakora we yagize amahirwe yo kwiga anagira uruhare mu kubavugira kwa Perezida Habyarimana nubwo bitari bimworoheye.

Kuva mu 2012 Kalimba ni umusenateri muri Sena y’u Rwanda, yashyizweho na Perezida Paul Kagame avuye mu cyiciro cy’abo amateka agaragaza ko bari barasigaye inyuma.

Kalimba ni umugabo w’imyaka 60 ufite abana icyenda. Yavukiye mu karere ka Ruhango mu Majyepfo y’u Rwanda. Mu 1978 yabaye umujandarume ku butegetsi bwa Perezida Habyarimana amaramo imyaka ine n’amezi umunani, nyuma aza gukora muri Minisiteri y’ubucuruzi n’inganda.

Yagiye kandi ashinga imiryango ifasha abasigajwe inyuma n’amateka n’indi irengera uburenganzira bwa muntu muri Afurika no ku Isi. Mu kiganiro yagiranye na IGIHE, yagarutse ku kaga k’abasigajwe inyuma n’amateka ku butegetsi bwa mbere ya Jenoside n’imibereho yabo muri iki gihe.

Ikiganiro kirambuye na Senateri Kalimba

IGIHE : Ukiri muto wumvaga uzinjira muri Politiki?

Kalimba: Numvaga ntazayijyamo usibye ko byaje maze kuba umujandarume ariko nabwo numvaga atari politiki, numvaga ko ari ubuzima bwo kwitangira abandi.

IGIHE : Tubwire uko watekereje kuba muri uyu mwuga wo gucunga umutekano

Kalimba: Ninjiriye ahitwa muri Gitarama nkomereza mu Bugesera mu kigo cya gisirikare cya Gako, nyuma tubona amapeti ya mbere ya Kaporali batuzana hano ku cyicaro gikuru Kacyiru. Ubundi kugira ngo ujye muri uyu mwuga wagombaga kuba warize imyaka itatu y’amashuri yisumbuye, icyo gihe njye nari mfite amashuri atanu.

IGIHE : Wavuze ko wamazemo imyaka ine, kuki wahise uvamo?

Kalimba: Navuyemo ntarangije manda kuko twasinyaga manda y’imyaka itanu bakaguha indi ubishatse, njye nabonaga harimo ikibazo. Niba nari mu bantu b’abahanga ba mbere, nagombye no kuba narabonye amapeti akomeye, nabonye ko ubuzima bwanjye butarimo gutera imbere.

Murabizi twagiraga ibyiciro bitatu by’amoko, njye rero navaga mu Batwa kandi ninjye wari winjiye ndi uwa mbere, niba ari njye wari Umutwa wa mbere ufite amashuri agera kuri atanu ntabwo numvaga nafatwa kimwe n’abandi, abo twajyanyemo bari bafite amashuri atatu gusa bo bari bafite amapeti yo hejuru njye nkifite ipeti rya Kaporali.

Wabonaga ko leta ya Habyarimana yari ifite ivanguramoko, nabonye rero ko bitari kumpira kuko nabonaga harimo itonesha n’irondakarere, numvise ko nabaha amahoro nkajya kwishakira ubundi buzima.

IGIHE : Wowe washoboye kwiga gute ko Abatutsi n’Abatwa bitari biboroheye?

Kalimba: Icyo nakubwira ni uko no muri iki cyiciro cy’abasigajwe inyuma n’amateka harimo abafite imibereho nk’iy’abandi. Umuryango mvukamo ntiwabayeho nabi kuko Papa umbyara na we ntiyabayeho nabi, dufite igisekuruza gifite amateka maremare, muzehe yize kera kandi yigishwa n’umwami Rudahigwa, yakoze kandi imirimo ikomeye harimo kuyobora gereza ya Nyanza mu myaka ya 1960, yanakoze muri minisiteri zinyuranye zo ku butegetsi bwa Kayibanda, ibi byatumye abana be bose twiga.

Sogokuruza wa Kalimba yitwaga Sebishwi akaba yari atunze inka zirenga 500.

IGIHE : Wabaye mu butegetsi bwa Habyarimana imyaka myinshi, wigeze ubonana na we?

Kalimba: Nagiye mbonana na we inshuro nyinshi kuko no mu 1992 Habyarimana twahuriye mu biro bye. Ndi umwe mu bagize uruhare mu kumubaza ibibazo byari byugarije icyiciro cy’abasigajwe inyuma n’amateka kuko twabonaga ko batari bafite uburenganzira nk’ubw’abandi. Mu 1990 njya gushinga ishyirahamwe riteza imbere Abatwa ni uko nabonaga ko bari bafite ibibazo.

IGIHE : Habyarimana yakubwiye iki?

Kalimba: Nanditse ibaruwa nyiha ibiro by’umukuru w’igihugu ivuga ibibazo byose birebana n’Abatwa, namubwiye ko Abatwa batabona uburenganzira nk’abandi bantu bose, ko barimo kwamburwa amasambu n’abaturage, bakabambura ibishanga kandi ariho bavanaga amabumba, ibi byari bivuze ko bashaka ko bapfa kuko batagiraga ubutaka bwo guhinga, hari ikibazo cy’uko batigaga no kwirukanwa mu ishyamba rya Gishwati kandi ntibahabwe ingurane.

Twagiye mu biro bya Perezida Habyarimana turi umunani tumubwira ibi bibazo gusa twabonaga abinyura iruhande. Ibi byatumye nyuma dufata umwanzuro ko twashinga ishyaka rirengera ubu bwoko ariko dukomwa mu nkokora n’ubushobozi buke, ariko na Habyarimana yambwiye ko tutagombaga kuva muri MRND, urumva ko iyo dukomeza twagombaga no guhura n’akaga.

IGIHE : Mu 2012 Perezida Kagame yakugize umusenateri uvuye mu cyiciro cy’abasigajwe inyuma n’amateka, wumva umaze kubakorera iki?

Kalimba: Icya mbere nshima ni uko iyi leta itagaragaramo itonesha, ishyira imbere ubushobozi bwa buri wese kandi igashyira imbere imiyoborere iha agaciro umunyarwanda.

Hari gahunda zihari zo kwigisha abana b’abasigajwe inyuma n’amateka, niba ntibeshye mu 1994 nta bana barenze batanu bari barize Kaminuza ariko ubu bararenga 60.

Mu busanzwe kiriya cyiciro kirakennye cyane ariko mbere ubukene bwabo bwagendanaga n’impfu nyinshi, uyu munsi ntabwo bagipfa nka kera, n’upfuye ni uko aba atagiye kwa muganga. Guhera mu 2006 twakoze ubuvugizi leta ibaha ubwisungane mu kwivuza.

Mu guca nyakatsi, kugeza mu 2011 imiryango 99% yari muri nyakatsi uyu munsi bose bavuyemo, wenda hari abakibana kubera ko gahunda itarabageraho ariko nabo bazubakirwa.

IGIHE : Ese abasigajwe inyuma n’amateka bo bafite imyumvire yo gutera imbere?

Kalimba: Bafite ibibazo byinshi, aba bantu ntibarenze ibihumbi 36 mu gihugu ariko ntibahinga kuko 60% nta masambu bafite bivuze ko batunzwe no guca inshuro, iyo utunzwe no guca inshuro biba bigoye.

Turashima ko Minisiteri y’Ubutegetsi bw’Igihugu isigaye ibarihirira bakiga imyuga gusa kubera ko abenshi muri aba bana bava mu miryango ikennye, bararangiza bagasubira muri wa muryango ukennye.

Haracyari ikibazo cyo kutabakurikirana ngo bamenye abo barihiye uko babayeyho, hari abo baha ibikoresho byo kwihangira imirimo ariko bagera iwabo bagasanga bashonje bakagurisha bya bikoresho.

Ikindi kibazo aba ni abantu bitinya kuko usanga babana mu miryango imwe no mu dutsiko, twifuza ko uko ubushobozi bwaboneka babatuza mu midudugu itandukanye kuko iyo babashyize hamwe barushaho gukena no kudakurikiza gahunda za leta.

IGIHE : Izina ‘Abasigajwe inyuma n’amateka’ abantu bakunze kuryamagana, wowe urivugaho iki?

Kalimba: Ntabwo nakubwira ko iri zina ryakemura ikibazo. Ikibazo ntabwo ari izina ikibazo nyamukuru ni imibereho, uyu munsi uwakwita iri zina ariko akagufasha wagombye kumushimira, nk’urugero unyise iryo zina ariko ukamvuza cyangwa ukanyubakira, iryo zina urumva hari icyo ryaba rikimaze?.

IGIHE : Abize amashuri bo bashoboye guhangana ku isoko ry’umurimo?

Kalimba: Barahari ahubwo hakwiye kurebwa uko babayeho, ubundi kujya gupiganwa bisaba ko ufata amafaranga ugatega, hakwiye kurebwa ngo ese niba bagiye gukora ikizamini ahantu kure, wa mwana afite ubushobozi bumugezayo bukanamutunga?.

IGIHE : Abasigajwe inyuma n’amateka n’iki bakwiye kwishimira uyu munsi?

Kalimba: Ndababwira ko bakwiye kwishimira ko bafite umuyobozi mwiza, Perezida Paul Kagame, arabakunda kuko ashyiraho serivisi zifasha buri munyarwanda wese. Ikindi ndabwira abanyarwanda babona bagenzi babo bakennye ntibabafashe, bakwiye kumva ko nta munyarwanda utameze nk’undi, bakwiye kubafasha nk’abafasha umuvandimwe wabo.

Senateri Kalimba ni umwe mu barimo gusoza manda yabo bazasimburwa n’abazatorwa mu kwezi gutaha.

Senateri Kalimba avuga ko ubutegetsi bwa mbere ya Jenoside bwakandamije abasigajwe inyuma n'amateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza