‘Kuvugurura Itegeko Nshinga k’u Rwanda kwemewe n’amasezerano Nyafurika kuri demokarasi’

Yanditswe na Philbert Girinema
Kuya 17 Ugushyingo 2016 saa 07:40
43 29

Mu mpera z’umwaka wa 2015 Abanyarwanda bangana na 98.3% babinyujije mu matora ya referendumu bemeje ko Itegeko Nshinga rya Repubulika y’u Rwanda rivugururwa, bongera gushimangira uruhare rwabo n’ubushake bukomeye muri iki gikorwa, cyemereye Perezida Kagame kongera kwiyamamaza mu matora y’Umukuru w’Igihugu azaba umwaka utaha.

Umuyobozi w’ishami rishinzwe ibya politiki mu muryango wa Afurika yunze ubumwe (AU), Dr Khabele Matlosa, yashimangiye ko ibyo Abanyarwanda bakoze nk’ishami rya AU bemeza ko bijyanye n’ibiteganywa mu masezerano Nyafurika kuri demokarasi n’imiyoborere yo mu 2007.

Ibi yabitangarije mu isozwa ry’inama Nyafurika yari imaze iminsi itatu ibera mu Rwanda, yari ihuje abagize Inteko Ishinga Amategeko za Afurika, abagize imiryango y’ubukungu y’uturere, abagize sosiyete sivile, abahagarariye Minisiteri z’Ububanyi n’Amahanga n’abaturutse mu muryango wa Afurika Yunze Ubumwe (AU).

Yari ifite intego yo kuganira ku masezerano Nyafurika arebana n’ibijyanye n’imiyoborere myiza, guteza imbere demokarasi, amatora n’Itegeko Nshinga no gushishikariza ibihugu bya Afurika kwiyunga n’ibindi 25 bigasinya ayo masezerano yo mu 2007 kandi bikayashyira no mu bikorwa.

Abitabiriye iyi nama bagaragaje ko ibihugu byinshi byo muri Afurika y’Iburasirazuba byahinduye Itegeko Nshinga ariko abaturage ntibabyishimire ndetse hamwe na hamwe haba n’imvururu, basaba ko kuvugurura Itegeko Nshinga byakorwa hagendewe ku byifuzo by’abaturage kandi byaba ngombwa bikemezwa muri referendum.

U Rwanda rwabereye isomo amahanga

Abitabiriye inama bemeza ko u Rwanda ari intangarugero mu bihugu byavuguruye Itegeko Nshinga ku bushaka bw’abaturage banabyemeje binyuze muri referendumu.

Dr.Khabele yavuze ko u Rwanda rwubahirije amasezerano Nyafurika ku mahame ya demokarasi n’imiyoborere myiza, ateganya ko iyo igihugu cyasinye ayo masezerano kigiye kuvugurura Itegeko Nshinga, bigomba gukorwa ku bushake bw’abaturage kandi bikaba biteganywa n’Itegeko Nshinga.

Yemeza ko AU yanyuzwe n’uko u Rwanda rwakurikije inzira zose ziteganywa n’amasezerano kuri demokarasi.

Yagize ati “Mbere na mbere bigomba kuba biri mu murongo w’Itegeko Nshinga ry’igihugu, byemeranyijweho n’abaturage bose kandi bigashimangirwa na referendumu. Ku bwacu iyo tugenzuye dusanga u Rwanda rwaranyuze muri izi nzira zose, ntabwo rwigeze rwica amasezerano Nyafurika kuri demokarasi n’imiyoborere myiza.”

Akomeza avuga ko ibihugu byose bikwiye kwigana uru rugero kuko iyo bidakozwe gutya haduka imvururu za politiki. Atanga urugero rwo muri Burkina Faso aho Perezida Blaise Compaore yashatse guhindura Itegeko Nshinga abaturage batabishaka bakigaragambya bagatera imvururu zashegeshe ubuzima bw’abantu n’ubukungu bw’igihugu muri rusange.

Ambasaderi Fatuma Ndangiza wari uhagarariye u Rwanda, yavuze ko mu biganiro byatanzwe muri iyi nama hagaragajwe impungenge z’aho ibihugu bihindura Itegeko Nshinga bitagishije inama abaturage kandi riva mu bitekerezo byabo. Agaruka ku kuba u Rwanda rwarateye intambwe mu miyoborere no kwegereza abaturage ubuyobozi.

Iyi nama kandi yanagaragaje ko muri Afurika y’Iburasirazuba imitwe itavuga rumwe n’ubutegetsi nta mbaraga ifite ahubwo yibanda mu kunenga ubutegetsi buriho kuruta kugaragaza ubushake no kugira uruhare mu guteza imbere demokarasi n’imiyoborere myiza. Ibi byatumye basaba ko abatavuga rumwe n’ubutegetsi gukorana na za Guverinoma mu guteza imbere demokarasi.

Umuyobozi w’ishami rishinzwe ibya politiki mu muryango wa Afurika yunze ubumwe (AU), Dr Khabele Matlosa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE