Kuva mu Biryogo kugera Kicukiro: Uko imihanda y’uduce twa Kigali iri kurimbishwa (Amafoto)

Yanditswe na Niyonzima Moïse
Kuya 2 Gashyantare 2021 saa 07:17
Yasuwe :
0 0

Ibikorwa remezo bitandukanye nk’imihanda izamurwa mu Mujyi wa Kigali biriyongera ubutitsa. Ibi bituma ubwiza bwa Kigali bwirahirwa n’abayizi ndetse n’abatarayikandagizamo ikirenge bakayitangarira cyane.

Umwaka wa 2017 by’umwihariko watangiranye ibikorwa bishya muri Kigali aho imihanda minini n’imito yatangiye gukorwa ndetse icyo gihe byari biteganyijwe ko hakorwa ibilometero 54 aho yose izaba ifite ibice bine aho kuba bibiri nk’uko byari bisanzwe.

Iyagurwa n’ikorwa ry’iyi mihanda ryahereye ku yo wavuga ko yabonekagamo umubyigano binagera kuri ya yindi y’imigenderano ihuza uduce dutandukanye mu Mujyi wa Kigali.

Iterambere ry’ibi bikorwa remezo by’imihanda rifasha abenegihugu kugenderana no guhahirana n’abandi bo mu bice bitandukanye nta birantega bahuriye na yo mu rugendo.

Ubu uheruka mu Biryogo mu mwaka ushize, ahageze yatungurwa kuko hubatswe imihanda itandukanye irimo uva ahazwi nko ku Kadege mu Rugunga ugana ku Bisima n’ahahoze isoko rya Biryogo mbere y’uko risenywa.

Ubu agace kahozemo utuyira duto, abantu banyuramo babyigana, ubu hagejejwe umuhanda w’umukara batambukamo batikandagira. Mu minsi ya vuba uraza kuba urara unacaniwe.

Ibi ni nako bimeze ku mihanda yo mu bice bitandukanye byo mu Mujyi wa Kigali birimo Nyacyonga, Kagugu, Batsinda, Masizi n’iya Kicukiro igana mu Karere ka Bugesera. Aha hose hari kubakwa imihanda ndetse abahatuye ubu barishimira ko begerejwe imihanda ya kaburimbo.

Umunyamakuru wa IGIHE, Niyonzima Moïse, yazengurutse mu bice bitandukanye bya Kigali areba impinduka zigaragara muri ibi bice by’umwihariko uko byahindurwe isura binyuze mu bikorwa remezo by’imihanda yorohereza abaturage kugenderana.

U Rwanda rurakataje mu kubaka ibikorwa remezo by’umwihariko ibijyanye n’imihanda, ifasha abaturage guhahirana hagati yabo ndetse ikanoroshya ubucuruzi bwambukiranya imipaka.

Kuva nyuma ya Jenoside yakorewe Abatutsi mu 1994, igihugu cyashyize imbaraga mu guhanga imihanda mishya no kuvugurura iyari isanzwe ariko yari yashegeshwe bikomeye.

U Rwanda rufite imihanda ireshya n’ibilometero ibihumbi 38 birenga, irimo iya kaburimbo irenga ibilometero 2038 kandi imyinshi muri yo yubatswe nyuma ya Jenoside. Iyo yongeweho imihanda y’imidenderano ijya mu ngo z’abantu, mu mirima n’igana ahantu hatandukanye, mu Rwanda habarurwa imihanda ireshya n’ibilometero 44 600.

Igihugu cyihaye intego yo gukoresha kaburimbo iciriritse mu mihanda imwe n’imwe hibandwa ku y’imigenderano. Nibura imihanda ingana na 20% y’iyo u Rwanda rufite izaba yashyizwemo kaburimbo mu myaka 20 iri imbere.

Muri gahunda ya Guverinoma y’imyaka irindwi (NST1), u Rwanda rwateganyije ko nibura ruzaba rufite imihanda yo ku rwego rw’igihugu ireshya n’ibilometero 1792 bivuye ku 1531.

U Rwanda rwashyize imbere imihanda ya kaburimbo yoroheje kuko imara imyaka myinshi itarasaza; iri kugenda yubakwa hirya no hino mu byaro aho babanje imihanda ikora kuri kaburimbo kugira ngo ijye yorohereza abahinzi kugeza umusaruro wabo ku mihanda.

Mu mwaka ushize, imihanda y’imigenderano ireshya na kilometero 2487 yarasanwe ugereranyije na kilometero 2666.8 yo mu 2019/2020. Byitezwe ko izagera ku bilometero 5,145 mu 2024.

Imihanda y’i Nyanza ya Kicukiro

I Nyanza ho mu Karere ka Kicukiro hari kubakwa imihanda igezweho mu koroshya ingendo
Inkengero z'umuhanda hubakwa urukuta rukomeye mu gukumira ko ubutaka bwatengukiramo
Abakozi ni benshi barakataje n'imirimo yo kubaka umuhanda
Imihanda iri kubakwa irimo izahuza Akarere ka Kicukiro n'aka Bugesera ugana ahari kubakwa Ikibuga Mpuzamahanga cy'Indege
Ni umuhanda ufite ibyerekezo bine mu kugabanya umuvundo w'imodoka
Mu Rwanda hari imihanda ireshya n'ibilometero 2000 ya kaburimbo mu bice bitandukanye by'igihugu
Umuhanda uhuza Kicukiro na Bugesera uri kwagurwa ndetse imirimo irarimbanyije
Niwuzura uzaba ari umuhanda munini
Mu bigaragaza iterambere ry'ahantu harimo n'imihanda yorohereza abahagana kuhagera batekanye
Ku Mugezi w'Akagera hari kubakwa ikiraro kigezweho gihuza umuhanda wa Kicukiro n'uwa Bugesera
Imirimo yo kwagura umuhanda uhuza Kicukiro na Bugesera irarimbanyije
U Rwanda rukoresha ingengo y'imari iri hagati ya miliyari 150 na 200 Frw ku mwaka mu bikorwa remezo birimo no kubaka imihanda
Abaturage bari mu bungukira mu iyubakwa ry'ibi bikorwa remezo kuko banahabwa akazi
Aha ni kuri Gare ya Nyanza mu Karere ka Kicukiro
Umuhanda uva Nyamata uhuza uyu mujyi na Kicukiro ugeze ku musozo
I Gahanga ibikorwa byo kubaka umuhanda byarasojwe
Umuhanda wa Kicukiro werekeza i Gahanga
Umuhanda wa Nyanza ugeza kuri gare, na wo uri kubakwa
Uyu muhanda mushya uri kubakwa Kicukiro ukomereza mu bice bya Nyamata

Kagarama ya Kicukiro na yo yararimbishijwe

Abatuye hafi y'uyu muhanda baruhutse icyondo bahuraga nacyo mu gihe cy'imvura
Ni imihanda yubakwa mu buryo bugezweho ndetse abanyamaguru bubakirwa inzira zabagenewe
Ahageze umuhanda, iterambere riranyaruka
Imihanda yubatswe yahinduye isura y'ahantu yegerejwe
Hatewe ubusitani ndetse mu minsi ya vuba buzaba bwafashe
Ni umuhanda ubereye ijisho
Umuhanda wa Kicukiro ugana mu Kagarama ugeze ku musozo

Mu Biryogo hashyizwemo imihanda myinshi y’umukara

Mu Biryogo ugana ku Musigiti uhari naho hashyizwe umuhanda wa kaburimbo
Aha ni ho hahoze isoko ryo mu Biryogo ryaje gusenywa
Uva ku Bisima agana ahahoze isoko rya Biryogo ntaho agihurira n'ibyondo
Ku Bisima utahaheruka ntiyahamenya kuko harahindutse cyane nyuma yo kugezwa umuhanda
Hari ahagikorwa imirimo ya nyuma
Abatuye mu Biryogo baciye ukubiri n’icyondo bahuraga na cyo mu bihe by'imvura
Uyu muhanda uherereye ruguru y'Urusengero rw'Abadiventisiti b'Umunsi wa Karindwi mu Biryogo ugana ku Bisima
Abanyamujyi bo mu Biryogo bishimira iterambere bagejejweho
Na we urabibona ko iyi mihanda ibereye ijisho
Mu minsi ya vuba, aya matara azatangira gucanira imihanda
Muri aka gace hubatswe imihanda igezweho
Ahenshi imihanda yashyizwemo kaburimbo
Hari uduce hagikorwa imirimo ya nyuma yo kubaka imihanda
Ku mihanda hamaze no gushyirwaho amatara, ashobora gutangira kuyicanira
Mbere muri aka gace habarizwaga imihanda yiganjemo iy'ibitaka
Aho umuhanda wageze, byinshi birahinduka
Uvuye ku Kadege mu Rugunga hari umuhanda uzamuka ugana ahazwi nko ku Bisima mu Biryogo
Mu Biryogo hararyohejwe, hubakwa imihanda igezweho

Kuva Nyacyonga kugera i Masizi naho hari gukorwa neza

Uduce twinshi twegereye Umujyi wa Kigali rwagati twegerejwe ibikorwa remezo birimo imihanda
Mu byo u Rwanda rushimirwa mu kubaka ibikorwa remezo harimo no kubibungabunga mu buryo butangiza ibidukikije
Muri gahunda ya Guverinoma y’imyaka irindwi (NST1), u Rwanda rwateganyije ko nibura ruzaba rufite imihanda yo ku rwego rw’igihugu ireshya n’ibilometero 1792
Mu kubaka imihanda hanibandwa ku kubaka ibiraro aho bikenewe
U Rwanda rwashyize imbere imihanda ya kaburimbo yoroheje kuko imara imyaka myinshi itarasaza
U Rwanda rufite imihanda ireshya n’ibilometero ibihumbi 38 birenga, irimo iya kaburimbo irenga ibilometero 2038
Imihanda ifasha abaturage guhahirana, ikanoroshya ubucuruzi hagati yabo
Mu duce dutandukanye iyo hubatswe imihanda n'iterambere ririhuta
Imihanda iracyubakwa ndetse yitezweho kurushaho guhindura aka gace
N'ibindi bikorwa remezo byatangiye kuzamurwa
Umuhanda wubatswe i Batsinda ubu ni nyabagendwa
Iburyo ni umuhanda ugana Nyacyonga mu gihe uw'ibumoso werekeza i Gasanze
Umuhanda uri mu cyerekezo kigana Masizi, abatuye muri aka gace bo bategereje kubakirwa umuhanda wa kaburimbo
Umuhanda w'i Gasanze uteye ubwuzu kuwureba
Umuhanda wa Gasanze mushya wuzuye mu bihe byashize
Ibikorwa remezo by'imihanda bigenda bishyirwa mu bice bitandukanye by'igihugu
Imiterere y'umuhanda ugana Nyacyonga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .