Kwamamaza

Kutizera amashyaka biterwa n’uko yadutse atwika, ahutaza-Ndayisaba

Yanditswe kuya 23-09-2016 saa 17:45' na Ntakirutimana Deus


Amashyaka yo mu Rwanda ni rumwe mu nzego zakoreweho ubushakashatsi ku buryo abaturage babona inzego zinyuranye zibafasha kugera ku bumwe n’ubwiyunge buhamye nyuma ya Jenoside yakorewe Abatutsi.

Komisiyo y’Ubumwe n’Ubwiyunge yagejeje ibikubiye muri icyo cyegeranyo ku Nteko rusange y’Abadepite yateranye kuri uyu wa Gatanu tariki ya 23 Nzeri 2016.

Muri icyo gipimo cy’uko ubumwe n’ubwiyunge buhagaze mu Rwanda cyakozwe muri 2015, cyagaragaje ko ubwo bumwe buhagaze ku kigero cya 92,5% kivuye kuri 80% mu mwaka wa mu 2010.

Ku bijyanye n’uko babona amashyaka abafasha kugana ku bwiyunge, ngo bihagaze ku kigero 70.5%.

Ugereranyije n’aho izindi nzego zihagaze, icyo kigero kiri hasi kuko nk’inzego z’umutekano ziri ku kigero cya 92.1%, ubuyobozi bwite bwa leta ku kigero cya 95.8%.

Bimwe mu byo abaturage bagaragaje bagendeyeho berekana ko bizeye gake urwo rwego rw’amashyaka, ngo ni uko babona abanyapolitiki bayarimo bajya kwiyamamaza babashakaho amajwi nyuma ntibazongere kubabona babegera ngo babakemurire ibibazo bafite.

Fidèle Ndayisaba, Umunyamabanga Nshingwabikorwa wa Komisiyo y’Ubumwe n’Ubwiyunge, yavuze ko abo baturage banashingira ku mateka yaranze amashyaka mu Rwanda mbere ya Jenoside yakorewe Abatutsi mu 1994.

Ati “Imitwe ya politiki iri muri 70%, si igipimo kibi ariko iyo ugereranyije nyine n’izindi nzego zigira uruhare, barabona ko hakiri byinshi byo gukora babijyananye n’amateka y’imitwe ya politiki muri iki gihugu, ni izo mpungenge bagifite.”

Imyitwarire y’ayo mashyaka ngo hari abo yakomerekeje mu buryo bukomeye mu babajijwe.

Ati “Amashyaka atangira kwanduka mu Rwanda yadutse ahutaza, atwika. No muri 1991 inkubiri y’amashyaka menshi yazanye byinshi birimo no gukoresha urubyiruko mu rugomo na Jenoside. Hari abantu byakomerekeje.”

Ndayisaba yakomeje agira ati “Bifuza ko babona iyo mitwe ya politiki muri rusange ibafasha, ikabegera mu buryo bugaragara. Bifuza ko bajya bahura n’abayirimo kenshi babafasha gushakira ibisubizo ibibazo byabo kurusha uko bahura babasaba majwi nyuma ntibongere kubabona.”

Perezida w’Inteko Ishinga Amategeko, Umutwe w’Abadepite, Mukabalisa Donatille, yavuze ko nk’abadepite, abanyapoliti n’intumwa za rubanda bahagarariye hari icyo bibutswa n’iki cyegeranyo.

Ati “Ni ibitwereka aho tugomba gushyira imbaraga nk’abagize Inteko Ishinga Amategeko. Iyo ibipimo nka biriya byagaragajwe,biba bidusaba kugira icyo dukora nk’abahagarariye Abanyarwanda kugira ngo bibande ku mibanire yabo myiza, ubwiyunge, gushyira hamwe no kwiyumva mu Bunyarwanda.”

Muri rusange ngo intambwe yatewe mu bijyanye n’ubumwe n’ubwiyunge bw’Abanyarwanda irashimishije ugereranyije n’icyegeranyo cyakozwe muri 2010, ariko ngo harasabwa izindi mbaraga.

Mukabalisa ati “ Intambwe yatewe twavuga ko ishimishije ariko yagombye kurushaho guterwa, abanyarwanda bakarushaho kutibona mu ndorerwamo y’amoko, nubwo imibare itari myinshi cyane, ariko na yo ntikwiye kubaho, bikaba bitwereka rero aho tugomba gushyira ingufu n’ubutumwa tugomba gutanga muri gahunda yo kwegera abaturage.”

Mukabalisa yavuze ko bahura n’abaturage kenshi mu bikorwa by’umuganda wa buri kwezi n’ibindi ku buryo ngo bazakomeza kubayobora muri iyo nzira ikwiye. Ikindi ngo ni uko bazibanda ku byiciro by’Abanyarwanda batandukanye.

Ubwo bushakashatsi bwakorewe mu midugudu 450 yo mu turere 30, bukorerwa ku bantu bagera ku bihumbi 12 bagize ibyiciro byose.

Ndayisaba avuga ko impamvu abanyarwanda batarizera amashyaka biterwa n'ibyo yakoze mbere ya Jenoside
Depite Mukabalisa avuga ko iki cyegeranyo gifite icyo kibigishije mu gufasha abanyarwanda kongera kwiyunga

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved