Rwakazina Marie Chantal yatorewe kuyobora Umujyi wa Kigali (Amafoto & Video)

Yanditswe na Rabbi Malo Umucunguzi
Kuya 25 Gicurasi 2018 saa 10:43
Yasuwe :
4 0

Rwakazina Marie Chantal yatorewe kuyobora Umujyi wa Kigali ku majwi 146 mu gihe Henriette Murekatete we bari bahanganye agize amajwi umunani aho asimbuye Nyamurinda Pascal weguye kuri uyu mwanya ku mpamvu ze bwite.

Iri tora ryabaye nyuma y’urugendo rwatangiriye ku gushaka Umujyanama rusange uhagarariye Umurenge wa Nduba mu nama Njyanama y’Akarere ka Gasabo, hatorwa Rwakazina Marie Chantal wahise atorerwa kuba mu nama Njyanama y’Umujyi wa Kigali ahagarariye Akarere ka Gasabo.

Perezida wa Komisiyo y’Amatora, Prof Kalisa Mbanda, niwe watangaje ko abajyanama batoye ari 154, Murekatete Henriette agira amajwi umunani angana na 5.2%, naho Rwakazina Marie Chantal agira 146 angana na 94.8%.

Uko iki gikorwa cyagenze umunota ku wundi

13:00: Minisitiri Kaboneka asoje asaba Umuyobozi mushya w’Umujyi wa Kigali kwihutira kwicarana n’abayobozi asanze, kugira ngo yinjire mu kazi bwangu mbere y’uko agira ikintu abazwa kandi atarakimenya, kuko kuva uyu munsi byatangiye gufatwa ko ibintu byose birebana n’ubuzima bw’Umujyi wa Kigali abizi. Ati "ugomba kwitegura gutanga ibisubizo ku bintu byose."

12:45: Minisitiri Kaboneka yatangiye agira ati “Ndagira ngo tuguhe ikaze mu nzego z’ibanze, mu mazina ufite ubu turongeraho Lord Mayor, ntawe uzongera kuvuga adashyizeho Meya, kuva iyi saha ayo mazina urayabatijwe. Icyiza cyayo ntasaba kumenwaho amazi cyangwa kujyanwa mu yandi mazi, ariya majwi 94% arahagije.”

“Inzego z’ibanze ntabwo ari nshya kuri wowe nubwo wenda utari mu nshingano nk’izo ugiyemo, ariko inzego z’ibanze urazizi wazikozemo n’ubwo byari mu bya tekiniki, ariko nta gishya, uko uzizi niko zimeze. Ni akazi gasanzwe ntikagukange. Usanze abagize nyobozi, usanze abajyanama bafite ubunararibonye.”

Kaboneka yabwiye Meya mushya w’Umujyi wa Kigali ko mu bikorwa byihutirwa harimo abantu batuye ahantu “hashyira ubuzima bwabo mu kaga kigomba kwitabwaho”, gukomeza umuvuduko Umujyi wa Kigali uriho mu Isuku n’Isukura no gusigasira umutekano umaze kuba ikirango gikomeye cy’Umujyi wa Kigali, gituma urushaho gusurwa.

12:40: Minisitiri w’Ubutegetsi bw’igihugu akaba n’Umushyitsi mukuru, Francis Kaboneka, ashimiye abajyanama n’abandi bose bitabiriye iri tora ku kazi gakomeye bakoze mu gutora Umuyobozi w’Umujyi wa Kigali.

12:30: Perezida w’Inama Njyanama y’Umujyi wa Kigali, Maitre Rutabingwa Athanase, yahaye ikaze Meya Rwakazina, amwizeza ko aje mu mujyi "ufite abajyanama na komite nyobozi bashyize hamwe."

Anahaye ikaze Bitwayiki André nawe warahiye muri manda ya kabiri muri Njyanama y’Umujyi wa Kigali ahagarariye abikorera, avuga ko yabitorewe abikwiye kuko asanzwe ari umuntu witanga mu mirimo ye.

Avuze ko nubwo Akarere kamaze iminsi kadafite umuyobozi nta cyuho cyabayemo kuko inshingano z’umuyobozi w’umujyi bafatanyaga kuzuzuza, ashimira abayobozi bose babigizemo uruhare.

12:15: Meya w’Umujyi wa Kigali, Rwakazina Marie Chantal, ahawe umwanya ngo avuge uko yakiriye iki gikorwa, avuga ko yishimye cyane kandi ashimira abamutoye.

Ati "Nifuje kuba umujyanama wa kamwe mu turere ndetse n’Umujyi wa Kigali kugira ngo ntange umusanzu wanjye kurusha uko nsanzwe mbikora. Ndabashimira ko inzira ingejeje aha yatangiye mu byumweru bibiri cyangwa bitatu bishize mu Murenge wa Nduba kugeza no ku Karere ka Gasabo, aho hose niho nahuraga n’abantu banyereka ko turi kumwe kandi banshyigikiye."

Ashimangiye ko azakoresha imbaraga ze n’ubwenge kugira ngo hashyirwe mu bikorwa ibiteganywa muri gahunda y’igihugu y’imyaka irindwi n’igishushanyo mbonera cy’Umujyi wa Kigali, mu buryo busubiza ibibazo by’abatuye Umujyi bafite ubushobozi butandukanye, ku buryo ntawe uzumva ko ari ku ruhande rw’ibibera mu mujyi.

12:10: Perezida w’Urukiko Rukuru, Kaliwabo Munyantore Charles, yemeje ko "abajyanama barahiye n’Umuyobozi w’Umujyi wa Kigali bujuje ibisabwa n’amategeko kugira ngo batangire inshingano zabo."

Asabye ubuyobozi bw’Umujyi wa Kigali gukomeza gukurikiza amategeko, ashima ko imanza zireba umujyi wa Kigali zagabanyutse bityo bikwiye gukomereza aho.

12:07: Rwakazina amaze kurahirira inshingano ze nk’Umuyobozi w’Umujyi wa Kigali mu ndahiro iteganywa mu Itegeko Nshinga, asoza agira ati Imana ibimfashemo, maze abitabiriye aya matora bamuha amashyi n’impundu.

12:05: Abajyanama bari mu cyumba cy’itora bakirije amashyi n’impundu Rwakazina Marie Chantal, Umuyobozi Mushya w’Umujyi wa Kigali. Nyuma yo gutorerwa kuyobora Umujyi wa Kigali, Rwakazina Marie Chantal agiye guhita arahirira izi nshingano, imbere y’Urukiko Rukuru.

12:00: Rwakazina Marie Chantal atorewe kuyobora Umujyi wa Kigali ku majwi 146 mu gihe Henriette Murekatete we bari bahanganye agize amajwi umunani

11:40: Abajyanama bose barangije gutora, udusanduku tw’itora twigijwe imbere ngo igikorwa cyo kubarura amajwi gitangire. Abantu bari gusubira mu myanya yabo ngo barebe ugomba kuyobora Umujyi wa Kigali ngo arangize igihe cyari gisigaye kuri manda y’umuyobozi w’umujyi.

Abajyanama baragenda ku murongo, utahiwe agahabwa aho yicara akandika uwo yatoye
Me Murekatete yaciye bugufi yandika uwo yatoye mu ibanga
Umukandida Me Murekatete Henriette atora

11:10: Abakandida bose barangije kuvuga ibigwi byabo, ubu abagize inteko itora bari ku murongo batanga amajwi yabo. Gutora ni ugushyira mu gasanduku k’itora urupapuro ruriho uwo watoye.

Rwakazina Marie Chantal amaze gutora

-  Me Murekatete Henriette

Me Murekatete Henriette w’imyaka 32 avuze ko yize amategeko ku rwego rwa Master’s akaba yarize no muri ILDP, ku buryo ibyemezo byose bizajya bifatwa bizaba bikurikije amategeko, ku buryo “nta muntu uzongera kurega umujyi”.

Uyu mugore yasaga n’usetsa abantu ati “Ndabona mwanyishimiye mumpe amajwi”, “mugiye kumpa amajwi ndabibona ku maso yanyu,” ku buryo atakoresheje umwanya urenze iminota ibiri avuga ibigwi bye, mu gihe mugenzi we yakoresheje igera ku icumi.

Ati “Nk’umuntu usanzwe muri njyanama y’umujyi, ibibazo ufite ndabizi n’aho ibisubizo byava ndahazi.”

Me Murekatete Henriette w’imyaka 32 ni umwe mu bakandida
Rwakazina yivuze ibigwi abenshi bamuha amashyi

- Imigabo n’imigambi ya Rwakazina

Kuri we ngo nta bintu bishya arazana kuko buri mwaka Umujyi wa Kigali ugira imihigo, icyo azashyira mu bikorwa cya mbere kikazaba gushyira mu bikorwa igishushanyo mbonera cy’Umujyi wa Kigali, ku buryo ugomba kuba umujyi wisanzurwamo n’abanyarwanda b’amikoro atandukanye”.

Yizeje ko azateza imbere imyidagaduro, amakoperative cyane cyane y’abagore n’urubyiruko, akazashyira imbere kujya inama n’abayobozi n’abakozi azasanga mu Mujyi wa Kigali.

Rwakazina anavuze ko Umujyi wa Kigali ukeneye gutsura imibanire n’izindi nzego n’ibigo bifite ubushobozi mu gushyira mu bikorwa gahunda z’umujyi, bityo hakenewe gushakisha uburyo bw’ubushobozi. Yasoje agira ati “Nizeye ko muri bumpe amajwi, mukanaha ishema mugenzi wanjye wanyamamaje.”

Minisitiri w'Ubutegetsi bw'Igihugu, Francis Kaboneka, yitabiriye amatora y'Umuyobozi mushya w’Umujyi wa Kigali

- Rwakazina Marie Chantal ni muntu ki?

Rwakazina Marie Chantal w’imyaka 45, arubatse, afite abana babiri. Yavuze ko yishimiye icyizere yagiriwe n’uwamutanzeho umukandida, biganye muri Kaminuza y’u Rwanda.

Arangije muri Kaminuza y’u Rwanda yarahigishije guhera mu 2000-2008, nyuma ngo asanga akeneye gukora mu nzego z’ibanze ubwo yasabaga akazi k’umukozi ushinzwe kongerera ubushobozi abayobozi b’inzego z’ibanze. Nyuma y’imyaka itatu yagizwe umuyobozi wungirije wa Ralga guhera mu 2010-2013.

Icyo gihe ngo yasanze bimwe mu nkunga n’imfashanyo bidasubiza neza ubushake n’iterambere ry’igihugu, asaba kujya mu Muryango w’Abibumbye ngo atange umusanzu, kuko yize ibijyanye n’iterambere ry’ubukungu ari naho yakoze guhera mu 2013 kugeza ubu.

Ngo bitewe n’ubumenyi yari afite, basanze bidahagije bamugira “umuhuzabikorwa w’inkunga zose z’Umuryango w’Abibumbye mu bikorwa bya leta.”

Uyu mugore yavuze ko yanagize uruhare mu gutegura gahunda ya guverinoma y’imyaka irindwi, cyane cyane mu cyiciro cy’ubukungu.

10:55: Undi mukandida ubonetse ni Me Murekatete Henriette wiyamamaje ku giti cye ari nabo bakandida babiri babonetse

10:50: Hatangiye ibikorwa byo kwamamaza abakandida, umwe ateruye ati "Ndamamaza umujyanama Madamu Rwakazina Marie Chantal, impamvu mwamamaza ndamuzi mu ishuri muri kaminuza, yari umunyeshuri w’umuhanga cyane, akagira ubushishozi, ubwitonzi n’ubunyangamugayo”.

Amuvuze imyato ko yakoze muri Ralga ku buryo afite ubunararibonye mu mikorere y’inzego z’ibanze, ndetse ko asanzwe ari umukozi w’Umuryango w’Abibumbye mu Ishami ry’Iterambere, urwego uyu mujyi ushyize imbere.

Ushinzwe amatora abajije niba Rwakazina ahari kandi abyemera, nawe ati "Yego arahari kandi arabyemera"

10:45: Umuyobozi w’ibikorwa by’amatora y’Umujyi wa Kigali amaze gutangaza ko abasanzwe muri Komite Nyobozi y’Umujyi batemerewe kwiyamamaza, ndetse n’abari muri Komite ya njyanama nabo batabyemerewe.

10:40: Abagize inteko itora Komite Nyobozi y’Umujyi wa Kigali barimo Abagize Inama Njyanama y’Umujyi wa Kigali; Abagize Inama Njyanama z’Uturere tugize Umujyi wa Kigali; Abagize biro z’Inama Njyanama z’Imirenge yose iri mu Mujyi wa Kigali.

Inteko itora Komite Nyobozi y’Akarere n’iy’Umujyi wa Kigali yemerewe gutora iyo hari nibura bibiri bya gatatu by’Abajyanama b’ako Karere cyangwa b’Umujyi wa Kigali na bibiri bya gatatu by’abandi bose bagize inteko itora kuri urwo rwego. Ushinze amatora amaze gutangaza ko umubare ukenewe ngo itora ribe wuzuye

10:30 : Urukiko Rukuru rugeze mu cyumba cy’Umujyi wa Kigali, nirwo rugiye kwakira indahiro ya Rwakazina Marie Chantal na Bitwayiki André binjiye mu Nama Njyanama y’Umujyi wa Kigali.

Bitwayiki nawe amaze kurahira, uyu amaze igihe ahagarariye abikorera mu Mujyi wa Kigali. Rwakazina we asanzwe ari umukozi w’Ishami ry’Umuryango w’Abibumbye mu Rwanda nka UN Coordination Analyst.

Rwakazina Marie Chantal asanzwe ari umukozi w'Ishami ry'Umuryango w'Abibumbye mu Rwanda nka UN Coordination Analyst
Bitwayiki André yinjiye mu Nama Njyanama y'Umujyi wa Kigali
Perezida wa Komisiyo wa Komisiyo y'Igihugu y'Amatora, Prof. Kalisa Mbanda, (ibumoso) yitabiriye iki gikorwa
Umuyobozi w'Akarere ka Gasabo, Rwamurangwa Stephen, ari kumwe n'uwa Nyarugenge, Kayisime Nzaramba, mu cyumba cy'itora
Umuyobozi w'Akarere ka Kicukiro, Dr Nyirahabimana Jeanne

Ibyo wamenya ku bayoboye Umujyi wa Kigali

Mu bayoboye Umujyi wa Kigali, Mukaruliza Monique,niwe wayoboye igihe gito kingana n’amasaha 8184 ahwanye n’iminsi 341 mbere y’uko agirwa Ambasaderi w’u Rwanda muri Zambia atarangije manda yari yaratorewe kuya 29 Gashyantare 2016.

Nyamurinda Pascal wamusimbuye yamaze iminsi 418 (umwaka umwe, ukwezi kumwe n’iminsi 25).

Nyuma ya 1994 kugeza muri 2016, Umujyi wa Kigali umaze kuyoborwa n’abayobozi 6 barimo aba perefe bawuyoboye ucyitwa Perefegitura y’Umujyi wa Kigali. Muri abo ba Perefe harimo Lt Col. (icyo gihe yari Majoro) Rosa Kabuye (1994- 1997), Musoni Protais (1997-1999) , Kabandana Mariko (1999- 2001).

Muri ba Meya harimo Mutsindashyaka Théoneste (2001-2006), Kirabo Aissa Kacyira (2006-2011), Ndayisaba Fidèle(2011- 2016), Mukaruliza Monique (2016-2017) na Nyamurinda Pascal (2017-2018).

Andi mafoto kanda hano

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza