Kurekura Abanyarwanda icyenda, intangiriro mu kuzahura umubano w’u Rwanda na Uganda

Yanditswe na Twarabanye Venuste
Kuya 10 Mutarama 2020 saa 12:39
Yasuwe :
0 0

Imyaka hafi itatu irirenze umubano hagati y’u Rwanda na Uganda ujemo agatotsi, bitewe n’ishimutwa ry’abanyarwanda muri iki gihugu cy’igituranyi, ibikorwa byacyo byo gushyigikira imitwe igamije guhungabanya u Rwanda no kubangamira ubucuruzi bwarwo.

Abanyarwanda bagize ibyago byo gutabwa muri yombi na Uganda bakorewe iyicarubozo mu mabohero y’Urwego rw’Ubutasi mu gisirikare (CMI) kugeza ubwo bamwe bapfuye abandi bahinduka ibisenzegeri ku buryo ntacyo bakimarira.

Ibikorwa by’agashinyaguro abanyarwanda bakorerwa muri Uganda, ntibihwema kugaruka mu buhamya bw’abahonotse iyo ngoyi, bakajugunywa ku mupaka wayo n’u Rwanda. Bavuga ko hari abandi benshi bari muri za gereza n’amabohero ya CMI.

Ubwo u Rwanda na Uganda byasinyanaga amasezerano i Luanda, ingingo yo kurekura abanyarwanda bafunzwe ni imwe mu yibanzweho. Mu bihe bitandukanye hari abagiye bajugunywa ku mipaka, kugeza ku icyenda barekuwe mu buryo bweruye muri iki cyumweru.

Ni nyuma kandi y’uko ku cyumweru tariki ya 29 Ukuboza 2019, Perezida Kagame yakiriye Intumwa ya Perezida Museveni, Ambasaderi Adonia Ayebare, wari uzanye ubutumwa buvuga ku mubano w’ibihugu byombi.

Bidatinze, Museveni yavuze ko Ayebare na Perezida Kagame bagiranye ibiganiro byiza ndetse ko mu gihe cya vuba, hagiye gufatwa imyanzuro ishyira iherezo ku bwumvikane buke bumaze igihe kinini mu mubano w’ibihugu byombi.

Ambasaderi Adonia Ayebare usanzwe ari Intumwa ihoraho ya Uganda mu Muryango w’Abibumbye i New York, mu kiganiro yaraye agiranye na NTV Uganda, yavuze ko kurekura abanyarwanda icyenda ari ikimenyetso cyiza n’intambwe mu kuzahura umubano w’ibihugu byombi.

Ati “Mu by’ukuri ni ikimenyetso cyiza cyakozwe na Uganda, kuko nk’uko mubizi kimwe mu bibazo byari bihari cyari icyo u Rwanda rwita ‘itabwa muri yombi ridakurikije amategeko ry’abanyarwanda...kurekura aba bantu biratanga ubutumwa ko gusubiza ku murongo umubano w’ibihugu byombi biri mu nzira. Ibi bizatuma n’ibindi bibazo bikemuka”.

Abajijwe niba ibi byaba ari intambwe iganisha ku kongera gufungura umupaka, Amb. Ayebare, yavuze ko Museveni aherutse kwizeza abaturage ko hazakorwa ibishoboka byose ibibazo biri hagati y’ibihugu byombi bigakemuka, bityo akaba ari rwo rugendo rwatangiye.

Muri iki kiganiro, Amb. Ayebare yirinze gutangaza ubutumwa yari ajyanye i Kigali cyangwa icyo yasubijwe. Yavuze ko icyo yakoze ari uko yari intumwa, yagejeje ubutumwa ku wo yari atumweho maze igisubizo ahawe agishyikiriza uwamutumye ibindi biri hagati yabo.

Mu kiganiro Minisitiri w’Ububanyi n’Amahanga w’u Rwanda, Dr Vincent Biruta aherutse kugirana n’itangazamakuru, yavuze ko kurekura abanyarwanda ari intangiriro nziza yo gushyira mu bikorwa amasezerano ya Luanda.

Ati “Gusa ntabwo aba bahagije kuko hari abandi barenga 100 bari muri Uganda bahafungiwe nabo twizera ko ubwo byatangiye baza kurekurwa.”

Kuri iki kibazo cyo kuba hari abagifunzwe, Amb. Ayebare, yavuze ko niba bahari nabo bazarekurwa kuko ‘kugeza ubu hari umwuka mwiza wo gukemura ibibazo byose, kandi nta na kimwe kitakemuka’.

Yakomeje avuga ko hari ubushake bw’abakuru b’ibihugu byombi bwo gukemura ibibazo bihari kandi Uganda ku ruhande rwayo izakora ibishoboka byose bigakemuka kuko hari icyizere.

Muri Werurwe 2019 Guverinoma y’u Rwanda nibwo yasabye abaturage bayo guhagarika kujya muri Uganda kubera impungenge z’umutekano wabo. Ni icyemezo cyafashwe nyuma y’ubuhamya bw’abarenga 800 bari bamaze iminsi birukanwa ku butaka bw’icyo gihugu bagaragaza ihohoterwa n’iyicarubozo bakorewe.

Amb. Ayebare abajijwe ku bijyanye n’umutekano w’abanyarwanda muri Uganda, niba azi ko bafite umutekano muke, yasubije ko yaba abizi cyangwa atabizi, ibihugu bifite ububasha bwo kugira inama abaturage babyo ku hantu bakwiye kujya n’aho badakwiye kurenga kandi ko biba bifite impamvu zabyo.

U Rwanda ruvuga ko muri Uganda hari abashaka guhungabanya umutekano warwo bityo nabyo bikwiye gukemurwa nk’uko biri mu masezerano ya Luanda.

Minisitiri Biruta avuga ko mu gihe ibi bibazo byaba bikemutse, urujya n’uruza ruzongera rukagenda neza.

Ati “Twiteguye kuba twabwira Abanyarwanda ko nta mpungenge bajya muri iki gihugu, ariko bizakorwa ari uko abantu bakomeje kurekurwa tukagira ibyo dushingiraho. Hari ibivugwa ko twafunze umupaka ariko sibyo kuko ibyakozwe ni ukumenyesha Abanyarwanda ngo badahahoterwa.”

Kuva aho inama ya Kigali yiga ku masezerano ya Luanda ibereye, Abanyarwanda 99 nibo bari bamaze kujugunywa ku mipaka ihuza u Rwanda na Uganda kugeza mu ntangiriro za Ukuboza mu gihe kuva umwaka wa 2019 watangira bari 588.

Kuva muri Mutarama 2018, Abanyarwanda 1438 nibo bajugunywe ku mipaka nyuma y’igiye bafungiwe muri kasho z’Urwego Rushinzwe Iperereza rya Gisirikare (CMI) n’Urwego Rushinzwe Iperereza mu gihugu (ISO) bakorerwa iyicarubozo.

Inkuru wasoma: Ibyishimo n’umubabaro w’ibigeragezo ku banyarwanda icyenda barekuwe na Uganda (Amafoto na Video)

Bamwe mu banyarwanda icyenda baherutse kurekurwa na Uganda
Ubwo Perezida Kagame yakiraga Amb. Ayebare mu mpera z'ukwezi gushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza