Kuki Afurika ikigowe no kwandikisha imirage ndangamateka yayo muri UNESCO?

Yanditswe na Evariste Nsengimana
Kuya 10 Nzeri 2018 saa 06:39
Yasuwe :
0 0

Ishami ry’umuryango w’abibumbye ryita ku burezi, ubumenyi n’umuco (UNESCO), rimaze kwandika imirage y’Isi irimo inzibutso n’imitungo kamere y’ibihugu 1092, harimo iyo ku mugabane wa Afurika 95 gusa.

Impuguke mu bijyanye no kwandika imirage ndangamateka na ndangamuco, zivuga ko imirage y’uyu mugabane itandikwa uko bikwiye ndetse imwe mu yanditswe ikagenda ikurwa ku rutonde kubera kutuzuza ibisabwa.

Zivuga ko impamvu ibihugu byawo byinshi bitagaragara ku rutonde rw’Umurage w’Isi, ari uko bidafite impuguke nyinshi zifite ubushobozi muri uru rwego n’ababikorera ubuvugizi.

Kuri uyu wa Mbere, mu Rwanda hatangijwe amahugurwa y’ibyumweru bitatu ahuza impuguke mu bijyanye no kwandika umurage ku rwego rw’Isi, ziturutse mu bihugu 16 bya Afurika bivuga Igifaransa.

Umuyobozi w’Ikigo ndangamurage muri Afurika, Kidiba Samuel, yavuze ko hakenewe ubukangurambaga no kongera impuguke.

Ati “Navuga ko ibigo ndangamurage muri Afurika nta mpuguke bifite. Nsanga amahugurwa ku murage, inzu ndangamateka, umutungo kamere ari ikintu cy’ingenzi”.

“Ni ngombwa ko tugira abantu babizobereyemo. Birakwiye ko hakorwa ubukangurambaga mu baturage bo bagira uruhare mu kubibungabuhanga.”

Yavuze ko u Rwanda rufite amahirwe menshi kuba rwakiriye aya mahugurwa, kuko hari abanyarwanda bayarimo ndetse n’izo mpuguke zikazasura umutungo kamere warwo.

U Rwanda nta rwibutso cyangwa umutungo kamere warwo wanditse muri UNESCO ariko rwateye intambwe yo kwandikisha inzibutso enye za Jenoside yakorewe Abatutsi zirimo; urwa Bisesero, Kigali, Murambi na Nyamata.

Umunyamabanga Nshingwabikorwa wa Komisiyo yo kurwanya Jenoside, Dr Jean Damascène Bizimana, yavuze ko u Rwanda nta mpuguke n’imwe rufite.

Ati “Ni ukugira ngo badufashe mu gikorwa cyo kuzandikisha (inzibutso) ariko banahugure abanyarwanda, baba abakozi ba CNLG, ab’inzu ndangamurage n’abandi muri ubwo bumenyi. Kuko usanga mu gihugu nta mpuguke n’imwe dufite.”

Avuga ko UNESCO igira komite itora ikanemeza inzibutso n’imitungo kamere, bigasaba ko ibihugu bya Afurika bikorerwa ubuvugizi.

Bimwe mu bisabwa kugira ngo UNESCO yemeze umutungo kamere n’inzibutso ku rutonde rw’Isi harimo imicungire yabyo, kugaragaza amateka yose, bitagombeye umuntu uyobora ababireba n’ibindi.

Ibyo Afurika ihomba bitewe no kuba imirage ndangamateka yayo itanditswe muri Unesco, birimo ko amateka yabyo atamenyekana, iyo mirage ntisurwe.

Afurika ihomba amadevize ava mu bukerarugendo ndetse iyo mirage ntishyirwe muri gahunda z’amashuri ngo abanyeshuri bayigishwe.

Umuyobozi w’Ikigo ndangamurage muri Afurika (Ecole du Patrimoine Africain EPA) Kidiba Samuel, avuga ko igituma imirage ya Afurika itandikwa ari uko nta mpuguke
Umunyamabanga Nshingwabikorwa wa Komisiyo yo kurwanya Jenoside, Dr Jean Damascène Bizimana, yavuze ko u Rwanda nta mpuguke n’imwe rufite
Abitabiriye amahugurwa baturutse mu bihugu 16 bya Afurika bivuga igifaransa


[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza