00:00:00 IGIHE NETWORK KN KINYARWANDA EN ENGLISH FR FRANCAIS

Kuki abantu banyoye inzoga zimwe badasinda kimwe?

Yanditswe na Muhonzire Sylvine
Kuya 5 Ugushyingo 2021 saa 07:26
Yasuwe :
0 0

Burya koko ibijya gushya birashyuha! Ku bantu basanzwe bajya kusiriza ikivi cy’umunsi imbere y’icupa, murabizi ko ikizakubwira ko igitaramo cyinikije ari uko abagabo bazatangira gutarama bigamba, bikaba amahire iyo batarangajwe n’imipira ibera iyo mu Burayi, ahubwo bakirata bya gipfura baganira, ari na ko bakomeza kubobeza umuhogo, ngo hato hatagira ubangamirwa n’inyota akabura uko atambutsa igitekerezo cye.

Benshi bazakubwira ko umuntu watangiye kwizihirwa uzamubwirwa n’uburyarya bwa ntabwo, akarangwa no kuvuga menshi ariko arimo ukuri, rimwe na rimwe kuba kutarigeze kugarukwaho mbere.

Uzajya kumva umwe yigambye uburyo inka yakoye zitapfuye ubusa, kuko zamuhesheje umugore bubakanye urugo rugakomera. Hirya aho ubwo bazaba biyamira birata uko bageze ku ifaranga, mu gihe abigeze kwegura intwaro bakarwana, nabo bakunze guhabwa rugari mu biganiro nk’ibi.

Uretse kwigamba iby’amateka, abamaze igihe ku icupa bazanakubwira ko ryagize uruhare rufatika mu kubateza imbere bashingiye ku buryo bimwe mu bitekerezo byabagejeje ku iterambere, babivomye mu kabari bari mu biganiro na bagenzi babo.

Hari n’abadatinya kukubwira ko ari ho bajya gushakira amakuru agezweho yavamo ibitekerezo by’inyamibwa, mu gihe abandi babifite bagana iy’akabari kugira ngo babisangize bagenzi babo maze bikarishywe ku buryo umuntu ahava azi icyo gukora.

Icyakora muri aba bose baje mu kabari, yewe bakazanwa n’impamvu tutaveba, siko bose bazasubiranayo ishema binjiranye, kuko hari abagera ku icupa rya gatatu bya bitekerezo byatangiye kuvangirwa, mu gihe abandi bakomeza umutsi bakirenza amakaziye kandi rwose ari bataraga, aba bakitwa ‘abami b’umusemburo.’

Nubwo abakunzi b’agatama bazakubwira ko ibyo abandi twita gusinda mu by’ukuri ari ukunezerwa k’umubiri, abaganga bo bazakubwira ko gusinda ari ikimenyetso cy’uko watangiye kunaniza umubiri wawe, uwuha alcohol (ikinyabutabire kiba mu nzoga), irengeje ubushobozi bwawo, bityo ubwoko bugatakaza ubushobozi bwo kwikoresha no kwigenzura.

Buri wese, mu mvugo y’abanywi kabuhariwe, agira uburyo anezerwamo. Hari abazavuga amagambo menshi kandi bari basanzwe badakunda kuvuga, mu gihe abandi bazaruca bakarumira, ku buryo ushobora kubibazaho bikakurenga.

Hari abazarakazwa n’ubusa, abandi bashimishwe n’ubusa, bamwe barire, abandi baseke, mbega kereka kwimenyera ibya buri wese, naho ubundi nta gipimo cy’ibikorwa by’umuntu warisomye akarenza urugero, uretse ko ikizwi ari uko ubwonko bwe buba budakora neza.

Ubusanzwe, inzoga ziba zifite ikigero cya alcohol irimo, ari na yo igusindisha. Buri uko wiranguje icupa, 20% bya alcohol yayo biva mu gifu bikomereza mu maraso, mu minota iri hagati y’itanu na 10, ikaba yatangiye gukora impinduka mu mubiri, kuko iba yamaze kugera mu bwonko.

Kwa kundi zitangira kuryoha ugakomeza kugereka amacupa ku yandi, burya uba uri kunaniza umwijima wawe, urugingo rufite inshingano zirenga 500 mu mubiri wawe, zirimo no kuyungurura uburozi buwinjiramo, ndetse na alcohol ishobora kukugiraho ingaruka.

Abazi iby’icupa cyane bazakubwira ko ari byiza kunywa witonze udahubuka, kugira ngo wirinde gusinda vuba, kandi ibi nibyo kuko bitwara igihe kinini kugira ngo umwijima utunganye alcohol iri kwinjira mu mubiri, ndetse n’impyiko ziyungurure amaraso zivanamo alcohol isohoka mu nkari. Ikibazo ni uko ibyo bikorwa by’umubiri bitinda cyane, ku buryo umuntu uri ku icupa, atabona umwanya wo gutegereza ayo masaha yose, ari na byo bivamo kunaniza umubiri no gusinda.

Itandukaniro ry’ababasha inzoga n’abaganzwa na zo rishingiye kuki?

Mu tubari tumaze igihe, uzasanga hari abantu bazwiho kugira inkuru ziryoshye, ku buryo hari n’ababagurira icupa kugira ngo bababwire inkuru gusa. Haba kandi harimo abami b’umusemburo, bamwe bashobora kumara amasaha menshi banywa inzoga nyinshi ariko ukabona hari ukuntu bagikomeye, nyamara abo batangiranye basinze, rimwe na rimwe batananyoye kubarusha.

IGIHE yifuje kumenya impamvu umuntu umwe ashobora gusinda vuba mu gihe undi bari kunywa inzoga zingana mu mubare n’ingano ya alcohol, ashobora kumara igihe kinini adasinda.

Inzobere mu bijyanye no gupima ibipimo byo muri laboratoire, yavuze ko bishobora guterwa n’uburyo umubiri w’umuntu ushobora kuba umaze kumenyera inzoga.

Ati “Kugira ngo umuntu agere ku rwego rwo guhindura imyitwarire mu gihe yanyoye inzoga, bishobora guterwa bwa mbere n’ingano ya alcohol mu maraso, icya kabiri hakabaho uburyo umubiri w’umuntu umaze kumenyera alcohol no kumenya uko uyitwaraho.”

Yatanze urugero, avuga ko “Umuntu ashobora kunywa icupa rimwe ry’inzoga bwa mbere agahita asinda cyane abantu bakabibona, mu gihe umuntu umaze igihe kinini cyane azinywa umwe tuvuga ko azimenyereye, ashobora kunywa rya cupa rimwe ukabona nta n’ikintu cyahindutse.”

Ingano y’umubiri w’umuntu

Iyo nzobere ikomeza ivuga ko ibiro, cyangwa se ingano y’umubiri mu binini, ishobora kugira uruhare mu buryo umuntu ashobora gusinda vuba cyangwa atinze.

Ati “Ufashe urugero rw’abantu babiri badasanzwe banywa inzoga, umwe ufite ibiro 90 n’ufite ibiro 60 bose ukabaha icupa rimwe ugapima ingano ya alcohol iri mu maraso yabo, ushobora gusanga itandukanye. Ntabwo bivuze ko batanyoye alcohol ku kigero kingana, ahubwo bivuze ko bitewe n’ukuntu bangana, umubiri wabo wayiciye intege ku buryo butandukanye.”

Yakomeje asobanura ati “Kugira ngo byumvikane neza, fata itasi ijyamo mililitiro 500 y’icyayi, ufate n’itasi ijyamo mililitiro 100, zombi ushyiremo akayiko kamwe k’isukari. Umaze kugashyiramo ushobora kunywa ku itasi ya mililitiro ijana ukumva harimo isukari yumvikana ariko wanywa kuri mililitiro 500 ukumva ni nk’aho nta sukari washyizemo.”

Uretse izi mpamvu z’ingenzi zishobora gutuma abantu babiri banyoye inzoga zingana bashobora gusinda bitandukanye, hari izindi zirimo kuba umuntu wanyoye inzoga atariye asinda vuba kuko iyo zigeze mu gifu kirimo ubusa zihita zihuta cyane mu rura ruto aribwo zitangira gucengera mu maraso, ariko iyo umuntu yariye zitinda mu gifu, alcohol igacika intege mbere yo kugera mu maraso. Umuntu wariye kandi aba asanganywe ingufu, zishobora gutuma atinda kuganzwa na alcohol.

Ibindi ni ukuba umuntu atanywa amazi ahagije, kuba yanyoye inzoga arwaye, kuba ari umugore cyane ko ubushakashatsi bugaragaza ko imiterere y’abagore ituma bashobora gusinda vuba kurusha abagabo mu gihe banyoye alcohol zingana, ndetse no kuba umuntu afite imyaka mike.

Inzobere yaganiriye na IGIHE yavuze ko igipimo fatizo cya alcohol ishobora gutuma umuntu atasinda ari garama 0.05 (cyangwa 0.05%) muri mililitiro 100 z’amaraso, bivuze ko iyo umuntu arengeje icyo gipimo aba ashobora gusinda cyangwa ntasinde bitewe n’imiterere y’umubiri we, ingano ya alcohol yanyoye, igitsina cye, imyaka ye, ibiro bye n’ibindi.

Muri rusange, kunywa inzoga ubwabyo ntabwo ari bibi ku mubiri w’umuntu, kuko umubiri ukenera alcohol, nubwo ukenera nke cyane kurusha iri mu nzoga. Icyakora mu gihe ugiye kunywa inzoga, ni ngombwa kumenya ubuziranenge bwayo, ukanamenya inzoga udakwiye kurenza bitewe n’imiterere y’umubiri wawe.

Ku muntu udasanzwe uzinywa, ushobora kubaho ubuzima bwawe bwose utazikeneye, ku buryo udakwiye kumva ko wacikanywe ngo ushamaduke utangire uzinywe. Ni byiza kubitekerezaho mbere yo kubyishoramo kuko kenshi ingaruka zabyo zikunze kuruta ibyiza byazo.

Imiterere y'umubiri w'umuntu ishobora kugira uruhare mu buryo asindamo vuba cyangwa agasinda atinze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .