Kuki abangavu baterwa inda badakunda kugaragaza abazibateye?

Yanditswe na Thamimu Hakizimana
Kuya 27 Ugushyingo 2019 saa 12:53
Yasuwe :
0 0

Nubwo mu Rwanda usanga inzego zitandukanye zidahwema gushishikariza abana b’abakobwa basambanyijwe n’abatewe inda gutanga amakuru y’ababahohoteye, hari cyari imbogamizi y’uko benshi muri bo banga kubavuga.

Imibare y’uburyo ibirego byo gusambanya abana byatanzwe igaragaza ko mu 2016/17, Urwego rw’Igihugu rw’Ubugenzacyaha, RIB, rwakiriye ibirego 2091, mu 2017/18 biba 3060 naho mu 2018/19 yakira ibirego 3512.

Ni bake batanga amakuru y’ababasambanyije ukurikije ko mu 2016 abangavu ibihumbi 17 batewe inda nk’uko imibare ya Minisiteri y’Ubuzima ibigaragaza, umwaka ushize bakaba barageze ku bihumbi bisaga 19.

IGIHE yaganiriye na bamwe mu bakobwa batewe inda bari munsi y’imyaka 18 y’amavuko impamvu badakunze kugaragaza ababahohoteye kandi amategeko abahana ahari.

Aba bakobwa babwiye IGIHE ko guterwa inda bari munsi y’imyaka 18 byabagizeho ingaruka nyinshi zirimo gucikishiriza amashuri,guhabwa akato ,kwirukanwa mu miryango no gufatwa nk’indaya n’ibirumbo.

Bavuga ko banga kubwira Polisi n’ubuyobozi ababateye inda kuko baba bazi neza ko bahita bafungwa bakazabura ubafasha.

Ishimwe Yvnne wo mu Murenge wa Kigarama watewe inda afite imyaka 16,avuga ko yanze kurega uwamuteye inda kuko byaba ari nk’igisebo.
Yagize ati “ Umuntu yanga kubarega kuko aba yanga ko umwana akuze akumva icyo gisebo ko wafungishije papa we byagaragara nabi kandi ni wowe yafatamo nk’umuhemu ahubwo wowe uramureka ugaharanira kumurera se akazumva isoni nyuma.”

Munezero Liliane w’imyaka 19 ufite umwana w’imyaka Itatu we avuga ko atagaragaje uwamuteye inda kuko yari azi neza ko bahita bamufunga.

Ati “ Impamvu ntamureze nanze ko bamufunga kuki sicyo gisubizo ikindi nanze ko umwana yazakura yumva ko nafungishije se akamfata ukundi no kwanga kwiteranya n’imiryango.”

Mukandori Rehema ufite umwana watewe inda yiga mu mashuri abanza,we avuga ko yananiwe kubwira polisi ibyabaye ku mwana we kuko ariwe wishyiriye uwo musore.

Ati “ Ntacyo nari kubikoraho kuko umwana wanjye ni we wagiye kwishyira kuri uwo muhungu ku buryo iyo nanamubuzaga yambwiraga ko amukunda cyane kandi atamureka bituma ubwo bamuteraga inda mbura aho guhera njya kurega uwo musore.”

Umuvugizi w’Urwego rw’Ubugenzacyaha RIB Marie Michelle Umuhoza, yabwiye IGIHE ko icyo basaba abo bana ari ugutanga amakuru y’ababa babateye inda kugira ngo bahanwe.

Ati “ Icyo dusaba ni makuru nta kindi, baduhereze ayo makuru kugira ngo abo bantu bahanwe kuko baba bakoze ibyaha, ni nayo mpamvu haje za sitasiyo za RIB zigendanwa kugira ngo nabategereye sitasiyo za RIB bashobore gutanga ibirego bikurikirannwe.”

Murwanashyaka Evariste, Umuhuzabikorwa w’imishinga y’impuzamiryango y’uburenganzira bwa muntu CLADHO, yavuze ko hari ibintu bine bine by’ingenzi bituma abana badatanga amakuru y’ababateye inda.

Ati “ Icya mbere abantu babateye inda babatera ubwoba bakanga kubivuga kugira ngo batazabahemukira, icya Kabiri babashukisha utuntu ntibavuge, ababyeyi babo bagerageza kunga abana n’ababateye inda bakababuza kubivuga.”

Yakomeje avuga ko icya kane gituma abana batavuga ababateye inda ari uko nta buryo bwo kuregera indishyi bwari bwashyirwaho ku buryo abana banga kubavuga kugira ngo batazajya banga kubaha n’utwo dufaranga duke babashukisha.

Itegeko ryateganyijwe ko gusambanya umwana uri munsi y’imyaka 18 bihanishwa igifungo kitari munsi y’imyaka 20 ariko kitarenze imyaka 25.

Abangavu batewe inda bavuga ko banga kubwira Polisi n’ubuyobozi ababateye inda kuko baba bazi neza ko bahita bafungwa bakazabura ubafasha.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza