Ubujurire bwa Pascal Simbikangwa buzatangira kumvwa mu cyumweru gitaha

Yanditswe na Kanamugire Emmanuel
Kuya 19 Ukwakira 2016 saa 09:37
Yasuwe :
0 0

Abarokotse Jenoside yakorewe Abatutsi mu 1994 n’imiryango iharanira uburenganzira bwa muntu bagaragaje ko kujurira kwa Simbikangwa Pascal babyitezeho kugaragariza Abafaransa uruhare rw’igihugu cyabo muri Jenoside.

Mu 2014 nibwo Simbikangwa wahoze ahagarariye urwego rw’ubutasi mu Rwanda yakatiwe gufungwa imyaka 25 n’urukiko rwo mu Bufaransa ariko aza kujuririra iki gihano.

Ubujurire bwe buzatangira kumvwa hagati ya 25 Ukwakira na tariki ya 9 Ukuboza 2016 mu rukiko rwa Bobigny mu mujyi wa Paris.

Umuyobozi w’Ihuriro ry’imiryango yiyemeje gushakisha no gushyikiriza ubutabera abakekwaho Jenoside yakorewe Abatutsi mu Rwanda baba mu Bufaransa (CPCR), Alain Gauthier yavuze ko biteze ko uyu uzaba ari umwanya Abafaransa n’Isi yose babonye ngo bamenye ko mu 1994 mu Rwanda habaye Jenoside.

Ati” Isi igomba kumenya ko abakoze biriya byaha byibasiye ikiremwamuntu babonye ubuhungiro mu Bufaransa.”

Ubuyobozi bwa Ibuka bwo buvuga ko nk’abarokotse Jenoside, icyo bifuza ari ukubona ubutabera nyabwo mu Bufaransa, niba badashoboye kohereza abakoze ibyaha ngo baburanishirizwe mu Rwanda.

Mu kiganiro na The Newtimes, Perezida wa Ibuka, Prof. Jean-Pierre Dusingizemungu yavuze ko urubanza rwa Simbikangwa rwari amahirwe akomeye yo kugaragaza uruhare u Bufaransa bwagize mu gutegura no gushyira mu bikorwa Jenoside yakorewe Abatutsi.

Simbikangwa wari inshuti ya Juvenal Habyarimana ndetse bakagira n’icyo bapfana avugwaho kuba yaragize uruhare runini muri Jenoside.

Ubwo yaburanishwaga mu 2014, Ubushinjacyaha bwavuze ko adahamwa n’ibyaha bya Jenoside gusa ahubwo akomeje no guhakana ko yabayeho.

Icyo gihe bwagaragaje ko yari umwe mu gatsiko kateguye umugambi wa Jenoside ndetse akaba no mu bashinze RTLM, radio rutwitsi yashishikarizaga abahutu kwica abatutsi.

Uyu mugabo wabaye uwa mbere mu bakoze Jenoside waciriwe urubanza n’u Bufaransa, yatawe muri yombi mu 2008, nyuma y’imyaka 14 yihishahisha.

Izindi manza zabereye mu Bufaransa ni urwa Octavien Ngenzi na Tito Barahira bakatiwe igifungo cya burundu y’umwihariko.

CPCR ivuga ko yatunguwe n’uburyo izi manza zitavuzwe cyane mu itangazamakuru, ibisa no kudaha agaciro Jenoside yakorewe Abatutsi mu Rwanda.

Gauthier yakomeje ashimangira ko bigomba uruhare rw’abanyapolitiki b’abafaransa muri Jenoside yahitanye inzirakarengane zirimo abagabo, abagore n’abana rugomba kuvugwa nubwo bo badahwema kubihakana.

Pascal Simbikangwa yajuririye igifungo cy'imyaka 25 yakatiwe n'urukiko rwo mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza