Kwamamaza

Kudahabwa imyanya ikomeye dushaka ntibikwiye kutugira abarakare- Dr Biruta

Yanditswe kuya 30-10-2016 saa 11:34' na Rabbi Malo Umucunguzi


Perezida w’ishyaka PSD, Dr Vincent Biruta, yasabye urubyiruko rwo muri iri shyaka kwirinda kumva ko ishyaka ari inzira y’ubusamo izabageza mu myanya bashaka, ahubwo bagaharanira kwiyobora ku buryo n’abandi bababonamo ubushobozi.

Kuri uyu wa Gatandatu, Dr Biruta usanzwe ari Minisitiri w’Umutungo Kamere, ubwo yatangaga ikiganiro ku rubyiruko rusaga 60 ruhagarariye abandi muri PSD, aho yabasabye gukunda igihugu kandi bakagikorera.

Ati “Hari ababizize abandi bagwa ku rugamba baharanira ko igihugu cyacu kitavaho nk’uko bamwe babyifuzaga, cyangwa se abitwaga abayobozi b’ibisambo badakunda igihugu bari bakigejeje mu rwego rwo kuba [u Rwanda] rwanahanagurika rwose.’’

Yavuze ko mu Rwanda hari imitwe ya politiki itandukanye, ariko ikiruta ibindi ari ukumenya kubaha ibitekerezo by’abandi kandi ukumva ko nabo bagira uruhare mu kubaka igihugu. Ku rubyiruko, ngo rugomba kwigirira icyizere kandi rukamenya guca bugufi.

Ati “Byaturinda ya ndwara tujya turwara nk’abanyapolitiki rimwe na rimwe n’urubyiruko bamwe muri mwebwe, ukumva umuntu yabaye umurakare. Kuko natekereje ibi simbibone, ukumva yikubise byacitse, yabaye umurakare, yatukanye, yagiye kunyuranya nibyo yajyaga avuga ko yemera,’’

‘Kujya mu ishyaka si ukujyanwa n’imyanya’

Dr Biruta yavuze ko umuntu ubura umwanya ashaka akaba umurakare aba atarajyanwe mu mutwe wa politiki no gutanga ibitekerezo, ahubwo aba ashaka inzira y’ubusamo imugeza ku bintu ibi n’ibi, bitaba ibyo bigacika.

Ati “Niba icyakujyanye mu ishyaka cyari ukuba meya, niba ari ukuba depite, niba ari ukuba Minisitiri, ni ikintu kitari cyo kuko mu gihe cyose uzaba utitwa kimwe muri ibyo, cyangwa mo kimwe ukumva kitaguhagije uzahora mu burakare buhoraho.’’

“Uhereye kuri ibyo uri umurakare rero, na bwa bu meya ntabwo buba bugishobotse. Igishoboka ni amakosa hagati aho na bwa bumeya bukagenda. Iyo urota kuba Minisitiri ukaba ubaye depite, hanyuma ugatangira ubudepite wimyoza, na bwa budepite igishoboka ni uko bwatakara. Hanyuma ube depite ariko uba we ureba iriya ntebe ya Minisitiri, ikiba kizakurikira ni uko uzajya kwicara kuri ya ntebe yawe ugasanga wicaye ku ruhande kuko wari urangariye ahandi.’’

Dr Biruta yabwiye uru rubyiruko ko PSD nk’umutwe wa Politiki wa kabiri mu gihugu, ufite inshingano zikomeye zo gukomeza kubaka iki gihugu no kubaka Ubunyarwanda, nubwo inzira ikiri ndende.

Yatanze ingero ko nubwo u Rwanda rwateye imbere ndetse amahanga akabishima, rutaragera ku iterambere Abanyarwanda bifuza, kuko hakiri ubukene, hakiri ibikenewe mu burezi, mu mirire, mu miturire n’ibindi.

Ati “Ubu tugiye kujya mu matora ya Perezida wa Repubulika umwaka utaha, tugiye gushaka abakandida, na nyuma yaho hazaza amatora y’abadepite. Ibyo byose ntitukabirebere gusa mu kuvuga ngo turashaka umukandida wacu, ngo turashaka abantu bacu mu nteko.’’

“Tujye tuvuga ngo uwo ariwe wese azagenda ajyanye iki? Muri bya bibazo tugomba gukemura, ubundi abantu bazagenda bajyanye iki ? Abazaduhagararira muri izo nzego muri ayo matora tuzaba tubahaye iyi mpamba ?’’

Yavuze ko iyo umuntu atowe yumva neza inshingano agiye gukurikiza, umuyobozi yisanga aremerewe n’inshingano aho kuba yaremererwa n’ububasha yabonye.

Biruta yavuze ko nta muntu ukwiye kujya mu ishyaka agambiriye umwanya runaka wa Politiki

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved